ලිංගික අතවර චෝදනා ඔප්පුවී පාර්ලිමේන්තුවේ පිරිමි තුනක් ගෙදර යවයි

පාර්ලිමේන්තු කාර්ය මණ්ඩලයේ කාන්තාවන්ට ලිංගික හිංසන කළ නිලධාරීන් පිරිසක් සේවයෙන් පහ කළ බව ශ්‍රී ලංකා ප්‍රජාතාන්ත්‍රික සමාජවාදී ජනරජයේ පාර්ලිමේන්තු ඉතිහාසයේ ප්‍රථම වතාවට වාර්තා වී තිබේ.

ශ්‍රී ලංකා පාර්ලිමේන්තුවේ සන්නිවේදන දෙපාර්තමේන්තුව නිවේදනය කර ඇත්තේ ඒ සම්බන්ධයෙන් අදියර කිහිපයක් යටතේ විමර්ශන සිදු කිරීමෙන් අනතුරුව සේවකයන් තිදෙනකු වැරදිකරුවන් ලෙස තහවුරුවී ඇති බවයි.

එම දැඩි පියවර ගැනීමට තුඩු දුන් විමර්ශනයට මග පෑදී ඇත්තේ 2021 සහ 2022 කාල පරිච්ඡේදයේදී ලිංගික හිංසන සම්බන්ධයෙන් පුවත්පතක 2023 ජූලි 30 සහ 2023 අගෝස්තු 02 දින කරුණු වාර්තාවීමෙන් අනතුරුවයි.

2023 වසරේ අගෝස්තු මාසයේදී පාර්ලිමේන්තු කාන්තා සංසදය වෙනුවෙන් සමගි ජන බලවේගයේ පාර්ලිමේන්තු මන්ත්‍රිනී රෝහිණි කුමාරි විජේරත්න පෙන්වා දී තිබුනේ එම ලිංගික හිංසනයන්ට ගොදුරු වී ඇත්තේ පාර්ලිමේන්තුවේ ගෘහ පාලන අංශයේ කාන්තාවන් බවයි.

කාන්තාවන් ලිංගික හිංසනයට ලක් කළ අය සම්බන්ධයෙන් දැඩි ක්‍රියාමාර්ග ගන්නා ලෙස ඇය එදින පාර්ලිමේන්තුවේදී මහලේකම්වරියගෙන් වැඩි දුරටත් ඉල්ලා තිබුනි.

පාර්ලිමේන්තු මහලේකම් කුෂානි රෝහණදීරගේ නිර්දේශ මත වරදකාර සේවකයන් තිදෙන‍ා සේවයෙන් පහ කිරීම සඳහා කථානායක වෛද්‍ය ජගත් වික්‍රමරත්න ජනවාරි 09 වැනිදා අනුමැතිය ලබාදී තිබේ.

පාර්ලිමේන්තුවේ සන්නිවේදන දෙපාර්තමේන්තුව 2025 ජනවාරි 16 වැනිදා නිවේදනය කර ඇත්තේ පාර්ලිමේන්තු සේවිකාවන්ට ලිංගික හිංසන කිරීම සම්බන්ධයෙන් විමර්ශනය කිරීම සඳහා එවක කථානායකවරයාගේද උපදෙස් මත ත්‍රිපුද්ගල අභ්‍යන්තර විමර්ශන කමිටුවක් 2023.08.04 දින එවකට පාර්ලිමේන්තුවේ පරිපාලන අධ්‍යක්ෂගේ ප්‍රධානත්වයෙන් පාර්ලිමේන්තුවේ මහලේකම්වරිය විසින් පත් කරන ලද බවයි.

මෙම කමිටුවේ විමර්ශන අතරතුරදී පාර්ලිමේන්තු සේවකයන් දෙදෙනකු වැඩ තහනමට ලක් කොට ඇති අතර එම විමර්ශන කමිටු වාර්තාව 2023.08.23 දින පාර්ලිමේන්තුවේ මහලේකම්වරිය වෙත ලැබී ඇත.

පාර්ලිමේන්තුවේ සන්නිවේදන දෙපාර්තමේන්තුව වැඩි දුරටත් පවසන්නේ ඒ අනුව ඒ සම්බන්ධයෙන් වැඩිදුර උපදෙස් ලබා ගැනීම සදහා එය නීතිපතිවරයා වෙත යොමු කරන ලද අතර නීතිපති දෙපාර්තමේන්තුවෙහි උපදෙස් මත මීට අදාළ පරීක්ෂණය පොලිස්පති මඟින් ළමා හා කාන්තා අපයෝජන නිවාරණ කාර්යාංශය වෙත පවරා තිබු බවයි.

මේ අතර පොලිස් විමර්ශන අනුව තවත් පාර්ලිමේන්තු සේවකයකු අත් අඩංගුවට ගැනුණු අතර 2024.01.30 දින එම සේවකයාගේද වැඩ තහනමට ලක් කර තිබේ.

මේ අනුව, මීට අදාළ චෝදනා ගොනුකිරීමෙන් අනතුරුව විධිමත් පරීක්ෂණයක් පවත්වන ලෙස චූදිත නිලධාරීන් විසින් කරන ලද ඉල්ලීම මත නෛතික විධිවිධාන ප්‍රකාරව විධිමත් විනය පරීක්ෂණයක් පැවැත්වීම පිණිස විශ්‍රාමලත් මහාධිකරණ විනිසුරු කුසලා සරෝජිනී වීරවර්ධන පත් කර ඇත.

මෙම විනය පරීක්ෂණයේ අවසන් වාර්තාව පසුගිය 2024. 12.23 වැනිදා පාර්ලිමේන්තුවේ මහලේකම් කුෂානි රෝහණදීර වෙත භාර දී ඇති අතර එය පදනම් කර ගනිමින් අදාළ සේවකයන් තිදෙනා වැඩ තහනමට ලක්වූ දින සිට සේවයෙන් පහකිරීමට කථානායකවරයාට කරන ලද නිර්දේශය අනුව මේ වන විට සේවයෙන් පහ කිරීමට කටයුතු කර ඇති බවයි පාර්ලිමේන්තුවේ සන්නිවේදන දෙපාර්තමේන්තුව වැඩි දුරටත් පවසන්නේ.

පාර්ලිමේන්තුවේ තොරතුරු හා පද්ධති කළමනාකරණ අංශයේ කාන්තාවන්ට ද එහි බලධාරීන් විසින් ‘නිතර නිතර ලිංගික අතවර සිදුකෙරෙන’ බවට තොරතුරු වාර්තා වී ඇතැයි මුජිබුර් රහුමාන් පාර්ලිමේන්තු මන්ත්‍රීවරයා 2025 ජනවාරි 06 වැනිදා පාර්ලිමේන්තුව හමුවේ සඳහන් කළ අවස්ථාවේ කථානායක වෛද්‍ය ජගත් වික්‍රමරත්න සදහන් කර තිබුනේ එම චෝදනා සම්බන්ධයෙන් කිසිවකුත් මේ වන විට දැනුම්දීමක් සිදු කර නොමැති බවයි.