මහමග මරා දැමු මාධ්‍යවේදී ලසන්ත කොළඹත් නැගෙනහිරත් සැමරේ

පහලොස් වසරකට ඉහත දී ඝාතනයට ලක් වූ සන්ඩේ ලීඩර් පුවත්පතේ ආරම්භක කර්තෘවරයා සිහිපත් කරමින් අගනගරයේදී මෙන්ම නැගෙනහිරදීද අනුස්මරණ පවත්වා තිබේ.

ශ්‍රී ලංකාවේ ඝාතනයට ලක් වු මාධ්‍යවේදීන් අනුස්මරණය උදෙසා මඩකලපුව ගාන්ධි උද්‍යානය ඉදිරිපිට ස්ථාපිත කර තිබෙන ස්මාරකය අසලදී ජනවාරි 8 වැනිදා මාධ්‍යවේදී ලසන්ත වික්‍රමතුංගගේ ඡායාරූපයකට මලින් පහනින් උපහාර දැක්වු දෙමළ ජනමාධ්‍යවේදීන් පසුගිය සමයේ ඝාතනයට ලක්වු සියළු මාධ්‍යවේදීන් වෙනුවෙන් යුක්තිය ඉල්ලා විරෝධතාවයක්ද දියත් කර තිබේ.

නැගෙනහිර ලංකා මාධ්‍ය සංගමය, මඩකලපු දිස්ත්‍රික් දෙමළ මාධ්‍ය සමාජය සහ මඩකලපුව මාධ්‍ය සමාජය එක්ව එම විරෝධතාවය සංවිධානය කර තිබු බවයි පළාත් බද වාර්තාකරුවන් පවසන්නේ.

එම අවස්ථාවට එක්ව සිටි ජේසු නිකායික ටී. ජීවරාජ් පියතුමා සදහන් කලේ ශ්‍රී ලංකාව තුළ සිදුවු මාධ්‍යවේදීන්ගේ ඝාතනවලට වග කිව යුතු පුද්ගලයන්ට එරෙහිව නීතිය ක්‍රියාත්මක නොවීම නිසා මාධ්‍යවේදීන්ගේ කාර්ය අඩාල වී ඇති බවයි.

“ලසන්ත වික්‍රමතුංග වැනි මාධ්‍යවේදීන් 48ක් ලංකාව පුරා ඝාතනය කර තිබෙනවා. විශේෂයෙන්ම දෙමළ මාධ්‍යවේදීන් තිස් දෙදෙනෙක් ඝාතනය කර තිබෙනවා. නමුත් ඔවුන්ගේ ඝාතන සම්බන්ධයෙන් නිසි පරීක්‍ෂණ, ඝාතකයන් අත්අඩංගුවට ගැනීම් සිදුවී නැහැ. අත්අඩංගුවට ගත් අයත් නිදහස් කරලා තිබෙනවා. යථාර්ථය තමයි, මේ අවාසනාවන්ත තත්වය නොනැසී පැවතීම නිසා මාධ්‍යවේදීන්ගේ කාර්ය අඩාල වීම. ඒ නිසා ඝාතනයට ලක් වූ මාධ්‍යවේදීන්ට සාධාරණය ඉටු කරන්න කියලා අපි ජනාධිපතිතුමාගෙන්, නීතිය ක්‍රියාත්මක කරන බලධාරීන්ගෙන් සහ අධිකරණයෙන් ඉල්ලා සිටිනවා.”

මාධ්‍යවේදීන් 44 ක්

2004-2010 හය වසර තුල ඝාතන සහ අතුරුදහන් කිරීම් ඇතුළු පීඩාවලට රට තුලදී ලක්වූ මාධ්‍යවේදීන් ගණන 44 ක් බව ශ්‍රී ලංකාවේ ප්‍රජාතන්ත්‍රවාදය සඳහා මාධ්‍යවේදියෝ (JDS) විසින් සම්පාදනය කරන ලද වාර්තාවක දැක්වේ.

ඉන් වැඩි ප්‍රමාණයක් උතුරේ දෙමළ මාධ්‍යවේදීන්ය. ඔවුන් කිසිවකුටත් මේ තාක් යුක්තිය ඉටු වී නොමැත.

වත්මන් ජනාධිපති රනිල් වික්‍රමසිංහ අගමැතිවරයා ලෙස කටයුතු කළ සමයේ එම මාධ්‍යවේදීන් වෙනුවෙන් යුක්තිය ඉටු කරන බවට වු පොරොන්දු මේතාක් ඉටු කර නොමැත.

බොරැල්ල කනත්තේ පිහිටි මාධ්‍යවේදී ලසන්න වික්‍රමතුංගගේ සුසානය අබියසදී පෙර වසරවලදී මෙන්ම මෙවරත් ඔහුව අනුස්මරණය කිරීමට දේශපාලනඥයන්, මානව හිමිකම් ක්‍රියාධරයන්, මාධ්‍යවේදීන් ඇතුළු පිරිසක් කටයුතු කර තිබුනි.