ජනපති පැනවූ කච්චතීව් තහංචියත් අකුලයි

ජනාධිපතිවරයාගේ තවත් නියෝගයක් ආපසු හරවමින් කච්චතිව් දුපතේ වාර්ෂික ශාන්ත අන්තෝනි දේව මංගල්ලයට සහභාගිවීමට දෙරටේ බැතිමතුන්ට පනවා තිබු තහනම ඉවත් කර තිබේ.

“රටවල් දෙකෙන්ම සිය දෙනා බැගින් සහභාගිවීමේ අවසරය ජනාධිපතිතුමා සමඟ සාකච්ජා කර ලබා ගත්තා.මමත් කච්චතිව් මංගල්ලෙට යනවා,” යැයි ධීවර ඇමැති ඩග්ලස් දේවානන්දා පවසයි.

වවුනියාවේදී ඊයේ[07]පැවති රැස්වීමකදී අදහස් දක්වමින් ඇමැතිවරයා කියා සිටියේ ඉන්දු ලංකා බලධාරීන් අතර දීර්ඝ ලෙස කරන ලැබූ කතා බහේ ප්‍රතිපලයක් ලෙස රටකින් බැතිමතුන් පනස් දෙනා බැගින් සහභාගිවීමට අවසර ලැබුණු මුත් තමන් ජනාධිපතිවරයා සමඟ තවදුරටත් සාකච්ජා කිරීමේ ප්‍රතිපලයක් ලෙස එය සිය දෙනා දක්වා වැඩි කර ගැනීමට හැකි වූ බවයි.

මාර්තු 11 සහ 12 දෙදින පැවැත්වෙන කච්චතිව් ශාන්ත අන්තෝනි වාර්ෂික දේව මංගල්ලය ඉන්දු ලංකා බැතිමතුන්ට තහනම් කරමින්,කතෝලික පියතුමන්ලාට පමණක් සහභාගිවීමට අවසර දෙමින් ජනාධිපති ගෝඨාභය රාජපක්ෂ විසින් නියෝග කර තිබිණි.

යාපනය දිසා ලේකම්වරයා විසින් ලංකාවේ බැතිමතුන් 500 ක් සඳහා අවසර ලබා දීමට කලින් සැලසුම් කර තිබුනේ කෝවිඩ් වසංගතය පැතිරීම හේතුවෙන් කච්චතිව් මංගල්ලයට එක්වීමේ අවස්ථාව ඉන්දීය බැතිමතුන්ට අහිමිකරමින්ය.

ඉන්දීය බැතිමතුන්ට සහභාගීවීමේ අවඅවස්ථාව අහිමිකිරීම ගැන කනස්සල්ල පළ කළ තමිල්නාඩු මහ ඇමැති එම්.කේ ස්ටාලින් එරට විදේශ කටයුතු ඇමැති ජෙයශන්කර් මෙනන් ගෙන් ඉල්ලා සිටියේ ලංකා ආණ්ඩුව සමග සාකච්ජා කොට ඒ සඳහා පහසුකම් සලසන ලෙසයි.

තමිල්නාඩු මහ ඇමතිවරයාගේ ඉල්ලීමට අනුව ද්‍රවිඩ මුන්නේත්‍ර කලහම් [DMK]නායකයකු වන ටී.ආර්.බාලු හා ලංකා ධීවර ඇමැති ඩග්ලස් දේවානන්දා අතර “සුම්“සාකච්ජාවේදී තීරණය වුයේ කච්චතිව් උත්සවයට ඉන්දීය ධීවරයන්ගේ හා සෙසු බැතිමතුන්ගේ සහභාගිත්වය ගැන ඉල්ලා ජනාධිපති ගෝඨාභය රාජපක්‍ෂ වෙත ලිපියක් යොමු කිරීමටය.

1974 ජුනි 26 වැනිදා සිරිමාවෝ බණ්ඩාරනායක හා ඉන්දිරා ගාන්ධි අතර අත්සන් කෙරුණු ගිවිසුමකින් ලංකාවට හිමිකර ගත් කච්චතිව් දුපත මුහුදු රැකියාවේදී දෙරටේම ධීවරයන්ගේ තාවකාලික නැවතුමකි.

“දෙරටේ ධීවරයන් අතරේ සහයෝගීතාවක් ඇති කරන්න මෙවර කච්චතිව් උත්සවය යොදා ගන්න වෑයම් කරනවා.ඒකයි මමත් එහෙ යන්නේ,“යැයි ඇමැති දේවානන්දා සඳහන් කරයි.

ලංකා මුහුදු සිමාවේ පිහිටි කච්චතිව් දුපත වඩාත් සමීප වන්නේ ඊට කිලෝමීටර් 14 ක් දුරින් පිහිටි ඉන්දියාවේ රාමේශ්වරම් ප්‍රදේශයටයි.

අක්කර 285 කින් යුත් කච්චතිව් දුපතේ 1900 දී ඉදි කෙරුණු ශාන්ත අන්තෝනි දේවස්ථානය සමගින් දශක ගණනාවක් පුරා දෙරටේ ධීවර ප්‍රජාවගේ ගෞරවාදරයට පාත්‍ර වෙමින් දේව මංගල්ලය පැවැත්වේ.

ලංකා නාවික හමුදාව දැනුම් දී ඇත්තේ තමිල්නාඩුවේ රාමේශ්වරම් සිට පැමිණෙන නිසි අවසරපත් නොමැති කිසිදු බෝට්ටුවක් කච්චතිව් වෙත ඇතුල් කර නොගන්නා බවයි.