අතුරුදහන් වුවන් පිළිබඳ කාර්යාලය (OMP) විසින් කැඳවන ලද රැස්වීමකට එම කාර්යාලයේ නියෝජිතයන් නොපැමිණිමෙන් උරණ වු අතුරුදහන් කරවුවන්ගේ ඥාතියෝ වවුනියාව නගරයේ විරෝධතාවක් පැවැත්වූහ.
සාකච්ඡා සභාව නොදන්වා අවලංගු කිරීම ගැන කෝපය පල කරමින් “රවට්ටන්නෙපා” යි නගරයේ පෙළපාලි යමින් හඬනැගූ ඥාතීන් මහත් කලකිරීමෙන් කියා සිටියේ රැස්වීම් වලට කැඳවා මග හරින්නා සේම තම දරුවන්ගේ ඉරණම හෙළි කර දෙන බවට කෙරෙන ප්‍රකාශත් මුලා කිරීම් බවයි.
වවුනියාව අතිරේක දිසාපති ටී තිරේෂ්කුමාර් විසින් ලිපියකින් දන්වා එවා තිබුනු පරිදි අගෝස්තු 20 දා නගර සභාවේ සංස්කෘතික රංග ශාලාවේ පැවැත්වෙන ප්‍රවිචාරණ සාකච්ඡා සභාවකට ගිය ඥාතීන්ට දැකගන්නට ලැබී තිබුනේ වසා ඇති ගේට්ටුවකි.
ඥාතීන්ගේ බලපෑම හමුවේ ගේට්ටුව විවෘත කර ඔවුන් හමුවූ බලධාරීන් ප්‍රකාශ කළේ ඉහලින් ලැබුනු නියෝගයක් පරිදි රැස්වීම අවලංගු කරන ලද බවයි.
රැස්වීම අවලංගු කල බවට ලිපියක් දිස්ත්‍රික්කයේ ප්‍රාදේශීය ලේකම්වරුන් සිව් දෙනාටම යවන ලද බව සහකාර සැලසුම් අධ්‍යක්ෂිකා වී කිරුබසුදන් ඥාතීන් හමුවේ ප්‍රකාශ කළාය
එවන් දැනුම් දීමක් තමන්ට ලැබුනේ නම් දුර බැහැර ගෙවා පැමිණීමේ අවශ්‍යතාවක් නැති බවයි ඇයටත්, ඇය සමග සිටි සහකාර දිස්ත්‍රික් ලේකම් එන් කමලදාසන්ටත් ඥාතීන් පෙන්වා දී ඇත්තේ.
“මේ ලියුමෙන් අපිව රැවට්ටුවා වගේමයි අපේ ළමයි ගැනත්, සමහර අය බොහොම ඈත පළාත් වලින් ආවේ ණයට සල්ලි අරගෙන. දැන් හිස් අතින්ම ආපහු යන්න වෙලා.” යි ඥාතීන් කෝපයෙන් හා ශෝකයෙන් යුතුව කියා සිටියෝය.
අතුරුදහන් වුවන්ගේ කාර්යාලය පිළිබඳ තමන් තුල වූ අවිශ්වාසය නොදන්වා රැස්වීම අවලංගු කිරීම මගින් තව දුරටත් තහවුරු වූ බව ඥාතීහු කියා සිටියහ.
Facebook Comments
