කීත් නොයාර් මාධ්‍යවේදියා දස අවුරුද්දකට ඉහතදී පැහැරගෙන ගොස් වද දී මහමග දමා ගිය නඩුවේ “ප්‍රධාන සාක්ෂිකරුවන්ට අමතක වීමේ රෝගයක් වැළඳී ඇති” බව සඳහන් කළ මහේස්ත්‍රාත්වරිය අමතකවීම සම්බන්ධයෙන් විමර්ශනයක් කරන ලෙස රහස් පොලිසියට නියෝග කර තිබේ.
කීත් නොයාර් 2008 මැයි මස 22 දා පැහැරගෙන යාම පිළිබඳව එවක රාජ්‍ය පරිපාලන හා ස්වදේශ කටයුතු අමාත්‍ය කරු ජයසුරිය, මාධ්‍යවේදී ලලිත් අලහ‍කෝන් සහ ද නේෂන් පුවත්පත මුද්‍රණය කළ රිවිර සමාගමේ සභාපති ක්‍රිෂාන්ත කුරේ ද හිටපු ජනාධිපති මහින්ද රාජපක්ෂට දැනුම් දීමෙන් අනතුරුව මාධ්‍යවේදියා පසුදින ගල්කිස්ස ප්‍රදේශයේ මග දමා ගොස් තිබුනි.
ඒ සම්බන්ධයෙන් මතකයක් නැතැයි රහස් පොලිසිය කළ විමර්ශනයේදී මහින්ද රාජපක්ෂ මන්ත්‍රීවරයා සඳහන් කර ඇතැයි අධිකරණය හමුවේ පැවසූ අධිනීතිඥ ලක්මිණි ගිරිහාගම අවධාරණය කළේ සාක්ෂිකරුවන්ගේ අමතක වීම ඉදිරි විමර්ශන වලට බාධාවක් බවයි.
එම කරුණු සලකා බැලු ලෝචනා අබේවික්‍රම ගල්කිස්ස අතිරේක මහේස්ත්‍රාත්වරිය ඒ පිළිබඳව පරීක්ෂණයක් සිදු කරන ලෙස 20 සඳුදා රහස් පොලිසියට නියෝග කළේය.
මේ අතර මාධ්‍යවේදියා රඳවාගෙන වධහිංසා කළ නිවසේ තොරතුරු ආරක්ෂක ලේකම්වරයා විසින් ලබා දී නොමැති බව අධිකරණය හමුවේ අනාවරණය විය.
ද නේෂන් පුවත්පතේ හිටපු සම සංස්කාරක නොයාර් පැහැරගෙන ගිය බවට සැකකෙරෙන ශ්‍රී ලංකා යුද හමුදාවේ නිලධාරීන් පිරිසක් ඔහු සිරකොට තබා සිටි බවට රහස් පොලිස් විමර්ශන වලින් හෙළිවී ඇති නිවස පිහිටා ඇත්තේ දොම්පේ බදුවත්තේය.
ඒ සම්බන්ධයෙන් ආරක්ෂක ලේකම් කපිල වෛද්‍යරත්නගෙන් ඉල්ලා තිබෙන තොරතුරු ලැබී නැති බව නීතිපති දෙපාර්තමේන්තුව විසින් ගල්කිස්ස මහේස්ත්‍රාත් අධිකරණයට දැනුම් දෙන ලදී.
කීත් නොයාර් පැහැරගෙන ගොස් වධහිංසා කිරීම පිළිබඳ සැකපිට අත් අඩංගුවට ගන්නා ලද හිටපු යුද හමුදා බුද්ධි අධ්‍යක්ෂ මේජර් ජනරාල් අමල් කරුණාසේකර ට ඇප ලබා දීම ප්‍රතික්ෂේප කළ මහේස්ත්‍රාත්වරිය තවත් සතියක කාලයකට ඔහු රිමාන්ඩ් භාරයට පත් කළාය.
අනිකුත් සැකකරුවන් වන යුද හමුදා බුද්ධි බලකායේ මේජර් ප්‍රභාත් බණ්ඩාර බුලත්වත්ත, සාජන් දුමින්ද වීරරත්න, සාජන් හේමචන්ද්‍ර පෙරේරා, කෝප්‍රල් ලසන්ත විමලවීර සහ කෝප්‍රල් නිශාන්ත ජයතිලක මේ වනවිට ඇප ලබා නිදහස්ව සිටිති.
Facebook Comments
