ඇත්ත වසන් කිරීමට නොහැකි බව මෙන්ම ඇත්ත කවදා හෝ එළිවන බවට හිටපු මුදල් අමාත්‍ය අමාත්‍ය රවී කරුණානයක පවසයි.
බැඳුම්කර වංචාව සම්බන්ධව තමාට එල්ල වී ඇති චෝදනා හේතුවෙන් පුද්ගලික ජිවිතයක් ගත කිරීමට පවා නොහැකි තත්ත්වයක් උදාවී ඇති බව විදේශ අමාත්‍ය රවී කරුණානායක ප්‍රකාශ කර සිටියේ 02 බදාදා බැඳුම්කර වංචාව සම්බන්ධ ජනාධිපති කොමිසම හමුවේ සාක්ෂි ලබා දීමෙන් අනතුරුව මාධ්‍ය අමතමිනි.
“සාක්ෂි නැතිව මාධ්‍ය මාව එල්ලන්න හැඳුවා. අද සාක්ෂි සහිතව ඒවා බොරු කියලා අපි ඔප්පුකරලා පෙන්නුවා. රජයේ නීතිපති දෙපාර්තමේන්තුව අපේ චරිත ඝාතනය කරලා ඒ අය ඉස්සරහට යන්න හදනවා. නැත්නම් මොනවද මේ තිබෙන සම්බන්ධකම්. මේක තුළින් අපට පෞද්ගලික ජීවිත ගත කළ නොහැකි තත්ත්වයකට පත්ව තිබෙනවා. අපි ආවේ යහපාලනය ගෙනියන්න. ඒකට ඉහළින්ම කටයුතු කර තිබෙන පුද්ගලයෙක් මම.” යි අමාත්‍යවරයා පවසයි.
කොල්ලූපිටියේ ‘මොනෑක් එපාර්ට්මන්ට්‘හි නිවස මුලින් බදු ගැනීම හා පසුව මිලට ගැනීම පිළිබඳව තමා කිසිවක් නොදන්නා බවත් එම නිවස මිලට ගැනීමට කටයුතු කර ඇත්තේ තම බිරිඳ හා වැඩිමහල් දියණිය අධ්‍යක්‍ෂධුර දරන සමාගමෙන් යැයි අමාත්‍යවරයා ජනාධිපති කොමිසම හමුවේ ප්‍රකාශ කර තිබේ.
මේ අතර නීතිපති දෙපාර්තමේන්තුව විසින් අර්ජුන් ඇලෝසියස් ගේ දුරකතනයෙන් ලබාගත් දත්ත ඇතුළත්, පිටු 8600ක වාර්තාවක් ජනාධිපති කොමිෂන් සභාව ඉදිරියේ තබන ලදී.
ජංගම දුරකතනයෙන් මකා දමා ඇති දත්තයන් ද විශේෂඥයන් ලවා නැවත ප්‍රකෘති කොට මෙම වාර්තාවට ඇතුළත් කර ඇති බව සහ ඒ අතර ඉතා සංවේදී සහ වැදගත් වූ තොරතුරු පවතින බව නීතිපති දෙපාර්තුමේන්තුව කොමිසම හමුවේ කියා සිටියේය.
Facebook Comments
