පළාත් සභා හා පලාත් පාලන අමාත්‍යංශයේ වැය ශීර්ෂ පසුගියදා පාර්ලිමේන්තුවේදී පරාජයට පත්වීම හමුවේ රාජ්‍ය සේවයේ අංශ ගණනාවක් බරපතල අර්බුදයකට මුහුණදී සිටින බව විෂයභාර අමාත්‍යවරයා පෙන්වා දී තිබේ.
එම හේතුවෙන් පළාත් සභා සියල්ලෙහිම සහ පළාත් පාලන ආයතන 341ක ලක්ෂ 5 හමාරක්වූ රාජ්‍ය සේවකයන් කිසිවෙකුටත් එළඹෙන සිංහල හා හිංදු අලුත් අවුරුද්ද සදහා වැටුප් හා දීමනා ගෙවීමට නොහැකි තත්වයක් උදාවී ඇති බවයි වජිර අබේවර්ධන අමාත්‍යවරයා සඳහන් කරන්නේ.
“පොහොට්ටුවේ බලය තියෙන ආයතන ඔවුන් විසින්ම පරාජය කිරීම ඇත්ත වශයෙන්ම අරුම පුදුම ක්‍රියාවලියක්.” යැයි වැය ශීර්ෂ පරාජයට පත්වීමත් සමග එහි බලපෑම පිළිබද කරුණු පැහැදිලි කිරීම සදහා 31 ඉරිදා කොළඹ කැදවා තිබූ මාධ්‍ය හමුවකදී අමාත්‍ය වජිර අබේවර්ධන කියා සිටියේය.
පළාත් පාලන ආයතනවල වැඩ අවසන් කර ඇති ව්‍යපෘති සහ දැනට ක්‍රියාත්මක තත්වයේ පවතින ව්‍යාපාති සදහා එළඹෙන අප්‍රේල් මස 5වනදායින් පසු අත්තිකාරම් මුදල් ගෙවීමට නොහැකි වන බවයි අමාත්‍යවරයා පෙන්වා දුන්නේ.
වැය ශීර්ෂ පරාජය කිරීමට තීරණය කළ ආකාරයෙන්ම එය කඩිනමින් නිවැරදි කිරීමට විපක්ෂයේ මන්ත්‍රීවරුන් පියවර ගත යුතු බව ද වජිර අබේවර්ධන ඇමැතිවරයා ප්‍රකාශ කළේය.
එසේ නොකරන්නේනම් පළාත් පාලන ආයතනවල ක්‍රීයාකාරිත්වය ඇණහිටීමේ වගකීම ශ්‍රී ලංකා පොදුජන පෙරමුණ නියෝජනය කරන විපක්ෂයේ මන්ත්‍රිවරුන් භාර ගත යුතු බව ද අමාත්‍යවරයා වැඩිදුරටත් අවධාරණය කරන ලදී.
Facebook Comments
