ජාත්‍යන්තර හා දේශියව නැගෙන විරෝධතා නොතකා හැර ඇති ජනාධිපතිවරයා මරණී දණ්ඩනය ක්‍රියාත්මක කිරීමට දින නියම කර ගෙන ඇතැයි ප්‍රසිද්ධියේ ප්‍රකාශයට පත් කර තිබේ.
නීතිවිරෝධි මත්ද්‍රව්‍යවලට එරෙහි සියලු නීති රීති මේ වන විට ශක්තිමත් කර තිබෙන බව ද ජනාධිපති මෛත්‍රීපාල සිරිසේන 31 ඉරිදා මෝදර විට්ස්වයික් උද්‍යානයේ පැවති මත්ද්‍රව්‍ය විරෝධි වැඩසටහන අමතමින් ප්‍රකාශ කළේය.
කෙසේ වෙතත් මරණ දණ්ඩනය ලබා දීමට දින නියම කර ඇති බව ප්‍රකාශ කලද එම දිනය ජනාධිපතිවරයා විසින් ප්‍රකාශයට පත් කර නැත.
මත්ද්‍රව්‍ය ජාවාරමට එරෙහි තම සටන දියත් කළේ පාර්ලිමේන්තු මන්ත්‍රීවරයෙකු සමයේ සිටම බව කී ජනපති ජනාධිපති ධූරයට පත්වීමෙන් පසු එම සටන ශක්තිමත්ව ක්‍රියාවට නැංවීමට හැකි වූ බව ද කියා සිටියේය.
මතින් නිදහස් රටක් වෙනුවෙන් සිදු කෙරුණු විශේෂ දේව මෙහෙයෙන් අනතුරුව බස්නාහිර පළාත් කතෝලික දෙව්මැදුර අසල සිට විරෝධතා පුවරු ප්‍රදර්ශනය කරමින් නිහඬ විරෝධතාවයක නිරත විය.
ඉන්පසු කොච්චිකඬේ සාන්ත අන්තෝනි, ග්‍රැන්ඞ්පාස් සාන්ත ජෝශප්, වත්තල සාන්ත මරියා දෙව්මැදුරු වලින් පැමිණි විරෝධතා පා ගමන් මෝදර විට්ස්වයික් උද්‍යානයට එක්ව විශේෂ දැනුවත් කිරීමේ වැඩසටහනක් පැවැත්විණි.
ජාත්‍යන්තර ක්ෂාම සංවිධානය හා යුරෝපා සංගමය වැනි සංවිධාන සහ ඇතැම් බටහිර රටවල විසින් ද ජනාධිපති මෛත්‍රීපාල සිරිසේන එල්ලුම් ගහ ක්‍රියාත්මක කිරීමට ගත් තීරණය දැඩිව දෝෂ දර්ශණයට ලක් කර තිබුණි.
Facebook Comments
