දෙමළ විමුක්ති කොටි සංවිධානය විසින් ආරක්ෂා කරන ලද වනාන්තර දේශපාලකයන් හා ඡාවාරම්කරුවන් එක්ව විනාශ කර දමන බවට ජනාධිපතිවරයා සිය කණස්සල්ල පළ කර තිබේ.
රටේ ඉතිරිව ඇති වනාන්තර අතරින් 28% ක් වැඩි ප්‍රමාණයක් පවතින්නේ උතුරු නැගෙනහිර ප්‍රදේශ වල බව ජනාධිපති මෛත්‍රීපාල සිරිසේන 21 බ්‍රහස්පතින්දා දිඹුලාගල, වෙහෙරගල මහා විද්‍යාලයේ පැවති ජගත් වනාන්තර දින සැමරුම් උත්සවයේ දී කියා සිටියේය.
උතුරේ වනාන්තර ආරක්ෂා වුයේ කොටි සංවිධානය නිසාවෙන් බව කී ජනපති යුද්ධය නොමැති අනෙක් ප්‍රදේශවල වනාන්තර පද්ධතිය දේශපාලනඥයන් සහ ජාවාරම්කරුවන් එක්ව විනාශකර අවසන් බවට චෝදනා කළේය.
“එල්.ටී.ටී.ඊ නායක ප්‍රභාකරන් කරන සියලු දේවල් වැරදි කළා. ඔහු ම්ලේච්ඡයෙක් ඔහු ත්‍රස්වාදියෙක් ඔහු ඉතාම නරක කෙනෙක් නමුත් ඔහු කළ එකම හොඳ වැඩේ තමයි වනාන්තරය ආරක්ෂා කරපු එක.” යැයි ජනපති පැවසීය.
කොටි සංවිධාන නායකයා එසේ වනාන්තරය ආරක්ෂා කරන ලද්දේ ගරිල්ලා සටන් සඳහා වනය අවශ්‍ය නිසා බව ජනාධිපතිවරයා කියා සිටියේය.
රට තුළ දැනට පවත්නා වන ඝනත්වය ආරක්ෂා කර ගැනීමට සියලුදෙනා එක්ව කැප නොවුණහොත් තවත් වසර 15 ක් යන විට වනාන්තරය අහිමි වී යන බවටද ජනපති අනතුරු ඇඟවීය.
රජය ඉදිරි වසර 03 තුළ දී ඉටුකර ගැනීමට අපේක්ෂා කරන රටේ වන ඝනත්වය 32% ක් දක්වා ඉහළ නංවා ගැනීමේ වැඩසටහන සාර්ථක කර ගැනීමට නම් හෙක්ටයාර් එක්ලක්ෂ හතළිස් අටදහසක් අලුතින් වැවිය යුතු බවයි ජනපති පෙන්වා දෙන්නේ.
ඒ සඳහා වසරකට හෙක්ටයාර් පහළොස් දහසක් වැවිය යුතුව ඇති බැවින් එම වැඩපිළිවෙළ සාර්ථක කර ගැනීමට රාජ්‍ය අංශය, පෞද්ගලික අංශය, රාජ්‍ය නොවන සංවිධාන, පාසල් දරුවන් ඇතුළු සියලු පුරවැසියන්ගේ සහාය අපේක්ෂා කරන බව ජනාධිපති මෛත්‍රීපාල සිරිසේන වැඩි දුරටත් පැවසීය.
Facebook Comments
