ජාතිවාදයට හා අන්තවාදයට විරුද්ධ ජාත්‍යන්තර නීතියක් උපයෝගී කර ගනිමින් දෙමාසයකටත් වැඩි කාලයක් තිස්සේ සිර ගත කොට ඇති සාහිත්‍යවේදී ශක්තික සත්කුමාර නිදහස් කරගනු පිණිස ලොව ප්‍රධානතම ලේඛක සංවිධානයක් විසින් අන්තර් ජාතික ව්‍යාපාරයක් දියත් කර තිබේ.
ශක්තික සත්කුමාර සිරගත කොට ඇත්තේ ප්‍රකාශනයේ නිදහස සාමකාමී ලෙස අභ්‍යාස කිරීමේ වරදට බව පෙන්වා දෙන ලන්ඩනයේ පදනම් වූ ජාත්‍යන්තර පෙන් සංවිධානය (International PEN), ඔහු කොන්දේසි විරහිතව වහා නිදහස් කරන ලෙස සිය ජාත්‍යන්තර ආයාචනය මගින් ඉල්ලා සිටි.
සමාජ මාධ්‍ය ඔස්සේ පළ කරන ලද කෙටිකතාවක් හේතුවෙන් සිවිල් හා දේශපාලන අයිතිවාසිකම් පිළිබඳ ජාත්‍යන්තර සම්මුතිය පිළිබද පනත (ICCPR) යොදා ගනිමින් ශක්තික සත්කුමාර සිර ගත කරන ලද්දේ පසුගිය අප්‍රියෙල් මාසයේදී ය.
සාහිත්‍යවේදීයා අයුක්ති සහගත ලෙස සිරකර තැබීම සම්බන්ධව ජාත්‍යන්තරයේ අවධානයට ගෙන ඒමට සම්බන්ධීකරණය සිදු කොට ඇත්තේ පිටුවහලේ ජිවත්වන ශ්‍රී ලංකාවේ මාධ්‍යවේදීන් පිරිසක් එක්ව පිහිටුවා ගත් ශ්‍රී ලංකාවේ ප්‍රජාතන්ත්‍රවාදය සඳහා මාධ්‍යවේදියෝ (JDS)සංවිධානයයි.
සම්මානිත ලේඛක ශක්තික සත්කුමාර කොන්දේසි විරහිතව වහාම නිදහස් කරන ලෙසත්, සත්කුමාරට එරෙහිව නගා ඇති පදනම් විරහිත විමර්ශනය නවතා දමන ලෙස හා ජාත්‍යන්තර ප්‍රමිතීන්ටත්, ශ්‍රී ලංකාවේ පාර්ශවකරුවකු වන සිවිල් හා දේශපාලන අයිතිවාසිකම් සම්බන්ධ ජාත්‍යන්තර සම්මුතිය ප්‍රකාරවත් ප්‍රකාශනයේ නිදහස ආරක්ෂා කිරීමට පියවර ගන්නා ලෙසට සිය ගෝලීය ආයාචනය මගින් ජාත්‍යන්තර පෙන් සංවිධානය ශ්‍රී ලංකා බලධාරීන්ගෙන් ඉල්ලා ඇත.
ලොව පුරා විසිරී ජීවත්වන ලේඛකයන් අතර සාහිත්‍යමය හා බුද්ධිමය සහයෝගීතාව වර්ධනය කරනු පිණිස සියවසකට පෙර පිහිටුවන ලද ජාත්‍යන්තර පෙන් සංවිධානය, මේ වනවිට 100කට වැඩි රටවල් ප්‍රමාණයක ක්‍රියාත්මක වන මධ්‍යස්ථාන ජාලයකින් සැදුම් ලද්දකි.
Facebook Comments
