රජයේ වෛද්‍ය නිලධාරීන්ගේ සංගමය විසින් 05 බදාදා සිට ආරම්භ කිරීමට නියමිතව තිබු අඛණ්ඩ වැඩවර්ජනය සතියක කාලයක් අත්හිටුවීමට තීරණය කර තිබේ.
එම සංගමයේ විධායක කමිටුව 04 අඟහරුවාදා රැස් වු අවස්ථාවේදී මෙම තීරණය ගෙන ඇත.
ඊයේ(3) දිනයේ උසස් අධ්‍යාපන අමාත්‍ය ලක්ෂ්මන් කිරිඇල්ල සමඟ තම සංගමය පැවත්වූ සාකච්ඡාවේදී ලැබුණු ප්‍රතිචාරවලට අනුව සයිටම් ගැටළුව පිලිබඳ ධනාත්මක පිළිතුරක් ඉතා ඉක්මණින් ලැබෙනු ඇති බවට විශ්වාසය පළ කරන බවයි රජයේ වෛද්‍ය නිලධාරීන්ගේ සංගමයේ ලේකම් වෛද්‍ය හරිත අලුත්ගේ පවසන්නේ.
එමෙන්ම ඊයේ(3) දිනය තුළ තම සංගමයේ නියෝජිත පිරිසක් අස්ගිරි මහනාහිමි බැහැ දැක මෙම ගැටළුව පිලිබඳ සාකච්ඡා කළ බව පවසන වෛද්‍ය හරිත අලුත්ගේ අතිඋතුම් මැල්කම් කාදිනල් රංජිත් හිමිපාණන් ඇතුළු පූජ්‍ය පක්ෂය ද අද(4) දිනයේ වර්ජනය සම්බන්ධයෙන් විශේෂ ඉල්ලීමක් සිදු කර ඇති බවද ඔහු සඳහන් කළේය.
ඒ අනුව මෙම සියළු කරුණු පිලිබඳව ගැඹුරින් අධ්‍යයනය කළ රජයේ වෛද්‍ය නිලධාරීන්ගේ සංගමයේ විධායක සභාව හෙට සිට ක්‍රියාත්මක කිරීමට නියමිතව තිබූ අඛණ්ඩ වැඩවර්ජනය සතියක කාලයක් සඳහා අත්හිටුවීමට තීරණය කළ බවයි ඔහු කියා සිටියේ.
Facebook Comments
