විවිධ බාධක මැද ජාතික සමගිය හා සංහිඳියාව පවත්වාගෙන යාමට කටයුතු කිරීම සම්බන්ධව මහා මාර්ග හා මාර්ග සවර්ධන ඇමති කබීර් හෂීම් මුස්ලිම් මාධ්‍යවේදීන් හට සිය ස්තුතිය පුද කර තිබේ.
ශ්‍රී ලංකා මුස්ලිම් ජනමාධ්‍යවේදී සංසදයේ සභාපති එන්.එම්.අමීන් මහතාගේ ප්‍රධානත්වයෙන් පැවති ශ්‍රී ලංකා මුස්ලිම් ජනමාධ්‍යවේදී සංසදයේ 22 වැනි මහා සභා රැස්වීමට සහභාගී වෙමින් 22 ඉරිදා ඇමැති කබීර් හෂීම් මේ බව කියා සිටියේය.
රටේ ජාතික සමගිය හා සංහිඳියාව පවත්වාගෙන යාමට සහායවීම මාධ්‍යවේදීන්ට විශේෂ වගකීමක් පැවරී තිබෙන බවයි අමාත්‍යවරයා පෙන්වා දෙන්නේ.
“පසුගිය කාලයේ ඉස්ලාම් භක්තිකයන්ට අභියෝග රාශියක් ඒල්ලවුණා. ජාත්‍යන්තරයේ ඉස්ලාම් ධර්මයට විරුද්ධව කුමන්ත්‍රණ රාශියක් පැවති බව ඔබලා දන්නවා. ඒ ජාත්‍යන්තර කුමන්ත්‍රණකාරි බලවේග අපේ රටේ සිංහල ප්‍රජාවත් මුස්ලිම් ප්‍රජාවත් අතර ප්‍රශ්න ඇති කිරීමට උත්සාහ කරනවා.”
“මේ රටේ සමහර දේශපාලන බලවේග මේවා දේශපාලන අවියක් හැටියට පාවිච්චි කරන්න බලනවා. ඒත් අප මතක තබාගත යුතුයි සිංහල රජකාලයේ සිට සිංහල ප්‍රජාව සහ මුස්ලිම් ප්‍රජාව අතර තිබූ බැඳීම . ඒ බැඳීම කඩන එක ලේසි නැහැ. අප එයට ඉඩ දෙන්නෙත් නැහැ.” යි අමාත්‍ය කබීර් හෂිම් ප්‍රකාශ කළේය.
ජාතීන් අතර පවතින සමගිය තහවුරු වු විට රට සංවර්ධනය වන බව පෙන්වා දුන් ඇමැතිවරයා ජාතින් අතර සමගිය ගොඩනගන්නේ නැතිව රටක් විධියට ඉදිරියට යා නොහැකි බව ද කියා සිටියේය.
මාධ්‍ය ක්ෂේත්‍රයේ දීර්ඝ කාලයක් සේවය කොට ඇති මාධ්‍යවේදීන් දස දෙනෙකුට සම්මාන පිරිනැමීමද මෙහිදී ඇමැති කබීර් හෂීම් විසින් සිදු කරන ලදි.
විදේශ තානාපතිවරු, ඇමතිවරු ඇතුළු ආරාධිත අමුත්තන් සහ මාධ්‍යවේදීන් විශාල පිරිසක්ද මෙම අවස්ථාවට පැමිණ සිටියහ.
Facebook Comments
