බලය බෙදීම නීතිගත කොට ඇති දහ තුන් වැනි ව්‍යවස්ථා සංශෝධනයෙන් බැහැර වන කිසිදු ලියැවිල්ලකට එකඟ නොවන බව කඳුකරයේ දෙමළ දේශපාලන පක්‍ෂයක් අවධාරණය කර තිබේ.
“13 වැනි ව්‍යවස්ථා සංශෝධනය මුළු මනින්ම ක්‍රියාත්මක කරන ලෙස ඉල්ලා කෙරෙන ලියවිල්ලකට මිසක්, ඉන් බැහැර වන කිසිදු ලියවිල්ලකට තම පක්ෂය අත්සන් කරන්නේ නෑ,“යැයි ඊයේ [30] දිනයේ හැටන් නගරයේදී කදුරට මාධ්‍යවේදීන් හමුවූ කම්කරු ජාතික සංගමයේ නායක,පාර්ලිමේන්තු මන්ත්‍රී පලනි දිගම්බරන් පැවසීය.
දෙමළ බස කතා කරන දේශපාලන පක්‍ෂ එකතුව 13 වැනි ව්‍යවස්ථා සංශෝධනය මුළු මනින්ම ක්‍රියාත්මක කිරීමට ලංකා ආණ්ඩුවට බල කරන ලෙස ඉල්ලා ඉන්දීය අගමැති නරේන්ද්‍ර මෝඩි වෙත ඉදිරිපත් කිරීමට ඒකාබද්ධ ලියවිල්ලක් සකස් කොට තිබේ.
13 වැනි ව්‍යවස්ථා සංශෝධනය මුළු මනින්ම ක්‍රියාත්මක කිරීමේදී උතුරු නැගෙනහිර පළාත් ඒකාබද්ධ කිරීම ගැන ප්‍රශ්නයක් පැන නැගී ඇති අතර සමස්ත ලංකා ජනතා කොංග්‍රසයේ නායක,පාර්ලිමේන්තු මන්ත්‍රී රිෂාඩ් බදියුදීන් ඉල්ලා සිටින්නේ තම ස්ථාවරය ප්‍රකාශ කිරීමට යම් කාලයක් අවශ්‍ය බවය.
උතුරු නැගෙනහිර පළාත් ඒකාබද්ධ කිරීමට සඳහා දෙමළ දේශපාලන පක්‍ෂ කරන ඉල්ලීම සම්බන්ධයෙන් ශ්‍රී ලංකා නිදහස් පක්ෂය පවසා ඇත්තේ මුස්ලිම් දේශපාලන පක්‍ෂ ඊට සහයෝගය ලබා නොදිය යුතු බවයි.
යෝජිත ඒකාබද්ධ ලියවිල්ල සකස් කිරීමට පැවති මුල් සාකච්ජා වල සිටම එක්වූ ශ්‍රී ලංකා මුස්ලිම් කොංග්‍රස් නායක පාර්ලිමේන්තු මන්ත්‍රී රවුෆ් හකීම් ට සිය පක්‍ෂ අභ්‍යන්තරයෙන් එල්ල වෙන බලපෑම හේතුවෙන් මෙතෙක් ඊට අත්සන් තැබීම ගැටළුවක් වී ඇත.
දැනටමත් සකස් කර තිබෙන ඒකාබද්ධ ලියවිල්ල කිසිදු සංශෝධනයක් නොමැතිව ඉන්දීය අගමැතිවරයාට ලබා දිය යුතු බව දෙමළ ජාතික සන්ධානයේ නායක,පාර්ලිමේන්තු මන්ත්‍රී ආර්.සම්බන්ධන් කියා සිටියේ 28 වැනිදා ඔහුගේ කොළඹ නිවසේ පැවති පක්‍ෂ නායකයන්ගේ රැස්වීමේදීය.
ඒකාබද්ධ ලියවිල්ලට මුස්ලිම් කොංග්‍රසයේ එකඟතාව ලබා ගැනීමේ අවසන් වෑයම 31 වැනිදා සම්බන්ධන් හා හකීම් පක්‍ෂ නායකයන් අතර පැවැත්වීමට නියමිතය.
Facebook Comments
