ඇඳිරි නීතිය මැද්දේ දෙමළ මාධ්‍යවේදියකුට ගුටි බැට

කොරෝනා වෛරස් ව්‍යාප්තිය පාලනය සඳහා රට පුරා ඇඳිරි නීතිය ක්‍රියාත්මක කර තිබියදී උතුරේ මාධ්‍යවේදියකු ඇතුළු පිරිසකට පහර දී තිබේ.

මාර්තු 30 සඳුදා එලෙස පහර කෑමට ගොදුරු වී ඇත්තේ කිලිනොච්චියේ පදිංචි නඩරාසලිංගම් තුසාන්ත් නැමැති දෙමළ මාධ්‍යවේදියෙකි.

සිය නිවසේ පවත්වාගෙන යනු ලබන කාර්යාලයට මාර්තු 30 සදුදා පස්වරු 5.45 ට පමණ කඩා වැදුනු සිව් දෙනෙකුගෙන් යුත් පිරිසක් පහර දුන් බව නඩරාසලින්ගම් තුසාන්ත් උතුරේ මාධ්‍යවේදීන් සමග කියා තිබේ.

එම මොහොතේ තමා සමග සිටි තවත් මිතුරන් දෙදෙනකුටත් පොලු වලින් බැට දුන් නාදුනන පිරිස එම ස්ථානයේ තිබු වීදුරු බෝතලයක් කඩා තමාට පහරදුන් බව ඔහු වැඩි දුරටත් සඳහන් කර ඇත.

නඩරාසලින්ගම් තුසාන්ත් පවසන පරිදි එම පහරදීමෙන් ඔහුගේ එක් අතකට තුවාල සිදු වී ඇති අතර ඔහුගේ මිතුරන් දෙදෙනාට තැලුම් තුවාල සිදුවී තිබේ.

පහරකෑම සිදු වු දිනයේ හවස් කාලයේ දීම කිලිනොච්චි රෝහලට ගොස් තුවාල සදහා බෙහෙත් දමා ගත් අතර මාර්තු 31 අඟහරුවාදා දිනයේ දී කිලිනොච්චි පොලිස්ථානයේ පැමිනිල්ලක් සිදු කළ බව ඔහු සදහන් කරයි.

නාඳුනන පිරිස විසින් කළ පහරදීමෙන් ලැප්ටොප් පරිගණකය ඇතුළු කාර්යාලීය ආම්පන්න සහ ගෘහ උපකරණ වලටත් හානි සිදු වී ඇති බව ඔහු පොලීසියට පැමිනිලි කර තිබේ. කිසිවකු අත් අඩංගුවට ගත් බවක් දැනගන්නට නැත.

රටේ බොහෝ පළාත් වලට මෙන් මාර්තු 30 හවස 2ට කිලිනොච්චියට පනවා තිබූ ඇඳිරි නීතිය ඉවත් කරන ලද්දේ අප්‍රේල් 1 උදේ 6ටය.