ගෙදර යැවූ වෙළෙඳ කලාප සේවක සේවිකාවන්ට සමිති මැදිහත් වීමෙන් වැටුප්

0
Ivory Agency Sri Lanka
wedding people

කොරෝනා වෛරස් ව්‍යාප්තිය පාලනය කිරීමේ වැඩ පිළිවෙල යටතේ නිවෙස් බලා ගොස් සිටින නිදහස් වෙළද කලාප සේවක සේවිකාවන් දහස් ගණනක මාර්තු මස වැටුප ඔවුන් සේවය කළ ආයතන මගින් ගෙවිය යුතු බවට තීරණය වුයේ වෘත්තීය සමිති මැදිහත්වී කළ සාකච්ඡාවක ප්‍රතිළුලයක් ලෙස බව නිදහස් වෙළද කලාපයේ සේවකයන්ගේ අයිතීන් වෙනුවෙන් පෙනී සිටින ප්‍රධාන වෘත්තිය සමිතියක් සඳහන් කරයි.

නිදහස් වෙළද කලාප සහ පොදු සේවා සේවක සංගමය පවසන්නේ කම්කරු අමාත්‍ය දිනේෂ් ගුණවර්ධන සමග වෘත්තිය සමිති සහ හාම්පුතුන්ගේ නියෝජිතයන් පැවැත්වු සාකච්ඡා වට දෙකක් මගින් මෙම තීරණයට එළඹි බවයි.

මාර්තු මස 17, සහ 20 යන දෙදින තුළ එම සාකච්ඡා පවත්වා ඇත.

රට මුහුණ දී සිටින වෛරස් ආපදාව හමුවේ නිවෙස් බලා යන සේවකයන්ට මාර්තු මාසයේ වැටුප ගෙවීමටත් ඔවුන් නිවස් තුළ ගත කරන දින සේවකයන්ගේ වාර්ෂික නිවාඩු වලින් කපා නොහැරීමටත් එහිදී ඒකමතිකව තීරණය වු බව නිදහස් වෙළද කලාප සහ පොදු සේවා සේවක සංගමයේ සභාපති ඇන්ටන් මාර්කස් මාධ්‍යවේදීන් සමග පවසා සිටියේය.

වැටුප බැංකු ගිණුම් වලට

ඒ අනුව නිදහස් වෙළද කළාප සේවක සේවිකාවන්ගේ මාර්තු මස වැටුප ඔවුන්ගේ බැංකු ගිනුම් වෙත යොමු කරන ලෙස දන්වමින් කම්කරු කොමසාරිස් ජනරාල් වරයා විසින් ආයතන ප්‍රධානීන්ට මේ වන විටත් ලිඛිතව දන්වා ඇති බවට වෘත්තිය සමිති විශ්වාසය පළ කළේය.

සේවකයන්ගේ වැටුප් ගෙවීම සම්බන්ධයෙන් විමසීම සදහා ලංකා සේව්‍ය සම්මේලයේ අධ්‍යක්ෂ ජනරාල් කනිෂ්ක වීරසිංහ සම්බන්ධකරගැනීමට අද දවසේ දැරු උත්සාහය සාර්ථක වුයේ නැත.

නිදහස් වෙළද කලාප සේවකයන්ගේ වැටුප් ගෙවීම කඩිනම් කිරීමට මැදිහත් වන ලෙස මාර්තු 29 ඉරිදා දිනයේ ආයෝජන ප්‍රවර්ධන අමාත්‍ය ප්‍රසන්න රණතුංගගෙන්ද ඉල්ලීමක් කළ බව ඇන්ටන් මාර්කස් වැඩි දුරටත් සදහන් කළේය.

නිදහස් වෙළද කළාප සේවක සේවිකාවන්ගේ මාර්තු මස වැටුප ලබා දෙන්නැයි කාර්මික අපනයන, ආයෝජන ප්‍රවර්ධන සංචාරක හා ගුවන්සේවා අමාත්‍ය ප්‍රසන්න රණතුංග අදාළ අංශ වලින් ඉල්ලීමක් කර තිබු බව රජයේ ප්‍රවෘත්ති දෙපාර්තමේන්තුව එයින් දෙදිනකට පසු තහවුරු කර තිබුනි.

රජයේ සංඛ්‍යා ලේඛන අනුව දිවයින පුරා නිදහස් වෙළද කළාප 14ක කර්මාන්ත ශාලා 278 ක සේවක සේවිකාවෝ 1,37,478 ක් සේවය කරති.

අත්‍යාවශ්‍ය සේවා පමණයි

අත්‍යාවශ්‍ය සේවා පවත්වාගෙන යනු ලබන කර්මාන්ත ශාලා හැර නිදහස් වෙළද කලාප වල සෙසු කර්මාන්ත ශාලා මේ වන විට තාවකාලිකව වසා දමා තිබේ.

ඇදිරි නීතිය හේතුවෙන් සිය නවාතැන් පොලවල් වලට සීමා වී සිටි වසා දැමුණු කර්මාන්ත ශාලාවල සේවක සේවිකාවෝ රජයේ මැදිහත් වීමෙන් පසුගිය දිනවලදී ඔවුන්ගේ ගම් බිම් වලට පිටත් කර තිබුනේ ඔවුන්ගේ මාසික වේතනය ගෙවීමකින් තොරවය.

රජයේ ප්‍රවෘත්ති දෙපාර්තමේන්තුව පවසන පරිදි ආයෝජන මණ්ඩල වාර්තා අනුව පසුගිය දින කීපය තුල කටුනායක 5144 ක්, බියගම 3264ක්, මීරිගම, වතුපිටිවල හා මල්වත්ත කලාපයේ 450ක් , හොරණ 962 හා සීතාවක 280 දෙනෙකු ලෙස ගම්බිම් බලා පිටත් කර හැර තිබේ.

මේ වන විටත් නිදහස් වෙළද කලාපය තුළ අත්‍යාවශ්‍ය සේවා පවත්වාගෙන යනු ලබන කර්මාන්ත ශාලා කිහිපයක් ක්‍රියාත්මක වන බව තහවුරු කරන නිදහස් වෙළද කලාප සහ පොදු සේවා සේවක සංගමයේ සභාපති ඇන්ටන් මාර්කස් මාධ්‍ය වේදීන් සමග පවසා ඇත්තේ කම්කරු දෙපාර්තමේන්තුව විසින් ලබා දුන් නිසි සෞඛ්‍යාරක්ෂිත උපදෙස් මාලාවකට යටත්ව එම සේවාවන් පවත්වාගෙන යනු ලබන බවයි.

එම සේවාවන් සිදු කරන ආයතන තුළ සේවකයන්ගෙන් සමන්විත සෞඛ්‍ය කමිටුවක් පත් කළ යුතු අතර ආයතනයේ පාලනාධිකාරියේ තමන්ට සපයන පහසුකම් සම්බන්ධයෙන් සැහීමකට පත් විය නොහැකිනම් තම සේවය නතර කිරීමේ හැකියාව පවතින බව වෘත්තිය සමිති නායකයා තව දුරටත් අවධාරණය කළේය.

Facebook Comments