සිංහල බෞද්ධ භික්ෂු බලපෑමට යට නොවන ලෙස ජනපතිට ඉල්ලීමක්

කුරුන්තුර්මලේ සහ තිරියාය පුරාවිද්‍යා බිම් අවට ජනතාවගේ ඉඩම් පවරා දීම සිංහල බෞද්ධ භික්ෂුන්ගේ බලපෑමට යටත්ව වෙනස් නොකරන මෙන් උතුරු නැගෙනහිර දෙමළ නායකයෝ ජනාධිපති ගෙන් ඉල්ලා සිටිති.

දෙමළ දේශපාලන නායකයන් කියා සිටින්නේ සිංහල බෞද්ධ භික්ෂුන්ගේ බලපෑමට යටත්ව මෙසේ තීන්දු තීරණ වෙනස් කිරීමෙන් ඉතිහාසය පුරාම සිදුවුයේ දෙමළ ජනයා දිගින් දිගටම රැවටීම බවයි.

“අපි ජනාධිපති හමුවී කුරුන්තුර්මලේ, තිහාරිය පුරාවිද්‍යා බිම් අවට පොදු ජනයාට අයත් ඉඩම් නිදහස් කිරීම‍ට නියෝග නිකුත් කෙරුනා. ඒත් දැන් ඒ තීන්දුවට මොකද වෙලා තියෙන්නේ,” යි ජනාධිපති රනිල් වික්‍රමසිංහගෙන් ප්‍රශ්න කරන බව ඉලංගෙයි තමිල් අරසු කච්චි නායක මාවෙයි සේනාධිරාජා පවසයි.

සති අන්ත වීරකේසරී පුවත් පතට අදහස් දක්වමින් දෙමළ ජාතික මහජන සන්ධානයේ නායක සී.වී. විග්නේශ්වරන් චෝදනා කර සිටියේ බලහත්කාරයෙන් අත්පත් කරගත් පොදු ජනයාට අයත් ඉඩම් ජනාධිපතිවරයා විසින් නිදහස් කිරීමට ක්‍රියා කරද්දී පුරාවිද්‍යා චක්‍රවර්ති නාමධාරී එල්ලාවල මේධානන්ද භික්ෂුව සිංහල ජනතාව උසිගන්වන බවයි.

“එල්ලාවල මේධානන්ද හාමුදුරුවෝ ඇතුළු පිරිස රටේ ඉතිහාසය හොඳින් දැන ගන්න ඕනේ. ක්‍රිස්තු වර්ෂ හයවෙනි සියවසේ ඉඳන් තමයි සිංහල භාෂාව ඇවිත් තියෙන්නේ කියාලා ඒ අය වටහා ගන්න ඕනේ. ඒ ගොල්ලොන්ට ඉතිහාසය තිත්ත වෙලා. මෙහෙ දෙමළ ජනයා හිටියා කියලා පිළිගන්න ඒගොල්ලෝ සුදානම් නැහැ. දෙමළ ජනතාව ප්‍රදේශයෙන් ඉවත් කරලා ඒවා අත්පත් කරගෙන එයාලට ඕනේ විදිහට ඉතිහාසය වෙනස් කරනවා. මේක ආක්‍රමණයක්. ”

හමුදාව යොදා ගෙන උතුරු නැගෙනහිර පළාත් වල සිංහල බෞද්ධ විහාර 1000 ක් ඉදි කිරීමේ සැලසුම් නවතා දැමීමට ජනාධිපති රනිල් වික්‍රමසිංහ පියවර නොගත් බව පෙන්වා දෙන ඊළාම් ජනතා විප්ලවකාරී විමුක්ති පෙරමුණේ නායක සුරේෂ් ප්‍රේමචන්ද්‍රන් පවසන්නේ අධිකරණයේ තහනම් නියෝග ද නොතකා මුලතිව් දිස්ත්‍රික්කයේ, තන්නිමුරිප්පු ග්‍රාම නිලධාරි කොට්ඨාශයේ පිහිටි කුරුන්තුර්මලේ හි අලුතින් බෞද්ධ විහාරයක් ඉදිකළ බවයි.

“දෙමළ බෞද්ධයන් ජීවත්වුණු බවට සාක්ෂි තිබෙන කුරුන්තුර්මලේ 1933 නිකුත් කරපු ගැසට් නිවේදනයේ දැක්වෙන්නේ ඊට ඉඩම් අක්කර 78 ක් අයිතියි කියල. දැන් කරන්න හදන්නේ එහි සිටින ජනතාව පිටමං කරලා තවත් ඉඩම් අක්කර 300 කට ආසන්න ප්‍රමාණයක් බෞද්ධ විහාරයට පවරා ගන්න.” යැයි EPRLF නායක සුරේෂ් ප්‍රේමචන්ද්‍රන් පෙන්වා දෙයි.

පුරාවිද්‍යා දෙපාර්තමේන්තුව ඉඩම් අත්පත් කරගැනීමට දරන වෙහෙස නිසා ඉඩම්ද, ජීවිකාවද, පුජා භූමි ද අහිමි වීමේ අවදානමට මුහුණදී සිටින ජනතාවගේ පාරම්පරික වාසභූමි පිහිටි කුරුන්තුර් සහ තිරියාය ඉතිහාසය සම්බන්ධයෙන් ජනාධිපතිවරයාගේ සමච්චලයට ලක් වී දින කිහිපයක් ගතවූ තැන පුරාවිද්‍යා කොමසාරිස් ධුරයෙන් ඉල්ලා අස්වූ මහාචාර්ය අනුර මනතුංග 2023 මාර්තු 13 වැනිදා මුහුදුබඩපත්තු ප්‍රාදේශීය ලේකම්ගෙන් ලිඛිතව ඉල්ලා තිබුනේ තන්නිමුරිප්පු ග්‍රාම නිලධාරි වසමේ තවත් අක්කර 229 ක් පුරාවිද්‍යා රක්ෂිතයක් ලෙස අලුතින් නම් කිරීම සඳහා මැනීමට පියවර ගන්නා ලෙසයි.

ලිබරල් මූණ

තමිල් ඊළාම් ජනතා විමුක්ති සංවිධානයේ නායක ධර්මලිංගම් සිද්ධාර්ථන් අවධාරණය කරන්නේ `ජාතික ප්‍රශ්නය මේ වන විට ආගමික අර්බුදයක්` වී ඇති බවයි.

“ජනාධිපති රනිල්ට ලිබරල් මුහුණක් තිබුනත්, එයා ඉන්නේ සිංහල බෞද්ධ බහුතරයේ සහයෙන්. ඒ නිසා එයාගේ මැතිවරණ දේශපාලනයට බහුතරයේ නායකයන්ගේ මතයට වැඩ කරන්න ඕනේ. ඒත් ජනාධිපති රනිල් වික්‍රමසිංහ වටහා ගන්න ඕනේ දෙමළ හෝ හින්දු අය බුද්ධාගමට විරුද්ධ නැහැයි කියන එක.”

ජනාධිපති වරයා විසින් දෙමළ ජනතාවට ලබා දුන් පොරොන්දු ඔහු විසින්ම බිඳ දමමින් සිටින බවට සති අන්ත වීරකේසරී පුවත් පතට අදහස් දක්වමින් තමිල් ඊළාම් විමුක්ති සංවිධානයේ නායකයා පවසයි.

TELO නායක සෙල්වම් අඩයික්කලනාදන් සහතික කර සිටින්නේ පුරාවිද්‍යා දෙපාර්තමේන්තුව මගින් අත්පත් කරගත් කුරුන්තුර්මලේ ඉඩම් අක්කර 229 ක් නිදහස් කරන්නට වවුනියා දිසා සංවර්ධන කමිටු රැස්වීමේදී තීරණය කළ බවයි.

“මේ තීන්දු ගත්තු දිස්ත්‍රික් සංවර්ධන රැස්වීමට ජනාධිපතිවරයාද එක්ව සිටියා. අපිත් එක්ක පත්වපු රැස්වීමේදීත් ජනාධිපතිවරයා මේ පොරොන්දු ලබා දුන්න. ඒත් තමන්ම දීපු පොරොන්දු ජනාධිපතිම අත්හරින්න වෑයම් කිරීම අපි හෙළා දකිනවා.”

කුරුන්තුර්මලේ පුරාවිද්‍යා බිම නිරීක්ෂණයට යයි පවසමින් මේ අතර පිවිතුරු හෙළ උරුමය පක්ෂයේ නායක උදය ගම්මන්පිල ඇතුළු පාර්ලිමේන්තු මන්ත්‍රී කණ්ඩායමක් පැමිණීමෙන් දෙමළ ජනයා බියට පත්කළ නොහැකි බවද උතුරු නැගෙනහිර දේශපාලඥයෝ පවසති.

උදය ගම්මන්පිල ඇතුළු මන්ත්‍රී කණ්ඩායම ජුනි 21 වැනිදා කුරුන්තුර්මලේ කරා පැමිණීමට නියමිතයි.