වන්නි ප්‍රදේශයේ ගම්මාන කිහිපයකටම ජලය ලබාදෙන පෞරාණික නටබුන් සහිත රජයේ කැලෑ ඉඩම් අක්කර සියයකට ආසන්න ප්‍රමාණයක් ගිණි තබා විනාශකර ඇති අයුරු පරිසරවේදීන් විසින් අනාවරණය කර දිනක් ගත වන්නටත් මත්තෙන් ඉතිරි කැලෑ ඉඩම් නැවත නැවතත් ගිනි බත් කර තිබේ.
පරිසර හා සොබාදහම් අධ්‍යයන මධ්‍යස්ථානය පෙන්වා දෙන්නේ වව්නියාව, මාමඩුව කන්ද රජයේ කැලෑ ඉඩම් ඔක්තෝබර් 16 හා 17 යන දෙදින තුළ තෙවන වරටත් ගිනි තබා විනාශ කර ඇති බවයි.
ප්‍රදේශයේ ගල් කොරි කිහිපයක් ආරම්භ කිරීමටත්, බඩ ඉරිඟු ඇතුලු කාසි බෝග වගා කිරීම සදහාත් වව්නියාව, මාමඩුව කන්ද කැලෑ ප්‍රදේශයේ අක්කර 98 ක් ගිනි තබා විනාශ කර ඇති අයුරු ඔක්තෝබර් 15 බ්‍රහස්පතින්දා පරිසර හා සොබාදහම් අධ්‍යයන මධ්‍යස්ථානය හෙළි කර තිබුනි.
වනාන්තරයට ගිණිතැබිම සම්බන්ධයෙන් මධ්‍යය විසින් කරන ලද අනාවරණයත් සමග වව්නියාවේ පොලිසිය හා වන සංරක්ෂණ දෙපාර්තමේන්තුවේ නිලධාරින් එම ප්‍රදේශයේ නිරික්ෂණ චාරිකාවක් ඔක්තෝබර් 16 වන දින සිදුකල තිබෙන අතර එදින සවසම මාමඩුව වනාන්තරයේ තවත් අක්කර හයකට පමණ ගිනි තබා විනාශ කර ඇති බව පරිසර හා සොබාදහම් අධ්‍යයන මධ්‍යස්ථානයේ ජාතික සම්බන්ධීකාරක රවීන්ද්‍ර කාරියවසම් පෙන්වා දෙයි.
මේ අනුව පසුගිය සති දෙකක කාලය තුළ මාමාඩුව වනානත්රයේ අක්කර එකසිය අටක් ඉක්මවු භුමියක් ගිනි තබා විනාශ කර ඇති අතර රජයේ වුවමනාව මත මෙය සිදු වන බවට ගම්වාසීන් සැක පළ කරන බවයි පරිසරවේදියා වැඩි දුරටත් පෙන්වා දෙන්නේ.
රමණිය කන්දක් සේ දිස්වු මෙම රජයේ කැලෑ ඉඩම හා පුරා විද්‍යා ස්ථානය වව්නියාවේ සිට මඩු කන්ද බලා යන මාර්ගයේදි ඉතා හොදින් දැකගැනීමට හැකියාව තිබුනි.
යුද්ධය පැවති සමයේ පවා ඉතා හොදින් ආරක්ෂා වී තිබු මාමඩුව කන්ද ප්‍රදේශයේ වනාන්තර යුද්ධය අවසන් වී වසර ගණනක් යන්නට මත්තෙන් වනාන්තර ඉවත් කර ගල් කොරි පවත්වාගන යාමට අවසර ලබා දි තිබු බව පරිසර හා සොබාදහම් අධ්‍යයන මධ්‍යස්ථානයේ ජාතික සම්බන්ධීකාරක රවීන්ද්‍ර කාරියවසම් පෙන්වා දෙයි.
කැලෑ නාශකයන් නිදැල්ලේ
එයින්ද නොනැවති අද වන විට මෙම වනාන්තර ප්‍රදේශය කිසියමි පිරිසක් විසින් දිගින් දිගටම ගිණි තබා විනාශ කරන බව පෙන්වා දෙන පරිසරවේදියා චෝදනා කරන්නේ එම විනාශයට සම්බන්ධ කිසිවෙකුත් අත්අඩංගුවට ගැනීමට කිසිදු බලධාරියෙක් මේ වන තෙක් කටයුතු කර නොමැති බවයි.
පරිසරවේදියා පෙන්වා දෙන පරිදි ගිනි තබා විනාශ කර ඇති කැලෑ ප්‍රදේශය හයවන සියවසයේ ඉදිකල මාමාඩුව පුරාණ වැවේ ප්‍රධාන ජලපෝෂක ප්‍රදේශයයි.
“එළාර රජසමය, දුටුගැමුණු රජ සමය, අග්බෝ රජසමය ආදි පුරාණ රජ්‍ය යුගයන්ට අයත් නටබුන් බහුතරයක් මාමඩුව කන්ද ආශ්‍රිතව හා මාමඩුව වැව ආශ්‍රිත ප්‍රදේශයේ හමුවන අතර එම නිසාම මෙම ප්‍රදේශය පුරාවිද්‍යාත්මක වටිනාකමින්ද යුක්ත ආරක්ෂා කළ යුතු ප්‍රදේශයකි,”යි පරිසර හා සොබාදහම් අධ්‍යයන මධ්‍යස්ථානය නිකුත් කළ නිවේදනයක සදහන්ය.
එම පරිසර සංවිධානය පෙන්වා දෙන පරිදි මහකච්චක්කුඩිය, ඇටඹගස් වැව, අග්බෝපුර, විමගල්ල ඇතුලු ප්‍රදේශයේ ගම්මානවල ප්‍රධාන ජල පෝෂක ප්‍රදේශය ලෙස ක්‍රියාත්මක වන්නේ මාමාඩුව කන්ද මහ කැලෑ ප්‍රදේශයයි.
වත්මන් රජය බලයට පැමිණීමෙන් පසු සිදුකෙරෙන පරිසර හානිය පිලිබඳව මාධ්‍ය විසින් කරන හෙළිදරව් ජනාධිපති වරයා විසින් පසුගියදා ප්‍රතික්ෂේප කර තිබුනේ “අසත්‍ය ප්‍රවෘත්ති ප්‍රබන්ධ කොට සමාජගත කිරීමේ මෙහෙයුමක්” ලෙස හුවා දක්වමිනි.
කෙසේ වෙතත්, වන විනාශය සැබවින්ම සිදුවන්නක් බව පිළිගනිමින් ආරක්ෂක ලේකම් මේජර් ජෙනරාල් කමල් ගුණරත්න පසුගියදා කියා සිටියේ ජනාධිපති සොයුරු චමල් රාජපක්ෂ ආරක්ෂක රාජ්‍ය අමාත්‍යවරයාද සමග එක්ව ඊට විරුද්ධව පියවර ගන්නා බවයි.
පරිසර හානිය පිළිබද පුවත් ජනමාධ්‍ය අවුළුවද්දී, පරිසර හානි පිළිබදව දැනුම් දීම සදහා පරිසර අමාත්‍ය මහින්ද අමරවීර දුරකථන අංක හතරක් පසුගියදා හදුන්වා දී තිබුනි.
පරිසර අමාත්‍යාංශයේ 1991, මධ්‍යම පරිසර අධිකාරියේ 1981, භූ විද්‍යා සමීක්ෂණ හා පතල් කාර්යාංශයේ 1921 දුරකථන අංකයත්, අමාත්‍යවරයාගේ පුද්ගලික දුරකථනය වන 0707-555666 අංකයට වට්ස්අප් පණවිඩයක්, කෙටි පණිවිඩයක් හෝ විඩියෝ හෝ එවන ලෙසත් පරිසර අමාත්‍යවරයා මහජනතාවගෙන් වැඩි දුරටත් ඉල්ලා තිබේ.
Facebook Comments
