සංවර්ධන කටයුතු කිහිපයක් ජනතා අයිතියට පත් කිරීමට හා නව සංවර්ධන කටයුතු ආරම්භ කිරිමට එජාප පසුපෙල ප්‍රබලයෙකුගේ ආරාධනයෙන් අමාත්‍ය සජිත් ප්‍රේමදාස පුත්තලමට පැමිණිමට නියමිතව තිබේ.
පුත්තලම් දිස්ත්‍රික් සංවර්ධන කමිටු සභාපති හෙක්ටර් අප්පුහාමී මන්ත්‍රිවරයාගේ මැදිහත් වීම මත සිදු කරනු ලබන සංවර්ධනය කටයුතු ජනතාව වෙත බාර කිරීමට අමාත්‍යවරයා 06 සිකුරාදා පුත්තලමට පැමිණෙනු ඇත.
සිසු දහම් සෙවණ වැඩසටහන යටතේ ලබා ගන්නා ලද ප්‍රතිපාදන හරහා අප්පුහාමී මන්ත්‍රීවරයා විසින් මෙම සංවර්ධන වැඩ කටයුතු සිදු කර තිබේ.
බෞද්ධ, කතෝලික, මුස්ලිම් හා හින්දු ආගමික ස්ථාන සංවර්ධනය කිරීමට නිවාස ඉදිරිකිරිම් හා සංස්කෘතික කටයුතු අමාත්‍යංශය විසින් මෙම ප්‍රතිපාදන වෙන් කර ඇත.
තම ආරාධනාව මත පුත්තලමට පැමිණෙන අමාත්‍ය සජිත් ප්‍රේමදාස බෞද්ධ, කතෝලික, මුස්ලිම් හා හින්දු ආගමික ස්ථාන කිහිපයක සිදු කරන ලද සංවර්ධන වැඩ කටයුතු ජනතා අයිතියට පත් කරන බවයි හෙක්ටර් අප්පුහාමී මන්ත්‍රීවරයා පවසන්නේ.
“පුත්තලම කියන්නේ බහු ආගමික, බහු වාර්ගික දිස්ත්‍රික්කයක් ඒ සියලුම දෙනාගේ හයිය සජිත් ඇමැතිතුමා ජනපති කරන්න ලබා දෙන වැඩ සටහනේ ආරම්භය තමයි පුත්තලමෙන් පටන් ගන්නනේ.” යැයි අප්පුහාමී මන්ත්‍රීවරයා කියා සිටියේය.
පුත්තලම ආසනය මෙන්ම තම දිස්ත්‍රික්කය ද එක්සත් ජාතික පක්ෂයේ ජයග්‍රහණය වෙනුවෙන් කැප වු ප්‍රදේශයක් බව කී හෙක්ටර් අප්පුහාමී මන්ත්‍රීවරයා සජිත් ප්‍රේමදාස ඇමැතිවරයා ජනපති කරවීමට අති වීශාල සහායක් තම දිස්ත්‍රික්කයෙන් ලැබෙනු ඇති බවට විශ්වාසය පළ කළේය.
Facebook Comments
