ඉදිරි ජනාධිපතිවරණයේ දී සහය ලබාදෙන්නේ කුමන පාර්ශවයට ද යන්න මෙතෙක් තීන්දු කර නොමැති බව දෙමළ ජාතික සන්ධානය පවසනවා.
ජනාධිපතිවරණයට ඉදිරිපත් වන සියලු අපේක්ෂකයින්ගේ ප්‍රතිපත්ති ප්‍රකාශනයන් සලකා බලා සිය පක්ෂයේ තීරණය දැනුම් දෙන බව පාර්ලිමේන්තු මන්ත්‍රී එම්.ඒ සුමන්තිරන් එම තීරණය ගැනීමට කිසිඳු හදිසියක් නොමැති බව ද හින්දු පුවත්පතට පවසා තිබේ.
2015 වසරේ දී පොරොන්දු කිහිපයක් මත පදනම්ව පොදු අපේක්ෂකයා හට සහාය දුන් බව පවසන සුමන්තිරන් මන්ත්‍රීවරයා දෙමළ ජාතීන්ගේ ගැටලුවලට විසඳුම් ලබාගැනීමට අමතරව විධායක ජනාධිපති ධුරය අහෝසි කිරීම එම පොරොන්දු අතර ප්‍රධාන වු බවද සිහිපත් කර දී ඇත.
විධායක ජනාධිපති ධුරය අහෝසි කිරීම සඳහා 1994 වසරේ සිට ජනතාව විසින් පැහැදිලි තීන්දුවක් ලබා දී ඇති අතර ප්‍රධාන පක්ෂ දෙකද ඒ සඳහා එකඟතාව පළ කිරීම හේතුවෙන් මෙම අවස්ථාවේ විධායක ජනාධිපති ධුරය අහෝසි කිරීම අනිවාර්යෙන්ම සිදුවනු ඇති බවට සිය පක්ෂය අවංකවම විශ්වාසය පළ කළ ද එය මෙතෙක් සිදු නොවීම ගැන හෙතෙම සිය කනස්සල්ල පළ කර තිබේ.
ඉදිරි ජනපතිවරණය සඳහා නම් කරන අපේක්ෂකයින් හා ඔවුන්ගේ ප්‍රතිපත්ති ප්‍රකාශනයන් පිළිබඳ සාකච්ඡා පැවැත්වීමෙන් අනතුරුව සහය ලබාදෙන කණ්ඩායම සම්බන්ධයෙන් දෙමළ ජාතික සන්ධානය තීරණයක් ගන්නා බවයි පාර්ලිමේන්තු මන්ත්‍රී එම්.ඒ සුමන්තිරන් වැඩි දුරටත් පවසා ඇත්තේ.
Facebook Comments
