පෞද්ගලික රෝහල් නියාමනය කිරීමේ සැලසුම් සහිත වාර්තාව ඉදිරි මාස 02 තුළ සකස් කර අවසන් කරන ලෙස සෞඛ්‍ය, පෝෂණ හා දේශීය වෛද්‍ය අමාත්‍ය, වෛද්‍ය රාජිත සේනාරත්න පෞද්ගලික රෝහල් අධ්‍යක්ෂිකා වෛද්‍ය කාන්ති ආරියරත්න මහත්මියට උපදෙස් ලබා දී ඇත.
ජාත්‍යන්තර සමාගමක් වන කේ.පී.එම්.ජී ආයතනය විසින් එම වාර්තාව සකස් කරනු ලබන බව රජය පවසයි.
පෞද්ගලික රෝහල් නියාමනය කිරීමේ දී වෛද්‍ය පරික්ෂණ, ශල්‍යකර්ම, බාහිර රෝගී අංශයෙන් ප්‍රතිකාර ලබාගැනීම, ඖෂධ අළෙවිය ඇතුලු සෑම ක්ෂේත්‍රයක් ම නියාමනය කිරිමට බලාපොරොත්තු වන බව සෞඛ්‍ය අමාත්‍යවරයා ප්‍රකාශ කරයි.
සෞඛ්‍ය අමාත්‍යාංශයේ දී පසුගියදා පැවැති ආයතන ප්‍රධානීන්ගේ රැස්වීමේ දී සෞඛ්‍ය අමාත්‍යවරයා මේ බව ප්‍රකාශ කර ඇති අතර පෞද්ගලික රෝහල් පරීක්ෂා කිරීම සඳහා හදිසි වැටලීම් අංශයේ ඡ්‍යෙෂ්ඨ සහකාර ලේකම්, සහකාර ලේකම් සහ අනෙකුත් නිලධාරීන්ට අවශ්‍ය බලතල පැවරූ ගැසට් පත්‍රය ලබන සතියේ දී නිකුත් කරන බවද පෞද්ගලික රෝහල් අධ්‍යක්ෂිකා වෛද්‍ය කාන්ති ආරියරත්න මෙහිදී ප්‍රකාශ කරන ලදී.
මේ අතර අත්‍යාවශ්‍ය ඖෂධ වර්ග 48ක මිල අඩුවීමෙන් පසු දිවයින පුරා සියලු ම ෆාමසිවලින් ඖෂධ මිලදී ගන්නා පාරිභෝගික ජනතාවට බිල්පතක් නිකුත් කිරීමේ වැඩපිළිවෙළක් සකස් කිරීමට ද සෞඛ්‍ය අමාත්‍යවරයාගේ අවධානය යොමු වී ඇත.
ඒ සඳහා අවශ්‍ය නීති රෙගුලාසි සකස් කරන ලෙස ජාතික ඖෂධ නියාමන අධිකාරියේ ප්‍රධාන විධායක නිලධාරී වෛද්‍ය කමල් ජයසිංහ වෙත සෞඛ්‍ය අමාත්‍යවරයා උපදෙස් ලබා දී ඇති බව රජය පවසයි.
Facebook Comments
