මතුව තිබෙන අර්බුදකාරීතත්වයෙන් මිදී ප්‍රජාතන්ත්‍රවාදී පාලනයක් බිහි නොවුනහොත්,හමුදා පාලනයක් ඇති වීම අනිවාර්ය බවට දෙමළ දේශපාලන නායකයෙකු අනතුරු හඟවා තිබේ.
“වැඩිපුර මධ්‍යම පාන්තික තරුණ කොටස් ලොකු උනන්දුවකින් ආණ්ඩුවට විරුද්ධව උද්ඝෝෂණය කරනවා.ජනාධිපතිට හා අගමැතිට විරුද්ධව රාජපක්‍ෂ පවුල ඉලක්ක කරගෙන උද්ඝෝෂණය කළත් මේ සිංහල අයගේ හිතේ තියෙන දේ අපිට දැන ගන්න අමාරුයි.කොහොම නමුත් රටේ ස්ථිර ප්‍රජාතන්ත්‍රවාදී පාලනයක් වෙනුවෙන් ආණ්ඩුවක් රට බාර ගත්තේ නැත්නම් අනිවාර්යෙන්ම හමුදා පාලනයකට ඉඩ කඩ තියෙනවා,“යැයි දෙමළ ජනතා ජාතික සන්ධානයේ නායක,පාර්ලිමේන්තු මන්ත්‍රී සී.වී.විග්නේශ්වරන් පවසයි.
“තිනක්කුරල්“පුවත් පතට අදහස් දක්වමින් උතුරු පළාත් සභාවේ හිටපු මහ ඇමැතිවරයා පවසන්නේ උද්ඝෝෂණ හමුවේ රාජපක්ෂලා ඉවත් වුවද,ඊළඟ නායකත්වය කවුද යන්න සිංහල ජනයාට ගැටළුවක් බවයි.
“පාලන බලය අරගෙන රාජපක්ෂලා රටට කර තිබෙන විනාශය හා ඇති කර තිබෙන ආර්ථික අර්බුදය ගොඩ දාගන්න බැරි වුණොත් තමන්ගේ දේශපාලන ජීවිතය ද විනාශ වෙයි කියලා විරුද්ධ පක්ෂ බයයි.“
විග්නේශ්වරන් පෙන්වා දෙන පරිදි අන්තර් වාර පාලනයක් ඇති කළ යුත්තේ රාජපක්‍ෂ පවුලේ අයගෙන් තොරවයි. රාජපක්‍ෂලාට තනතුරු ලබා දුනහොත් ඒ මගින් ඔවුන් නැවත බලයට ඒමට මාර්ගය සකස් කර ගන්නා බව ද දෙමළ ජනතා ජාතික සන්ධාන නායකයා පවසයි.
“රාජපක්ෂලා මේ තනතුරු අත් හැරියොත් ඒ අයට විවිධ ප්‍රශ්න වලට මුහුණ දෙන්න වෙනවා.රටින් පිටවෙන්න බැරි විදිහට තමයි විරුද්ධ පක්ෂ කටයුතු යොදා තියෙන්නේ.“
රාජපක්ෂලා විසින් සිරගත කොට සිටී හිටපු හමුදාපති සරත් ෆොන්සේකා ඔවුන් ගෙන් පළිගැනීමට ඉඩකඩ ඇති බව ද විග්නේශවරන් අවධාරණය කරයි.
“කොහොම නමුත් රාජපක්‍ෂ ලාට ඔය තනතුරු දාලා යන්නම වෙනවා.ඒක අනිවාර්යයි.“
“කරපු වැරදි විඳවන්නම වෙනවා.“
Facebook Comments
