කෙටි කාලයක් තුල නාවික හමුදාවේ සෙබළුන් විශාල සංඛ්‍යාවක් කොරෝනාබාධිත වීමත් සමගම විශේෂඥ උපදෙස් නොතකා හැරීමේ අවදානම කොවිඩ් 19 සෞඛ්‍ය සටන් පෙරමුණ විසින් ආරක්ෂක අංශවල අවධානයට යොමු කර තිබේ.
අප්‍රේල් 27 සඳුදා වන විට නාවික හමුදාවේ ආසාදිතයන් 180 දෙනකු හඳුනාගෙන ඇති බව යුද හමුදාපති ශවේන්ද්‍ර සිල්වා පවසයි. එය ශ්‍රී ලංකාවේ එක් ආයතනයක් තුළ වාර්තා වූ කොරෝනා වෛරස් ආසාදිතයන් වැඩිම සංඛ්‍යාවයි.
ශ්‍රී ලංකාවේ කෝවිඩ් 19ට ගොදුරුවූ පිරිස අතරින් තුනෙන් පංගුවක්ම නාවිකයන් බව මෙසේ හෙළි වෙද්දී වසංගත ව්‍යාප්තිය පාලනය සදහා රජය විසින් ප්‍රමුඛ වගකීම් බාර දී තිබෙන ආරක්ෂක අංශ සාමාජිකයන්ට වෛරසය ආසාදනය වීමට හේතුව සෞඛ්‍ය විශේෂඥයන් ලබාදෙන උපදෙස් පිලි නොගැනීමදැයි මහජන සෞඛ්‍ය පරීක්ෂකවරු (PHI) ප්‍රශ්න කරති.
වසංගත මර්දනයේ සහ යුද්ධයේ වෙනස අවධාරණය කරන ශ්‍රී ලංකා මහජන සෞඛ්‍ය පරීක්ෂකවරුන්ගේ සංගමය විෂය දැනුම සහිත නිලධාරීන්ගේ යෝජනා සැලකිල්ලට ගැනීමේ වැදගත් කම සිහිපත් කර දෙයි.
“අප මේ සටන් කරමින් සිටින්නේ සැගවී පහර දෙන මොහොතකට හෝ දෘෂ්‍යමාන වන සතුරෙකු සමග නොව,අදෘෂ්‍යමාන සතුරෙකු සමග බව සැම විටම සිහියට නගා ගත යුතුය,” යි සංගමයේ සභාපති එම්.ජී.යු.රෝහණ අප්‍රේල් 27 නිකුත් කළ නිවේදනයකින් කියා සිටී.
“ඒ අනුව සිතා බලා මෙවැනි තත්ත්වයන් පාලනය කර දැණුම අත්දැකීම් කුසලතා ඇති නිළධාරීන්ගේ යෝජනාද සැලකිල්ලට ගන්නා මෙන්ද, ජාති ආගම් දේශපාලනමය කණ්නාඩිවලින් නොබලා පොදු සතුරා පරාජය කිරීමට වගකීම් සහගතව කටයුතු කිරීම මේ මොහොතේදී සියල්ලන්ම සිදු කල යුතු බවද කාරුණිකව සිහිපත් කිරීමට අදහස් කරමු.”
එහිදී සිය සංවිධානය විසින් හඳුනාගත් පහත සඳහන් විශේෂ අවස්ථා පිලිබඳ අවධානය යොමු කර තිබේදැයි PHI සංගමය ආරක්ෂක බලධාරීන්ගෙන් ප්‍රශ්න කර තිබේ.
•දැනට කදවුරු වෙත කැදවා ඇති සෙබලුන් සදහා පුද්ගලික දුරස්ථකරණය ආරක්ෂා කර ගනිමින් ගමන් ගැනීමට ප්‍රමාණවත් ප්‍රවාහන පහසුකම් සපයා තිබේද?
•නැතහොත් යලිත් එම කදවුරු තුලටම කුමන හෝ රථයක එල්ලී පැමිණිය හොත් හා ඒ අතර ආසාදිතයින් සිටිය හොත් අදාල රථයේ අය සහ කදවුර අවදානමක නොහෙලෙන්නේද?
•දැනට නිවෙස් තුල නීරෝධායනය කර ඇති පිරිස් දැනුවත්ව හෝ නොදැනුවත්ව පවුලේ සාමාජිකයන් සමග වාසය කර ඇති බැවින් එම ස්ථානයේම රදවා සිදු කරන ලද සාමූහික නීරෝධායන ක්‍රියාවලිය ඔවුන් ගිය පසු නතර වන්නේද? ඔවුන්ට සාමාන්‍ය සමාජයට එක් විය හැකිද?
•නීරෝධායන නියෝගයක් පනවා තිබියදී නීරෝධායනය කල අය වහාම සේවයට වාර්තා කරවීම තුලින් නීරෝධායන නීති කඩ කිරීමක් නොවන්නේද?
•දැනටමත් සාම්පල පරීක්ෂාවකින් ආසාදනය නොවූ බව තහවුරු වූ නිළධාරීන් නැවත සැක සහිත අය සමග එකතු වීමෙන් ඔවුන් නැවත අවදානමක නොහෙලෙන්නේද?
•යම් හෙයකින් නිවෙස් වල සිට කැදවන ලද අයෙකු ආසාදිත වුවහොත් ඔහුගේ සමීපතම ආශ්‍රිතයින් සියල්ල එලෙසින් කැදවා ගන්නේද?
•එබදු ආශ්‍රිතයින් සොයා බැලීමට සිදු වන්නේ කාහටද?
•දැනට පවතින පහසුකම් අනුව කොපමණ දින ගණනකදී රැගෙන යන පිරිස් පරීක්ෂාවට ලක් කල හැකි වන්නේද?
•දැනටමත් පළමු ආශ්‍රිතයින් විශාල ලෙස හමුවූ ගම්මාන ආසන්න දිනයක සිට සාමාන්‍ය සමාජයට විවර වීම ගැටලුවක් නොවන්නේද?
මෙම ක්‍රියාවලියේදී සිදුවිය හැකි සුළු හෝ අතපසුවීමකින් ගැටලු රැසක් මතුවිය හැකි බවද ඒ නිසා නිසි තාක්ෂණීක ක්‍රමවේද අනුගමනය අත්‍යවශ්‍ය බවද ශ්‍රී ලංකා මහජන සෞඛ්‍ය පරීක්ෂක වරුන්ගේ සංගමය සිය නිවේදනය මගින් අවධාරණය කර තිබේ.
රජයේ හෙද නිලධාරීන්ගේ සංගමයේ සහ ජාතික වෘත්තිය සමිති පෙරමුණේ සභාපති සමන් රත්නප්‍රිය ද මීට ඉහතදී පවසා තිබුනේ වසංගත මර්දනය සඳහා මෙහෙයුම් භාරකාරත්වය පවරා දී තිබෙන හමුදා අංශ වලට විෂයානුබද්ධ දැනුම හා පුහුණුව නොමැති වීම මෙවැනි ව්‍යසන වලට මග පාදන බවයි.
ලොක්කන් නොතකන ශික්ෂා
කොරෝනා රෝගාබාධිත වීමෙන් ගැලවීම සඳහා සෞඛ්‍ය විශේෂඥයන් ලබාදෙන උපදෙස් රටේ ඉහල බලධාරීන් පවා නොසලකා හරින බව ශ්‍රී ලංකාවේ මහජන සෞඛ්‍ය උන්නතිය පිළිබදව කටයුතු කරන ප්‍රමුඛතම වෘත්තිකයන්ගේ සංවිධානයක් විසින් පසුගියදා අනාවරණය කර තිබුනි.
සෞඛ්‍ය බලධාරීන් විසින් යෝජනා කර ඇති මාර්ගෝපදේශ “ඉහල මට්ටමේ පාර්ශවකරුවන්” මෙන්ම බිම් මට්ටමේ නිලධාරීන්ද අනුගමනය නොකරන විවිධ අවස්ථා වාර්තා වී ඇති බව ශ්‍රී ලංකා ප්‍රජා වෛද්‍ය විශේෂඥ වෛද්‍යවරුන්ගේ සංගමය (CCPSL)ද පෙන්වා දෙයි.
“දැනට යෝජනා කර ඇති නිර්දේශ ක්‍රියාත්මක කිරීමේදී ජාතික සහ පළාත් මට්ටමේ ගැටළු සහගත තත්වයන් අප නිරීක්ෂණය කර ඇත,” යි කෝවිඩ් 19 වසංගතය පාලනය කිරීම සඳහා යොදාගත හැකි ක්‍රමෝපාය පිලිබඳ යෝජනා රජයට ඉදිරිපත් කරමින් CCPSL විසින් නිවේදනය කර තිබේ.
නිවාඩු ගොස් සිටින ත්‍රිවිධ හමුදා නිලධාරීන් කදවුරු වෙත ගෙන්වා ගැනීම පහසු වන පරිදි අප්‍රේල් 27 සදුදා දින රට පුරා ඇදිරිනීතිය ක්‍රියාත්මක කිරීමට රජය කටයුතු කර තිබෙන අතර හමුදා කඳවුරුවල සෞඛ්‍ය සුරක්ෂිතතාව තහවුරු කිරීමට බස්නාහිර පළාත් ආණ්ඩුකාර මාර්ෂල් ඔෆ් ද එයාර් ෆෝස් රොෂාන් ගුණතිලකගේ ප්‍රධානත්වයෙන් විශේෂ ජනාධිපති කාර්ය සාධක බළකායක් පිහිටුවන ලදැයි ජනාධිපති මාධ්‍ය ඒකකය පවසයි.
Facebook Comments
