මුදලිගේ සහ සිරිධම්මගේ නිදහසට ජාත්‍යන්තර බලපෑම් ඉල්ලයි

ත්‍රස්ත විරෝධී නීති යටතේ සිරකොට සිටින ශිෂ්‍ය ක්‍රියාකාරීන් දෙදෙනාගේ දින අනුවේ රැඳවුම් කාලය සම්පුර්ණ වීමෙන් පසුව ඔවුන් තව දුරටත් රඳවා නොගන්නා ලෙස ලක් රජයට බලපෑම් කරන්නැයි මෙරට මානව හිමිකම් ක්‍රියාධරයන් පිරිසක් ජාත්‍යන්තර බලධාරීන්ගෙන් ඉල්ලා සිටි.

වසන්ත මුදලිගේ සහ ගල්වැව සිරිධම්ම හිමිගේ රැඳවුම් නියෝග අවසන් වන 2022 නොවැම්බර් 18 වන දින තෙක් නොසිට වහාම ඔවුන් නිදහස් කරන ලෙස ශ්‍රී ලංකා රජයට බලකිරීමට දක්වන සහය අගය කරන ශ්‍රී ලංකාවේ සිවිල් සමාජ ක්‍රියාකාරීන් කොළඹ සිටින විදේශිය තානාපතිවරුන් සහ මහ කොමසාරිස්වරුන්ගෙන් ඉල්ලා සිටින්නේ සාමකාමී විරෝධතාකරුවන්ට එරෙහි මර්දනය නැවැත්වීමටත්, ත්‍රස්තවාදය වැලැක්වීමේ පනත යටතේ රඳවාගෙන සිටින ශිෂ්‍ය නායකයන් කොන්දේසි විරහිතව නිදහස් කරන ලෙසටත් ශ්‍රී ලංකා රජය වෙත බලපෑම් කරන ලෙසයි.

සිවිල් සමාජ සංවිධාන, වෘත්තීය සමිති සහ මානව හිමිකම් ක්‍රියාකාරීන් 150 දෙනෙකුගේත් සංවිධාන 75 ත් නියෝජනයක් සහිතව තානාපති සහ මහ කොමසාරිස්වරුන් දස දෙනෙකු වෙත ලිපියක් යොමු කරමින් නොවැම්බර් 15 වැනි අඟහරුවාදා ඔවුන් එම ඉල්ලීම කර තිබේ.

හිටපු ජනාධිපතිවරයා, අග්‍රාමාත්‍යවරයා සහ මුදල් අමාත්‍යවරයාට සිය ධූරයන්ගෙන් ඉල්ලා අස්වීමට බලකළ මෑත කාලීන ජනතා නැගිටීම තුල තීරණාත්මක කාර්ය භාරයක් අන්තර් විශ්වවිද්‍යාලීය ශිෂ්‍ය බල මණ්ඩලය සමග වෘත්තිකයන් හා සිවිල් සමාජ කණ්ඩායම් විසින් ඉටු කළ බව සිහිපත්කරන එම ලිපියේ වැඩි දුරටත් පෙන්වා දී ඇත්තේ උද්ධමනය ඉහලයාම සහ උග්‍රවන ආර්ථීක අර්බුදය සමඟ භාණ්ඩ හා සේවා දරාගත නොහැකි ලෙස ඉහල යාම, අයහපත් ආණ්ඩුකරණය, දූෂණය සහ රාජ්‍ය වගවීමක් නොමැතිකම යන කාරණා සම්බන්ධයෙන් අඛණ්ඩ විරෝධතා ව්‍යාපාරයක් වෙත ජනතාව මේ වන විට අවතීර්ණ වී සිටින බවයි.

රනිල් ගේ ආර්ථික සැලසුමට ප්‍රසාදය

“එමෙන්ම රනිල් වික්‍රමසිංහ ජනාධිපති ධූරයට පත්වීමෙන් පසු තීව්‍ර කරන ලද රාජ්‍ය මර්දනය අවසන් කරන ලෙසටද ජනතාව බලකර සිටියි.”

විරෝධතාකරුවන්ට එරෙහි මර්දනය සහ රටේ මහජන අවකාශය සීමා කිරීම සම්බන්ධයෙන් තානාපති ප්‍රජාව, ප්‍රකාශනයේ නිදහස සම්බන්ධ එක්සත් ජාතීන්ගේ අධිකාරය හිමි යාන්ත්‍රණ, මානව හිමිකම් ක්‍රියාධරයන් සහ අන්තර්ජාතික මානව හිමිකම් සංවිධාන විසින් සිදුකරන අධීක්ෂණ හා මැදිහත්වීම් ද එම ලිපිය මගින් අගය කර ඇත.

ජාත්‍යන්තර ප්‍රජාවේ ඇතැම් පාර්ශවයන් රනිල් වික්‍රමසිංහ සහ වර්තමාන ආර්ථික අර්බුදය විසඳීම සඳහා වන ඔහුගේ සැලැස්ම සම්බන්ධයෙන් ධනාත්මක ආකල්පයක පසුවන බව මානව හිමිකම් ක්‍රියාධරයන්ගේ පිළිගැනීමයි. එහෙත්, මහජන විරෝධතා මර්දනයට සහ ජනතාවගේ ප්‍රකාශනයේ සහ රැස්වීමේ නිදහසට ඔහු විසින් ගනු ලබන පියවර කිසිසේත්ම අනුමත කළ නොහැකි බව විදේශීය දූත මණ්ඩල වෙත දෙනු ලබන සංදේශයේ අවධාරණය කර සිටි.

ආර්ථික, සමාජීය හා දේශපාලන අර්බුද සමයක සිය ජනතාවට එරෙහි රජයේ ක්‍රියාපිළිවෙත විසින් මීළඟ වසරේ සමාලෝචනයට නියමිත GSP+ සහනය කෙරෙහි බලපෑම් කිරීමට ඇති ඉඩ සම්බන්ධයෙන් ද සිවිල් සංවිධාන හා වෘත්තිය සමිති ක්‍රියාධරයන් අවධානය යොමු කර ඇත.

“වැරදි තොරතුරු, තොරතුරු විකෘති කිරීම් ඔස්සේ පුරවැසියන්ගේ විරෝධතාවන් ලේබල් කරමින් ඒවා අපරාධනීය බවට නාමකරණය කරමින් බොහෝවිට සිදුවීමට ඉඩ ඇති GSP+ සහනය අහිමිවීමේ වගකීම විරෝධතාකරුවන් හා සාමාන්‍ය පුරවැසියන් වෙත පැවරීමේ රජයේ උත්සාහය අනතුරුදායක වන අතර කිසිසේත්ම භාරගත යුත්තක් නොවේ. ආර්ථික අර්බුදයට මඟ පාදන ලද්දේ සිය මර්දනීය පිලිවෙත, අපරාධ මුක්තිය සහ දූෂණය බව රජය විසින් පිලිගෙන ඉන් බැහැර විය යුතුය.”

යුද්ධය අවසන් වී වසර 13 කට පසුවද තවදුරටත් ක්‍රියාවේ යොදවනු ලබන ත්‍රස්තවාදය වැලැක්වීමේ පනත සම්පූර්ණයෙන් අහෝසි කළ යුතු බව යළි යළිත් පෙන්වා දෙන සිවිල් සමාජය අවධාරණය කරන්නේ මෙම කුරිරු නීතිය ක්‍රියාවේ යොදවනු ලැබ ඇත්තේ ශ්‍රී ලංකාවේ ජනතාවගේ අයිතිවාසිකම් හා නිදහස උල්ලංඝනය කිරීමේ අරමුණින් බවයි.

“විශේෂයෙන් දෙමළ හා මුස්ලිම් සුළුතරයන් මර්දනයට සහ රජය සම්බන්ධයෙන් විවේචනාත්මක හඬ නැගීම් යටපත් කිරීමට එය යොදාගනු ලැබ ඇත. ත්‍රස්ත විමර්ශන අංශයට අනුව ත්‍රස්තවාදය වැලැක්වීමේ පනත යටතේ අද දක්වා 127 දෙනෙකු රැඳවුම් නියෝග යටතේ රඳවා තබාගන ඇති අතර තවත් 11 දෙනකු රඳවා සිටින අතර මියගොස් තිබේ.”

එබැවින් ශ්‍රී ලංකාවේ අයිතිවාසිකම් හා නිදහස රැකගැනීමේ අරගලයට සහය ලබාදෙන ලෙස එම ලිපිය මගින් ජාත්‍යන්තර ප්‍රජාවගෙන් වැඩි දුරටත් ඉල්ලා ඇත.