පරිසර හානිය ගැන තවත් “අසත්‍ය ප්‍රවෘත්ති ප්‍රබන්ධයක්” වව්නියාවෙන්

0

වර්තමාන ආණ්ඩුව බලයට පත් වූ පසු රටේ පවතින පරිසර හානිය දියුණු තියුණු වී ඇති බවට හෙළිවන තොරතුරු “අසත්‍ය ප්‍රවෘත්ති ප්‍රබන්ධ ලෙසින්” ජනාධිපතිවරයා විසින් බැහැර කෙරෙද්දී, වන්නි ප්‍රදේශයේ ගම්මාන කිහිපයකටම ජලය ලබාදෙන පෞරාණික නටබුන් සහිත රජයේ කැලෑ ඉඩම් අක්කර සියයකට ආසන්න ප්‍රමාණයක් ගිණි තබා විනාශකර ඇති අයුරු පරිසරවේදීන් විසින් අනාවරණය කර තිබේ.

ප්‍රදේශයේ ගල් කොරි කිහිපයක් ආරම්භ කිරීමටත්, බඩ ඉරිඟු ඇතුලු කාසි බෝග වගා කිරීම සදහාත් වව්නියාව, මාමඩුව කන්ද කැලෑ ප්‍රදේශය ගිනි තබන්නට ඇති බවට ප්‍රදේශ වාසින් සැක පළ කරන බවයි පරිසර හා සොබාදහම් අධ්‍යයන මධ්‍යස්ථානය පවසන්නේ.

රමණිය කන්දක් සේ දිස්වු මෙම රජයේ කැලෑ ඉඩම හා පුරා විද්‍යා ස්ථානය වව්නියාවේ සිට මඩු කන්ද බලා යන මාර්ගයේදි ඉතා හොදින් දැකගැනීමට හැකියාව තිබුනි.

යුද්ධය පැවති සමයේ පවා ඉතා හොදින් ආරක්ෂා වී තිබු මාමඩුව කන්ද ප්‍රදේශයේ වනාන්තර යුද්ධය අවසන් වී වසර ගණනක් යන්නට මත්තෙන් වනාන්තර ඉවත් කර ගල් කොරි පවත්වාගන යාමට අවසර ලබා දි තිබු බව පරිසර හා සොබාදහම් අධ්‍යයන මධ්‍යස්ථානයේ ජාතික සම්බන්ධීකාරක රවීන්ද්‍ර කාරියවසම් පෙන්වා දෙයි.

කැලෑ නාශකයන් නිදැල්ලේ

එයින්ද නොනැවති අද වන විට මෙම වනාන්තර ප්‍රදේශය කිසියමි පිරිසක් විසින් ගිණි තබා විනාශ කර ඇති බව පෙන්වා දෙන පරිසරවේදියා චෝදනා කරන්නේ එම විනාශයට සම්බන්ධ කිසිවෙකුත් අත්අඩංගුවට ගැනීමට කිසිදු බලධාරියෙක් මේ වන තෙක් කටයුතු කර නොමැති බවයි.

රවීන්ද්‍ර කාරියවසම් පෙන්වා දෙන පරිදි ගිනි තබා විනාශ කර ඇති කැලෑ ප්‍රදේශය හයවන සියවසයේ ඉදිකල මාමාඩුව පුරාණ වැවේ ප්‍රධාන ජලපෝෂක ප්‍රදේශයයි.

“එළාර රජසමය, දුටුගැමුණු රජසමය, අග්බෝ රජසමය ආදි පුරාණ රජ්‍ය යුගයන්ට අයත් නටබුන් බහුතරයක් මාමඩුව කන්ද ආශ්‍රිතව හා මාමඩුව වැව ආශ්‍රිත ප්‍රදේශයේ හමුවන අතර එම නිසාම මෙම ප්‍රදේශය පුරාවිද්‍යාත්මක වටිනාකමින්ද යුක්ත ආරක්ෂා කළ යුතු ප්‍රදේශයකි,”යි පරිසර හා සොබාදහම් අධ්‍යයන මධ්‍යස්ථානය නිකුත් කළ නිවේදනයක සදහන්ය.

එම පරිසර සංවිධානය පෙන්වා දෙන පරිදි මහකච්චක්කුඩිය, ඇටඹගස් වැව, අග්බෝපුර, විමගල්ල ඇතුලු ප්‍රදේශයේ ගම්මානවල ප්‍රධාන ජල පෝෂක ප්‍රදේශය ලෙස ක්‍රියාත්මක වන්නේ මාමාඩුව කන්ද මහ කැලෑ ප්‍රදේශයයි.


ගම දනව් ගණනක් අසරණයි

ඉතාමත් අඩු වර්ෂාපතනයක් හිමි වව්නියාව දිස්ත්‍රික්කයේ මෙම ගම්මාන වල වැසියන් සිය ගොවිතැන් බත් කරගනු ලබන්නේ වැස්සෙන් හා මාමඩුව කන්දේ ජල ගබඩාවෙන් ලබාදෙන ජලයෙන් බව රවීන්ද්‍ර කාරියවසම් පෙන්වා දෙයි.

එමෙන්ම එම ප්‍රදේශවල ජනතාව තවමත් ගොවිතැන් සදහා උපකාර කරන ගවයන්ගේ ආහාර අවශ්‍යතාව ඉටුකිරිම සදහාත් අත් වෙදකමට අවශ්‍ය බෙහෙත් ඹෟෂධ ලබා ගැනිම සදහාත් මෙම වනාන්තර ප්‍රදේශය යුද්ධය ආරම්භ විමට පෙර සිටම භාවිතා කරමින් සිටි බව ඔහු වැඩි දුරටත් සදහන් කරයි.

හුදකලා කන්දක් ලෙස පවතින මාමාඩුව කන්ද ප්‍රදේශය ගල් කොරි ගණනාවක් සදහා ලබාදිමට පෙරදි ගන්නා ලද උත්සහය මාමාඩුව ප්‍රදේශයේ හා අවට ගම්මාන වල ජනතාවගේ සහභාගීත්වයෙන් නවතා ගත් බව පෙන්වා දෙන පරිසර හා සොබාදහම් අධ්‍යයන මධ්‍යස්ථානය අවධාරණය කරන්නේ මින් මාසයකට පමණ පෙර මාමඩුව කැලයට කිසියමි පිරිසක් විසින් ගිනිතබා විනාශ කිරීමට දැරූ උත්සාහය ජනතා මැදිහත්වීමෙන් නිවා දැමු බවයි.

නමුත් පසුගිය දිනක රාත්‍රි කාලයේදී මේ වනාන්තරයට නැවත ගිණිතබා ඇති අතර ගින්න නිසා මාමඩුවකන්ද ප්‍රදේශයේ අක්කර 98 ආසන්න ප්‍රමාණයක් ගිනිගෙන විනාශ වී තිබේ.

මෙම වන හානිය සිදුකර ඇත්තේ වන්නියේ කැලෑ කොල්ලයක් ගැන තොරතුරු අනාවරණය කිරීමට ගිය මාධ්‍යවේදීන් දෙදෙනකුට මැරයන් පිරිසක් ලේගලන තුරු පහරදී මරණ තර්ජන කර සතියක් වත් ගතවීමට මත්තෙන්ය.

අලි මංකඩක්

තැනින් තැන පලු , වීර, කෝන් , කැට කෑල වැනි විශාල ගස් සහිත භුමියක් ලෙසත් පතන් භූමියක් ලෙසත් මෙම ප්‍රදේශ පුරා ශාක පද්ධතිය විසිරි ඇති අතර අලි ඇතුන් ගමන් කරන අලි මංකඩක් ලෙසද මෙම ප්‍රදේශය හදුන්වා දෙන පරිසර වේදියා තව දුරටත් පෙන්වා දෙන්නේ වියලි කලාපිය පාරිසරික පද්ධතියට හුරුකම් කියන මෙම ප්‍රදේශය තුළ සංචාරක හා දේශිය පක්ෂි විශේෂ 94ක් පමණ දැනට හමු වී ඇති අතර ක්ෂිරපායි විවිධත්වය අතින්ද මාමඩුවකන්ද සහ මඩුකන්ද ප්‍රදේශය ඉතාමත් ඉහල අගයක් ගන්නා බවයි.

“මෙම ප්‍රදේශය පුරා විහිදි ඇති රතු සහ කහ වර්ණ මිශ්‍ර ලැටරොයිටි පස නිසා ජලයේ අම්ලික තාවය වැඩි වූවත් ශාක පද්ධතිය හා එහි මූල පද්ධතියේ ප්‍රේරණ ක්‍රියාවලිය නිසා ජලය ඉතාමත් පිරිපහදු වී ඇත.”

ආරක්ෂක හමුදා කදවුරු හා පොලිසිය මෙම ප්‍රදේශයට ඉතාමත් ආසන්නව පිහිටා තිබුනත් ගිණි තැබීම ට අදාල කිසිවෙක් අත්අඩංගුවට ගැනීමට කටයුතු කර නොමැති බවට චෝදනා කරන පරිසරවේදී රවීන්ද්‍ර කාරියවසම් පෙන්වා දෙන්නේ ප්‍රදේශවාසින් එකතු වී ගින්න තමාට හැකි අයුරින් පාලනය කර නිවා දමා ඇති බවයි.

ආරක්ෂා විය යුතු රජයේ අවශේෂ වනාන්තර වාණිජ බෝග වගාවන් සදහා හෝ වෙනත් හේතුවක් සදහා හෝ ලබා ගන්නේනම් එය කළ යුතු ආකාරය මෙය නොවන බව වග කිව යුතු පාර්ශවයන්ට අවධාරණය කරන පරිසර හා සොබාදහම් අධ්‍යයන මධ්‍යස්ථානය තව දුරටත් පෙන්වා දෙන්නේ යුද්ධයෙන් ආරක්ෂා වී තිබු උතුරු මැද හා උතුරු පාළාත් වල විශාල වනාන්තර ප්‍රමාණයක් අද වන විට මෙලෙම විනාශ කරමින් ඇති අතර ඒ සදහා රජයේ සම්බන්ධයක් නොමැතිනමි රාත්‍රි කාලයට පැමිණ කැලැ කපා ගිණි තබා විනාශ කරන්නන් අල්ලා ගත යුතු බවයි.

සජිත් ප්‍රේමදාසගේ සමගි ජන බලවේගය පසුගියදා සදහන් කර තිබුනේ අවසන් මහ මැතිවරණයේ සිට මේ දක්වා කාලය තුළ ශ්‍රී ලංකාවේ වනාන්තර රක්ෂිත ඉඩම් ආසන්න වශයෙන් අක්කර 7 බැගින් දිනකට විනාශ වී ඇති බවයි.

බොහෝ තැන්වල මෙම වනාන්තර විනාශය සිදුව ඇත්තේ දේශපාලනඥයන්ගේ රැකවරණය සහ අනුදැනුම යටතේ බව ඔහු වැඩි දුරටත් පවසා තිබුනි.

වත්මන් රජය බලයට පැමිණීමෙන් පසු සිදුකෙරෙන පරිසර හානිය පිලිබඳව මාධ්‍ය විසින් කරන හෙළිදරව් ජනාධිපති වරයා විසින් පසුගියදා ප්‍රතික්ෂේප කර තිබුනේ “අසත්‍ය ප්‍රවෘත්ති ප්‍රබන්ධ කොට සමාජගත කිරීමේ මෙහෙයුමක්” ලෙස හුවා දක්වමිනි.

කෙසේවෙතත්, වන විනාශය සැබවින්ම සිදුවන්නක් බව පිළිගනිමින් ආරක්ෂක ලේකම් මේජර් ජෙනරාල් කමල් ගුණරත්න පසුගියදා කියා සිටියේ ජනාධිපති සොයුරු චමල් රාජපක්ෂ ආරක්ෂක රාජ්‍ය අමාත්‍යවරයාද සමග එක්ව ඊට විරුද්ධව පියවර ගන්නා බවයි.

පරිසර හානිය පිළිබද පුවත් ජනමාධ්‍ය අවුළුවද්දී, පරිසර හානි පිළිබදව දැනුම් දීම සදහා පරිසර අමාත්‍ය මහින්ද අමරවීර දුරකථන අංක හතරක් හදුන්වා දී තිබේ.

පරිසර අමාත්‍යාංශයේ 1991, මධ්‍යම පරිසර අධිකාරියේ 1981, භූ විද්‍යා සමීක්ෂණ හා පතල් කාර්යාංශයේ 1921 දුරකථන අංකයත්, අමාත්‍යවරයාගේ පුද්ගලික දුරකථනය වන 0707-555666 අංකයට වට්ස්අප් පණවිඩයක්, කෙටි පණිවිඩයක් හෝ විඩියෝ හෝ එවන ලෙසත් පරිසර අමාත්‍යවරයා මහජනතාවගෙන් වැඩි දුරටත් ඉල්ලා තිබේ.

Facebook Comments

wedding people