මිනිස් පරිභෝජනයට නුසුදුසු පිළිකාකාරක ඇතුලත් කෑම බීම පිලිබඳ තොරතුරු රටේ ජනතාවගෙන් වසන් කිරීමේ චෝදනාවට රජයේ ඉහළ බලධාරිනියකට විරුද්ධව අපරාධ පරීක්ෂණ දෙපාර්තමේන්තුවට පැමිණිල්ලක් ඉදිරිපත් කර තිබේ.
ශ්‍රී ලංකා ප්‍රමිති ආයතනයේ අධ්‍යක්ෂ ජෙනරාල්වරිය පෞද්ගලික රූපවාහිනි නාලිකාවක් හරහා ජනතාවට කෙටි කාලයක් වස කැවීම අනුමත කරමින් සිදු කළ ප්‍රකාශය සම්බන්ධයෙන් නීතිමය පියවර ඉල්ලා පැමිණිල්ල ගොනු කර ඇත්තේ ජන බල පවුර සිවිල් සංවිධානයේ කැදවුම්කරු සුදේශ් නන්දිමාල් සිල්වා විසිනි.
පොල් තෙල් වලට අමතරව මෙරට තවත් බොහෝ ආහාර වර්ග වල ඇෆලටොක්සින් පිලිකා කාරක අඩංගු වී ඇතත් දේශීය නිෂ්පාදන කඩා වැටීමේ අවදානමක් ඇති හෙයින් ඒ බව ජනතාවට හෙළි නොකරන බව ශ්‍රී ලංකා ප්‍රමිති ආයතනයේ අධ්‍යක්ෂ ජෙනරාල් ආචාර්ය සිද්ධිකා සේනාරත්න හිරු රූපවාහිනියේ සාකච්ඡාවකට එක්වෙමින් පවසා තිබුණාය.
එම සමාගම් කවරේදැයි ඇය හෙළිදරව් කළේ නැත.
ආහාර පාන භාවිතය ඉහල යන සිංහල දෙමළ අලුත් අවුරුද්ද උදාවීමට පෙර සිය පැමිණිල්ල විභාග කරන ලෙස ඉල්ලා සිටින මගින් මානව හිමිකම් ක්‍රියාධාරියා පෙන්වා දෙන්නේ අධ්‍යක්ෂ ජනරාල් ගේ ප්‍රකාශය හරහා රටේ පුරවැසියන්ගේ අයිතිවාසිකම් බරපතල ලෙස අනතුරේ හෙළා ඇති බවයි.
“එකී ප්‍රකාශයෙන් ඇය සදහන් කළේ පිළිකාකාරක ඇතුලත් බොහෝමයක් ආහාර ද්‍රව්‍ය ඇති බවත් ඒවා හෙළි කළහොත් ඒවායේ නිෂ්පාදන ආයතන බිඳ වැටෙන බවත්ය. මේ නිසා තව ටික කාලයක් ජනතාවට එම විෂ සහිත ආහාර සමග සිටිය යුතු බවත්ය.”
ශ්‍රී ලංකා පුරවැසියන්ගේ යහපත වෙනුවෙන් සුදුසු තීරණ ගත යුතු ශ්‍රී ලංකා ප්‍රමිති ආයතනය වස විස කවන ආයතන ගැන තොරතුරු සඟවා ගෙන සිටීම පුරවැසියන්ගේ අයිතිවාසිකම් බරපතල අනතුරක හෙලීමක් ලෙසින් මානව හිමිකම් ක්‍රියාධර සුදේශ් නන්දිමාල් අවධාරණය කරයි.
අපරාධ පරීක්ෂණ දෙපාර්තමේන්තුවට යොමු කළ පැමිණිල්ල මගින් සුදේශ් නන්දිමාල් සිල්වා වැඩි දුරටත් පෙන්වා දී ඇත්තේ ශ්‍රී ලංකා ප්‍රමිති ආයතනයේ අධ්‍යක්ෂ ජෙනරාල්වරියගේ ප්‍රකාශය අනුව පිළිකාකාරක වැනි මිනිස් පරිභෝජනයට නුසුදුසු ආහාරපාන මොනවාද?ඒවා ගබඩා කර ඇත්තේ කොහේද? ඒවා නිෂ්පාදනය කරන්නේ කවුරුන්ද? යන කරුණු සම්බන්ධයෙන් ඇය සතුව දැනුමක් ඇති බව පැහැදිලි වන බවයි.
” ශ්‍රී ලංකා නීතිය අනුව ගත් විට ජනතාවට යම් අන්තරායක් විය හැකි කරුණක් හෝ කරුනු දන්නා අයෙකු එම කරුණු වුවමනාවෙන්ම සගවාගෙන සිටීම වරදකි. එය පාරිභෝගික අධිකාරිය පනත යටතේ මෙන්ම අපරාධ නීතිය යටතේද වරදකි. ”
රජයේ මුදලින් නඩත්තු වන ශ්‍රී ලංකා ප්‍රමිති ආයතනයේ අධ්‍යක්ෂ ජෙනරාල්වරිය මෙවැනි ප්‍රකාශයක් සිදු කරන්නේ වෙනත් පුද්ගලයකුගෙන් හෝ වෙනත් ආයතනයකින් යම් මුදලක් හෝ වෙනයම් ආකාරයක ප්‍රතිලාභයක් ලබා ගෙන දැයි යන සැකයත් සිය පැමිණිල්ල මගින් සුදේශ් නන්දිමාල් සිල්වා මතු කර තිබේ.
තමන් දරණ තතතුර අවභාවිත කරමින් ඇය කටයුතු කර ඇත්නම් එය අල්ලස් හෝ දුෂණ විමර්ශන චෝදනා පැමිණිලි කොමිසන් සභා පනත යටතේ ගැනෙන වරදක් බව මානව හිමිකම් ක්‍රියාධරයා අපරාධ පරීක්ෂණ දෙපාර්තමේන්තුවට දැනුම් දී ඇත.
අවුරුදු කාලේ වහ කැවීමේ අවදානමක්
ශ්‍රී ලංකා වාසී ජනතාවගේ පරිභෝජන ක්‍රියාවන් වෙනත් කවර කාලෙකටත් වඩා ඉහල මට්ටමකට පැමිණෙන සිංහල, දෙමළ අලුත් අවුරුදු සමය තුළ වෙළද පොලේ මෙවැනි විෂ සහිත පිළිකාකාරක අඩංගු ආහාරපාන පැවතීම ජන ජීවිතවලට ඉතාමත් බරපතල තත්වයක් ලෙසින් පෙන්වා දෙන පැමිණිල්ල තව දුරටත් අවධාරණය කර ඇත්තේ එය ශ්‍රී ලාංකිකයන්ගේ මනසට විශාල පීඩනයක් ලෙසිනි.
සිය පැමිණිල්ල මගින් මානව හිමිකම් ක්‍රියාධර සුදේශ් නන්දිමාල් සිල්වා අපරාධ පරීක්ෂණ දෙපාර්තමේන්තුවෙන් ඉල්ලා ඇත්තේ එළඹෙන සිංහල, දෙමළ අවුරුදු සමයට පෙර මෙම පැමිණිල්ල ඉක්මනින් විභාග කර විෂ සහිත පිළිකාකාරක අඩංගු නොවන ආහාරපාන තෝරා ගැනීමට ජනතාවට හැකි වන ආකාරයට සුදුසු පියවර ගන්නා ලෙසයි.
පිළිකා කාරක විෂ රසායන අඩංගු පොල්තෙල් තොගයක් ශ්‍රී ලංකාවට ආනයනය කර ඇති බව ද පසුගියදා හෙලි වී තිබුනි.
පිරිපහදු නොකළ පොල්තෙල් ආනයනය කළ සමාගම් තුනක පොල්තෙල් සාම්පල තුළ පිළිකා කාරක විෂ රසායනික අන්තර්ගත බව හඳුනා ගත බැවින් එම පොල්තෙල් නැවත අපනයනය කරන ලෙස නිර්දේශ කළ බව ශ්‍රී ලංකා ප්‍රමිති ආයතනයේ අධ්‍යක්ෂ ජනරාල් පසුගියදා මාධ්‍ය වෙත පවසා තිබුනි.
ශ්‍රී ලංකා ප්‍රමිති ආයතනය මඟින් පෙබරවාරි මස අදාළ ආනයනික පොල්තෙල් සාම්පල පරීක්ෂාවට ලක් කර තිබෙන අතර ඒවායේ “ඇෆ්ලටොක්සින්” නැමැති විෂ රසායනිකය ඉහළ ප්‍රතිශතයකින් අන්තර්ගත බවට මාර්තු 4 වන දින තහවුරු වූ බව සමුපකාර සේවා, අලෙවිකරණ සංවර්ධන සහ පාරිභෝගික ආරක්ෂණ රාජ්‍ය අමාත්‍ය ලසන්ත අලගියවන්න ද මාධ්‍යවේදීන් සමග පවසා තිබුනි.
Facebook Comments
