ආර්ථික අහේනිය නිසා ලංකාවේ දරුවන්ගේ කෑම වේල බාගෙට කැපිලා

ශ්‍රී ලංකා රජය විසින් ණය ගෙවීම පැහැර හැරීමෙන් වසරකට ආසන්න කාලයක් ගතවද්දී, දිවයිනේ ආර්ථික පසුබෑම බරපතල සාගිනි අර්බුදයක් දක්වා වර්ධනය වෙමින්, දිවයිනේ පවුල් වලින් අඩකට තම දරුවන්ට ලබා දෙන පෝෂණය අඩු කිරීමට සිදුවී ඇති බව ළමා අයිතිවාසිකම් පිළිබඳ ජාත්‍යන්තර සංවිධානයක් අනතුරු අඟවයි.

එම බියජනක හෙළිදරව්ව කෙරෙන නවතම සමීක්ෂණය සිදුකර ඇත්තේ දරිද්‍රතාවයෙන්, ගැටුම්වලින් සහ ස්වභාවික විපත්වලින් පීඩාවට පත් දරුවන්ට උපකාර කිරීමේ අරමුණින් 70 දශකයේ සිට ශ්‍රී ලංකාවේ ක්‍රියාත්මක වන සේව් ද චිල්ඩ්‍රන් (Save the Children – STC) සංවිධානය විසිනි.

රටේ දරුවන් ‘අතරමං වූ පරම්පරාවක්’ වීම වැලැක්වීමට රජය සහ ජාත්‍යන්තර ප්‍රජාව වහාම ක්‍රියාත්මක විය යුතු බව සේව් ද චිල්ඩ්‍රන් ළමා අයිතිවාසිකම් සංවිධානය අවධාරණය කරයි.

කාලයක් ගත වෙද්දී, උද්ධමනයට සහ ආහාර, ඖෂධ සහ ඉන්ධන හිඟයට මෙන්ම ස්ථාවර රැකියා හිඟයට මුහුණ දීමට නොහැකි තත්වයක් දිවයිනේ වෙසෙන කුටුම්භ වලට මතු වී තිබේ. ලෝක බැංකුවට අනුව ලෝකයේ හත්වැනි ඉහළම නාමික ආහාර උද්ධමන අනුපාතිකය ලංකාවට හිමිවී ඇති අතර, පසුගිය වසරට සාපේක්ෂව උද්ධමනය 50% කට වඩා වැඩි ප්‍රමාණයකින් ඉහළ ගොස් තිබේ.

පසුගිය දෙසැම්බරයේ නිකුත් කළ එම වාර්තාවට අනුව මුළු දකුණු ආසියාවේම දරුණුතම කෑම අහේනියට ගොදුරු වී සිටින රට ශ්‍රී ලංකාව යි.

ශ්‍රී ලංකාවේ දිස්ත්‍රික්ක 9 ක් පුරා නිවාස 2,308 ක් සම්බන්ධ කරගනිමින් සේව් ද චිල්ඩ්‍රන් විසින් සිදුකරන ලද නවතම සමීක්ෂණය මගින් හෙළි වී ඇත්තේ, මෙම උද්ධමනය හේතුවෙන් පසුගිය වසරේ ජුනි සහ දෙසැම්බර් මාස අතර සාමාන්‍ය ගෘහස්ත වියදම 18% කින් ඉහළ ගොස් ඇති බවයි. මෙම කාලය තුළ ඔවුන්ගේ සාමාන්‍ය මූලික අවශ්‍යතා බොහොමයක් හෝ සම්පූර්ණයෙන් ඉටු කර ගැනීමට නොහැකි වූ කුටුම්භ ප්‍රමාණය 23%කින් ඉහල ගොස් ඇති බව සේව් ද චිල්ඩ්රන් පෙන්වා දෙයි.

මේ නිසා, පසුගිය මාස හය තුළ, බොහෝ පවුල්වලට සිය ජීවිත පවත්වාගෙ යාම සඳහා ඉතා දුෂ්කර ක්‍රියාමාර්ගවලට යොමු වීමට සිදු වී ඇති අතර, ගෘහස්ථ වියදම් පියවා ගැනීම සඳහා මුදල් ණයට ගැනීමට යොමු වූ බව පවසන කුටුම්භවල 24% වැඩිවීමක්; ආහාර මිලදී ගැනීම සඳහා ණය වීමට සිදු වූ බව පවසන කුටුම්භවල 24% ක වැඩිවීමක්; සහ මුදල් ලබා ගැනීම සඳහා තමන්ට තිබූ ගෘහ භාණ්ඩ අලෙවි කිරීමට සිදු වූ කුටුම්භවල 28% ක වැඩිවීමක්, මෙම සමීක්ෂණය මගින් හදුනාගෙන තිබේ.

කාන්තාවන්ට වැඩි පීඩනයක්

මෙහිදී කාන්තාවන් මූලිකත්වය දරන කුටුම්භ විශේෂයෙන්ම අවදානමට ලක්ව ඇති බව STC පැවසුවේ, ජාවාරම් හෝ සූරාකෑමට ලක්වීමත්, අතිකාල වැඩ කිරීම සහ සමහර අවස්ථාවල රැකියා සඳහා සංක්‍රමණය වීමට සිදුවීමත් වැනි අවදානම්වලට කාන්තාවන් වැඩිවශයෙන් මුහුන දී ඇති බව පෙන්වා දෙමිනි. අනෙක් අතට මේ හේතුවෙන් ළමයින් තනිවීම නිසා ඔවුන්ව තවදුරටත් අවදානමට ලක් වන බව ළමා අයිතිවාසිකම් පිළිබඳව කටයුතු කරන මෙම සංවිධානය ප්‍රකාශ කරයි.

සමීක්ෂණයට සහභාගී වූ පවුල්වලින් අඩක්ම තම දරුවන් වෙනුවෙන් ලබා දෙන ආහාර ප්‍රමාණය අඩු කර ඇති බව පවසද්දී, 27% ක් ප්‍රකාශ කර ඇත්තේ, තම දරුවන්ව පෝෂණය කිරීම වෙනුවෙන් වැඩිහිටියන් ආහාර වේල් අතහරින බවයි. සෑම නිවාස දහයකින් නවයක්ම කියා සිටියේ තම දරුවන්ට පෝෂ්‍යදායී ආහාර ලබා දීම තමන්ට සහතික කළ නොහැකි බවයි.

මෙම සමීක්ෂණයට සහභාගී වූ කොළඹ වාසය කරන පවුලකට සිදුවී ඇත්තේ තම දරුවන් තිදෙනාටම සමබල ආහාර වේලක් ලබා දීම සඳහා මහත් අරගලයක යෙදීමටයි. බිත්තර, යෝගට් වැනි සරල පෝෂණීය ආහාර පවා පවුලට දැරිය නොහැකි තරම් මිල අධික වී ඇති අතර, දරුවන්ට පෝෂණය ලබා දීමට හැකි ආහාර ද්‍රව්‍ය ඒ හේතුවෙන් සීමා කිරීමට සිදු වී තිබේ. බොහෝ දිනවලදී, ඔවුන්ගේ සිදුවී ඇත්තේ බාලම දරුවාගේ පෝෂණයට ප්‍රමුඛත්වය දීමටයි.

ඔවුන්ගේ 11 හැවිරිදි දියණිය පවසා ඇත්තේ තමන්ට සහ ඇගේ 8 හැවිරිදි සහෝදරියට දැන් බොහෝ විට යෝගට් වැනි දේ නොලැබෙන්නේ, ඔවුන්ගේ දෙමව්පියන්ට ඒවා ලබා දිය හැක්කේ අවුරුද්දක් වයසැති තම බාලම සහෝදරියට පමණක් වන නිසා බවයි.

“අපිත් ඇත්තටම යෝගට් කන්න ආසයි, නමුත් ගොඩක් වෙලාවට මගේ දෙමාපියන්ට පුළුවන් මගේ බාලම නංගිට යෝගට් අරන් දෙන්න විතරයි. එයාලට අමතර මුදලක් තියෙනකොට, පුළුවන් හැම වෙලාවෙම අපි දෙන්නටත් යෝගට් අරං දෙනවා.” ඇය පවසා තිබේ.

“දැන් කඩවල බඩු මිල සෑහෙන වැඩියි. මීට කලින් කවදාවත් මේ වගේ තිබ්බේ නෑ. ”

මාර්ග සියල්ලම හෝ බොහෝමයක් අහිමි වී ඇති බව ද මෙම සමීක්ෂණයෙන් හෙළි වී තිබේ. මේ අතරින්, අඩකට වඩා (54%) කුටුම්භවල ප්‍රධාන ආදායම, වසරේ යම් කාල වලට සීමා වූ සහ අක්‍රමවත් රැකියා මත පදනම්ව තිබේ. මෙම අස්ථාවරත්වය හේතුවෙන් තම මීළඟ ආහාර වේල පැමිණෙන්නේ කොහෙන්දැයි නොදන්නා අවදානම් තත්ත්වයට දරුවන් පත්ව ඇති බව සේව් ද චිල්ඩ්‍රන් පවසයි.

“මෙම සංඛ්‍යාලේඛන වලින් පෙන්වන්නේ ශ්‍රී ලංකාවේ අර්බුදය පාලනයෙන් බැහැරව පවතින ආකාරය සහ ඕනෑම අර්බුදයකදී මෙන්, දරුවන්ගේ ශාරීරික හා මානසික සෞඛ්‍යය, පෝෂණය සහ අධ්‍යාපනය යන සියල්ල අද වන විට අවදානමට ලක්ව ඇති ආකාරයයි. මෙම දරුවන් රටේ පශ්චාත් යුද පරම්පරාව ලෙස බලාපොරොත්තු සහිතව උපත ලබා තිබෙන නමුත්, නැවත වරක් ඔවුන් අසාර්ථකත්වයට ඇද දැමීමේ බරපතල අනතුරක අපි ඉන්නවා,” යැයි සේව් ද චිල්ඩ්රන් හි ශ්‍රී ලංකාව සඳහා වන අධ්‍යක්ෂක ජූලියන් චෙල්ලප්පා පැවසීය.

“තම පවුලේ ආහාර වේලක් අනුභව කරන්නේ කවුරුන්ද යන්න තෝරා ගැනීමට සිදුවන තැනට දෙමව්පියන් කිසිවිටෙකත් වැටිය යුතු නැහැ. අපි මෙහි දකින සෑම දෙයක්ම, පෙන්නුම් කරන්නේ කුසගින්න පිළිබඳ අර්බුදයක සැබෑ අනතුරක්. ශ්‍රී ලංකා රජය සමහර පවුල්වලට සුබසාධන යෝජනා ක්‍රම හරහා අත්‍යවශ්‍ය සහයෝගයක් ලබා දෙමින් ඉන්නවා වුනත්, ජාත්‍යන්තර ප්‍රජාවේ සහයෝගය ඇතිව ඉතා ඉක්මණින් සමාජ ආරක්ෂණ ක්‍රමවේද ගොඩනැගීම අද වෙනකොට අවශ්‍ය වෙලා තියෙනවා. මේක වහාම ප්‍රතිචාර ලබා දිය යුතු හදිසි අවස්ථාවක්.”

මේ අවශ්‍යතා වඩාත් හොඳින් සපුරාලීම සඳහා, සියලුම මානුෂීය මැදිහත්වීම් සිදු කිරීමේදී අදාල ප්‍රජාවන්ගේ පීතෘමූලික ස්ත්‍රී පුරුෂ ගතිකත්වයන් සැළකිල්ලට ගත යුතු බවද, සේව් ද චිල්ඩ්‍රන් වැඩිදුරටත් අවධාරණය කරයි.

එහෙම ප්‍රශ්නයක් නෑ

කෙසේවෙතත්, ආහාර අහේනියකට ශ්‍රී ලංකාව කඩා වැටෙනු නැති බව ආණ්ඩුවේ විශ්වාසයයි.

ආහාර අර්බුදයට මුහුණ දීම සඳහා ලෝක ආහාර සංවිධානය, ආධාර දෙන රටවල් සහ රාජ්‍ය නොවන සංවිධාන හා එක්වී ජනාධිපති රනිල් වික්‍රමසිංහගේ රජය සාර්ථක ව්‍යාපෘති දියත් කර ඇති බව කෘෂිකර්ම අමාත්‍ය මහින්ද අමරවීර රාජ්‍ය පාලිත සන්ඩේ ඔබ්සර්වර් පුවත්පතට පවසා තිබේ.