මෛත්‍රීට අල්ලස් දීමේ චෝදනා ලබන සමාගමට ලෝක බැංකුවෙන් තහනමක්

0
606
Ivory Agency Sri Lanka
wedding people

වත්මන් ජනාධිපති මෛත්‍රිපාල සිරිසේන රාජපක්ෂ පාලන සමයේ කෘෂිකර්ම අමාත්‍යවරයාව සිටිය දී මහා පරිමාන ඉදිකිරීම් කොන්ත්‍රාත්තුවක් ලබාගැනීමට අල්ලස් දුන් බවට චෝදනා ලබන ජාත්‍යන්තර ඉදි කිරීම් සමාගමකට එරෙහිව තහනමක් පැනවීමට ලෝක බැංකුව කටයුතු කර තිබේ.

ශ්‍රී ලංකාවේ සහ බංගලාදේශයේ සිදුකරන ලද ව්‍යපෘති වල දී ඕස්ට්‍රේලියාවේ දැවැන්ත ඉංජිනේරු සමාගමක් වන ස්නෝවි මවුන්ටන්ස් ඉංජිනියරින් කෝපරේෂන් (SMEC) සමාගම සිදුකළ බව පැවසෙන “අයථා ගෙවීම්” පිළිබඳව අනාවරණය වීමෙන් පසුවයි ලෝක බැංකුව මෙම තීරණයට එ‍ළඔ ඇත්තේ.

දකුණු ආසියා කලාපයේ SMEC සමාගමේ “නොමනා චර්යාව” නිසා ශ්‍රී ලංකාවේ, ඉන්දියාවේ හා බංග්ලාදේශයේ එම සමාගම යටතේ වන තවත් සමාගම් හතරකටද තහංචි පනවන ලද බව ලෝක බැංකුව නිවේදනය කරයි.

ශ්‍රී ලංකාවේ ශියානා (OCYANA) කන්සල්ටන්ට්ස් උපදේශක සේවා ආයතනය ද ලෝක බැංකුව විසින් SMEC සමාගමට පනවන ලද තහංචියට යටත් වන අතර අජිත් රෝහණ වන්නිආරච්චි අධ්‍යක්ෂ ධුරය හොබවන එම ආයතනය උපදේශන ආචාරධර්ම කඩ කළ බව ලෝක බැංකුව පවසයි.

ලෝක බැංකු ආධාර ඇතිව ශ්‍රී ලංකාව, ඉන්දියාව සහ බංගලාදේශයේ ක්‍රියාත්මක ව්‍යපෘති පිළිබඳව දිගු කාලයක් මුළුල්ලේ ලෝක බැංකුව විසින් කරනු ලැබූ පරීක්ෂණයකින් අනතුරුව මෙම තහංචිය පනවා තිබේ.

“ශ්‍රී ලංකාවේත්, ඉන්දියාවේත් ලෝක බැංකු මුල්‍යාධාර යටතේ පවත්වාගෙන යන ව්‍යාපෘති සඳහා ලංසු තැබීමේදී වැරදි තොරතුරු ලබා දුන් බව හෙළිවී,” යයි එම පරික්ෂණයේදී හෙළි බව ලෝක බැංකු නිවේදනයේ දැක්වේ.

මැතිවරණ අල්ලස්

ස්නෝවි මවුන්ටන්ස් ඉංජිනියරින් කෝපරේෂන් සමාගමේ විදේශ කාර්ය මණ්ඩලය ශ්‍රී ලංකාවේ ක්‍රියාත්මක වුනු ඇමෙරිකානු ඩොලර් මිලයන 2.3ක මළාපවාහන ව්‍යාපෘතියක් ලබාගැනීම සඳහා 2003 වසරේ ශ්‍රී ලංකාවේ නිලධාරීන් වෙත අල්ලස් ලබාදුන් බවට පසුගිය වසරේදී ෆෙයාර්ෆැක්ස් මාධ්‍ය ආයතනය විසින් අනාවරණය කරනු ලැබීය.

සමාගමේ විද්‍යුත් තැපැල් හුවමාරු ලිපිගොනු වලට අනුව වත්මන් ශ්‍රී ලංකා ජනාධිපති මෛත්‍රිපාල සිරිසේන කැබිනට් අමාත්‍යධුරයක් දරන අවදියේ ඔහු සහ ඔහුගේ උපදේශකයෙක් විසින් ස්නෝ මවුන්ටින් ඉංජිනියරින් කෝපරේෂන් සමාගමෙන් දේශපාලන ‘ප්‍රදානයක්’ ලබා ගැනීමට උත්සහ කර ඇති බවට අනාවරණය වී ඇත.

එම මුදල මෛත්‍රිපාල සිරිසේන මහලේකම් වූ ශ්‍රී ලංකා නිදහස් පක්ෂයේ මැතිවරණ ව්‍යාපාරයට කරන ප්‍රදානයක් විය යුතු යැයි හුවමාරුවූ ඊමේල් පණිවුඩ වලින් පෙනී යන බව එම මාධ්‍ය ආයතයන හෙළි කර තිබුනි.

හෙළි නොවු පරීක්ෂණය

මෙම චෝදනා එල්ල වු අවදියේදී ශ්‍රී ලංකාවේ ජනාධිපති මාධ්‍ය අංශය ප්‍රකාශ කර තිබුනේ එවැනි සිද්ධියකට කිසිදු සම්බන්ධයක් හෝ දායකත්වයක් නැතැයි ද තම දේශපාලන ජීවිතයේදී කිසි දිනෙක දූෂණ අක්‍රමිකතාවක් සඳහා මැදිහත් වීමක්, අනුබල දීමක් හෝ සම්බන්ධවීමක් සිදු වී හෝ සිදු කර නැති බවයි.

එසේම අදාළ ප්‍රවෘත්තිය සම්බන්ධයෙන් වැඩිදුර ක්‍රියාමාර්ග ගැනීම සඳහා ජනාධිපතිවරයා විසින් නීතිපතිවරයාට උපදෙස් දී ඇති බවද ජනාධිපති මාධ්‍ය අංශ නිවේදන කළේය.

අදාළ නිවේදන නිකුත් කර වසරක් ගතව තිබුනද නීතිපතිවරයා ගත් ක්‍රීයාමර්ග පිළිබඳව කිසිදු තොරතුරක් මේතාක් හෙළි කර නැත.

Facebook Comments