ජාත්‍යන්තර බලවේග වලින් සහ එක්සත් ජාතික පක්ෂයෙන් මතුවන බලපෑම් වලට යටනොවී ජනාධිපතිවරයා නව ව්‍යවස්ථා ක්‍රියාදාමය සහ ජිනිවා යෝජනා ක්‍රියාත්මක කිරීම නවතා දැමුව හොත් සිය සහාය ලබා දීමට විමල් වීරවංශ ප්‍රමුඛ එම පක්ෂයේ පිරිස ජනපති මෛත්‍රී හට පොරොන්දු වී තිබේ.
විමල් වීරවංශ ප්‍රමුඛ ජාතික නිදහස් පෙරමුණේ නියෝජිතයන් 11 බදාදා ජනාධිපතිවරයා සමඟ පැවති සාකච්ඡාවකදී මේ බව ප්‍රකාශ කල බව එම පක්ෂයේ ප්‍රබලයෙකු සිලෝන් ජර්නල්ස් වෙත හෙළි කළේය.
අලුත් ව්‍යවස්ථාව සම්මත කර ගතහොත් අගමැති රනිල් වික්‍රමසිංහ ප්‍රමුඛ එක්සත් ජාතික පක්ෂයේ බලය තහවුරු වන බවටද මන්ත්‍රී විමල් වීරවංශ ජනාධිපති මෛත්‍රිපාල සිරිසේන හට අනතුරු අඟවා තිබේ.
“ජනමත විචාරණයක් ජයග්‍රහණය කිරීම මගින්, මෙතෙක් කිසිදු ජාතික මැතිවරණයක් ජයග්‍රහණය කිරීමට නොහැකි වූ රනිල් වික්‍රමසිංහ හට තම බලය තහවුරු කර ගැනීමට ඉඩ ලැබේ,” යි ජනාධිපතිවරයාට භාරදුන් පිටු 4ක ලිපියේ සඳහන් වේ.
ඉදිරි ජන්දයක දී හවුල් ආණ්ඩුවෙන් වෙන් වී එක්සත් ජාතික පක්ෂය නැති ආණ්ඩුවක් හැදීමට උත්සාහ කරන ශ්‍රී ලංකා නිදහස් පක්ෂයේ නායකයා ද වන ජනාධිපතිවරයා හිටපු ජනපති මහින්ද රාජපක්ෂගේ නායකත්වයෙන් යුත් ඒකාබද්ධ විපක්ෂය නියෝජනය කරන පක්ෂයක කණ්ඩායමක් හමුවු පලමු අවස්ථාව මෙය වේ.
Facebook Comments
