වඳ භාවයක් නිර්මාණය කළ බවට සිංහල දේශපාලන නායකයන්ට ආණ්ඩුවෙන් චෝදනා

හැත්තෑ පස් වසරක් තිස්සේ රට පාලනය කළ දේශපාලනඥයන් රටේ ආර්ථිකයට සිදු කළ විනාශය ශ්‍රී ලංකාවේ දරු උත්පත්තිය පහත බැසීමට ද හේතු වී ඇති බව පවසන වෘත්තීය අධ්‍යාපන නියෝජ්‍ය අමාත්‍යවරයා රටේ වඳ භාවයක් නිර්මාණය කළ බවට සිංහල දේශපාලන නායකයන්ට චෝදනා එල්ල කර තිබේ.

වෘත්තීය අධ්‍යාපන නියෝජ්‍ය අමාත්‍ය නලින් හේවගේ පසුගිය සතියේ පාර්ලිමේන්තුවේදී හෙළි කළේ පාසල් වලට ඇතුලත් වු ළමයි ප්‍රමාණය ගෙවී ගිය වසර 9 ක කාලයක් තුළ තිස් පන් දහසකට අධික ප්‍රමාණයකින් අඩුවී ඇති බවයි.

“ඇත්තටම හරි කණගාටුවක් තියනවා, කලින් ඉස්කෝලවලට ඇතුලත් වෙලා තියනවා තුන් ලක්ෂ විසි තුන්දාහක්. දැන් දෙලක්ෂ අසු හත් දාහයි. අද මේ ආර්ථිකයට විතරක් නෙමෙයි මේ අපරාධය කළේ. 2015 ලංකාවේ ඇතුලත් වෙලා තියනවා තුන්ලක්ෂ විසි තුන් දහස් තුන්සිය තිස් හතක්. දැන් දෙලක්ෂ අසු හත් දහස් හයසිය තිස් නමයයි. ඉස්කෝලෙට ඇතුලත් වෙච්ච ළමයි ප්‍රමාණය අවුරුදු 9 ට තිස් පන්දහස් හයසිය අනු හතක් අඩු වෙලා තියනවා.”

මේ වන විට රටේ විවාහකයන් පවා දරුවන් නොහැදීමට හේතුව ආර්ථික අර්බුදය බව පෙන්වා දුන් වෘත්තීය අධ්‍යාපන නියෝජ්‍ය අමාත්‍ය නලින් හේවගේ රටේ වඳ භාවයක් නිර්මාණය කළේ හිටපු පාලකයන් බවටත් එහිදී දැඩි චෝදනාවක් එල්ල කළේය.

“මේ රටේ ළමයි හදන එක අඩුවෙලා තියනවා. අද බඳීන්නේ නැ. බැන්දත් ළමයි හදන්නේ නැ. හැදුවත් එක්කෙනාට වඩා හදන්නේ නැ. ඔන්න ඔයාලා කරපු ආර්ථිකේ. ඔයාලා කිව්වා මොහොමඩ් තමයි වඳ කොත්තු ගේන්නේ. වඳ ඇදුම් ගේන්නේ. මේ අපේ මුස්ලිම් ජනතාව තමයි වද කරන්නේ. වඳ කරලා තියෙන්නේ මුස්ලිම් ජනතාව නෙමෙයි. වඳ කරලා තියෙන්නේ මහින්ද රාජපක්ෂලා. වඳ කරලා තියෙන්නේ රනිල් වික්‍රමසිංහලා. වඳ කරලා තියෙන්නේ සජිත් ප්‍රේමදාසලා.”

නියෝජ්‍ය අමාත්‍ය නලින් හේවගේ පාර්ලිමේන්තුවේදී හෙලි කළ පරිදි සාමාන්‍ය පෙළ අසමත් අය අතුරින් 92% ක් සිටින්නේ බන්ධනාගාරගතවයි.

“අධ්‍යාපනය දැවැන්ත ඛේදවාචකයක්. අපි හිතනවා මේ රට හදන්න අංක එකත් අධ්‍යාපනය, මේ රට හදන්න අංක දෙකත් අධ්‍යාපනය, මේ රට හදන්න අංක තුනත් අධ්‍යාපනය, අපිට භුමිය සීමිතයි. හැබැයි අධ්‍යාපනයේ ඉඩ කඩ අසීමිතයි. ලිමිට් ලස්. ඒ නිසා අධ්‍යාපනය තමයි මේ රට හදන්න තියන එකම දේ. අපිට තියන කණගාටුව තමයි අද පාසල්වලට ඇතුලත් වන ළමයිගෙන් විශේෂයෙන්ම 10 පන්තියට මෙහා 8 පන්තියට මෙහා තිස් දාහක් එළියට හැලෙනවා. මං හොයලා බැලුවා මේ තිස් දාහ කොහේද ඉන්නේ. මේ තිස් දාහෙන් විශාල ප්‍රමාණයක් ඉන්නවා බන්ධනාගාරයේ. බන්ධනාගාරයේ 2022 වෙනකොට ඉන්න ප්‍රමාණය ගත්තොත් තිස් දහස් තුන්සිය එකොළහයි. එයින් 64% ක් අට අසමත් අය. OL අසමත් අය ඉන්නවා 92 % ක්. සාමාන්‍ය පෙලින් හැලෙන 92 % ක් ඉන්නේ බන්ධනාගාරයේ.”

සාමාන්‍ය පෙළ විභාගය අසමත් වන දරුවන් වෙනුවෙන් අමාත්‍යවරයා යෝජනා කරන්නේ රටේ වෘත්තීය අධ්‍යාපනය නගා සිටුවීමයි.

“දැන් කෝ මේකට වැඩ පිළිවෙලක්. ඒ නිසා වෘත්තීය අමාත්‍යංශය ඉන්නේ ඒකට. අනාගතයේ අපි කවදාවත් මේ දරුවෝ මෙහෙම හැලෙන්න දෙන්නේ නැ. දුප්පත් කමනං හේතුව ඒකේ වගකීම ආණ්ඩුව බාර ගන්නවා. හැලෙගන්න දෙන්නේ නැ. 9 න් පසුසේ අපි මාවත් දෙකකට දානවා. ඒ යන මාවත හොදනං ඒක. වෘත්තිය අධ්‍යාපනය හොදනම් ඒක.”

පසුගිය වසරේ රජය විසින් වෘත්තිය අධ්‍යාපනය වෙනුවෙන් මුදල් වෙන් කර තිබු ආකාරටත් අමාත්‍යවරා පාර්ලිමේන්තුවේදී හෙළි කර තිබුනි.

“2023 අධ්‍යාපනයට, උසස් අධ්‍යාපනයට බිලියන 25 ක්. ඒ කියන්නේ සාමාන්‍යයෙන් උසස් අධ්‍යාපනයේ ඉන්නේ ළමයි හතලිස් හතර දාහයි. හතලිස් හතර දාහක් වෙනුවෙන් බිලියන 25 ක් වෙන් කරන කොට එක් ලක්ෂ විසි දාහක් ඉන්නවා වෘත්තිය අධ්‍යාපනයේ. ඒකට වෙන් කරලා තියෙන්නේ බිලියන 4.3 යි. උසස් අධ්‍යාලනය වගේ ළමයි තුන් ගුණයක් ඉන්නවා හැබැයි වියදම විශාල ප්‍රමාණයකින් අඩුයි.”

වෘත්තීය අධ්‍යාපන නියෝජ්‍ය අමාත්‍ය නලින් හේවගේ පාර්ලිමේන්තුවේදී වැඩි දුරටත් අවධාරණය කර තිබුනේ සාමාන්‍ය පෙළ අසමත් වන දරුවන් වෘත්තිය අධ්‍යාපනය හරහා සමාජ ගත කිරීම අනිවාර්යෙන්ම සිදු කළ යුතු බවයි.