සතියකට ඉහතදී දිවයිනට බලපෑ වැසි සහිත කාලගුණ තත්වය සමග උතුරට ඇද හැළුනු ධාරානිපාත වර්ෂාවෙන් එකතු වු ජලය මුහුදට ගලා යැවීමට බලධාරීන් පියවර නොගැනීම නිසා යාපනයේ දහස් සංඛ්‍යාත පිරිසකගේ ජීවිකාවට මරු පහරක් එල්ල වී තිබේ.
පළාත් බද වාර්තාකරුවන් පවසන්නේ වැසි ජලය බැස නොයෑම නිසා යාපනය, තෙන්මරාච්චි ප්‍රාදේශීය ලේකම් කොට්ඨාසයට අයත් වරනි ප්‍රදේශයේ ගම් කිහිපයකම ජනයාගේ වගා කළ ඉඩම් අක්කර දස දහස් ගණනක් විනාශ වී ඇති බවයි.
ඒකරාශී වී ඇති වැසි වතුර ගලා යාම සඳහා සොරොව් විවෘත කළොත් කරදිය ගොඩට ගලනු ඇති බවට ප්‍රාදේශීය බලධාරීහු පවසති.
සිය වගා භුමි තුළ රැදී පවතින කර වටක් වු ජලයට බැස සිය ජීවනෝපාය රැක දෙන්නැයි රජයට බල කරමින් විරෝධතා දියත් කළ නාවට්නාඩු ගම්මානයේ ජනතාව සඳහන් කළේ ජලය බැස නොයෑම හේතුවෙන් වරනි ප්‍රදේශයේ වගා කළ ඉඩම් අක්කර 40000 ක් පමණ ජලයෙන් යටවී ඇති බවයි.
පළාත් බද වාර්තාකරුවන් පවසන පරිදි තෙන්මරාච්චි ප්‍රදේශිය ලේකම් කොට්ඨාසයට අයත් වරනි ප්‍රදේශයේ ගම් කිහිපයකම පවුල් 4000 ක් පමණ ජීවත් වන අතර ඔවුන්ගෙන් බහුතරයකම ජීවින උපාය මාර්ගය වී ඇත්තේ වී ගොවිතැනයි.
“අනුර ආණ්ඩුව ඇස් ඇර බලන්න, කෘෂිකර්මාන්තය විනාශ කරන්න එපා, ජීවත් වෙන්න මාර්ගයක් සලසන්න, ගොවීන්ගේ ඉරණම වෙනස් වෙන් නැද්ද?“ ආදී සටන් පාඨ කියමින් ජලයේ බැස විරෝධතා දියත් කළ පිරිස අතර සිටි නාවට්නාඩු ගම් වැසියකු සඳහන් කළේ මුහුදු ජලය ගොඩ බිමට පැමිණෙන බව පවසමින් බලධාරීන් තොණ්ඩමනාරු අමුණ විවෘත නොකරන නිසා තමන්ට ඇති එකම විකල්පය සිය භුමියට වතුර පැමිණිම වැලැක්වීම වෙනුවෙන් වේල්ලක් ඉදි කිරීම බවයි.
“ තොණ්ඩමනාරු අමුණ විවෘත නොකර මුහුදට යන ජලය නතර කළහොත් තෙන්මරාච්චි නැඟෙනහිර ප්‍රදේශයේ බොහෝ ගම් වලින් එන වතුර වරණි ප්‍රදේශයට ඇතුල් විය නොහැකි ආකාරයට අපි බැම්මක් හදනවා. වෙනත් විකල්පයක් නැහැ. අපේ භූමිය හරහා වතුර ගිහින් මුහුදට එක්වන විදියට තමයි ඇළ ඉදිකරලා තිබුනේ. නමුත් දැන් වතුර එකතැන පල්වීම නිසා අපේ ජීවනෝපාය අඩාල වෙලා. ඒ නිසා අපේ ඊළඟ පියවර තමයි බැම්ම හදන එක. අපට විකල්පයක් නැහැ”
පෙර වසර වලට වඩා උතුරට ඇද හැළුනු වර්ෂාවෙන් එකතු වු ජලය කෘෂි භුමි තුළ එක තැන රැදී තිබීම නිසා සිය ජීවන උපාය අහිමි වීමෙන් දහස් සංඛ්‍යාත ගම් වැසියන්ට සිඟමන් යැදීමට සිදු වනු ඇතැයි තවත් ගම් වැසියෙකු බිය පළ කළේය.
“මේ වගේ කවදාවත් වතුර පල් වෙන්නේ නැහැ. සුළු වශයෙන් එකතැන පල්වෙන අවස්ථාවකදී වේල්ල විවෘත කිරීමට නිලධාරීන් පියවර ගන්නවා. කොහොම උනත් මෙම අධික වර්ෂාව නිසා බෙල්ල උසට වතුර ගොඩගැසී තියනවා. මුහුදු මට්ටම ඉහළ යමින් පවතින නිසා ගොඩබිම් මට්ටම පහත වැටෙමින් ඇති බව නිලධාරීන් පවසනවා. මෙම ප්‍රදේශයේ ජීවනෝපාය කෘෂිකර්මාන්තයයි. මෙහෙම ගියොත් හිඟා කන්න වෙනවා.”
පළාත් බද වාර්තාකරුවන් පවසන්නේ තොණ්ඩමනාරු පාලමට යටින් අමුණක් ඉදි කර ඇති අතර එහි සොරොව්ව විවෘත නොකිරීම නිසා වරනි ප්‍රදේශයේ කෘෂි කාර්මික භුමියේ රැදී පවතින වැසි ජලය මුහුදට බැස නොයන බවට ප්‍රදේශවාසීන් චෝදනා කළත් එම වේල්ල විවෘත කළහොත් මුහුදු ජලය ගොඩබිමට පැමිණෙන බව එය බාරව සිටින බලධාරීන් පවසන බවයි.
Facebook Comments
