තමිල් අරසු මන්ත්‍රීවරුන් ජනාධිපතිගෙන් ඉල්ලුවේ මොනවාද?

අධිකරණ යාන්ත්‍රණයකින් තොර අතුරුදහන් වු තැනැත්තන් පිළිබඳ කාර්යාලය උතුරු නැගෙනහිර දෙමළ ජනතාව විසින් ප්‍රතික්ෂේප කරන බව දෙමළ ජනතා නියෝජිත පිරිසක් ජනාධිපතිවරයාට දැනුම් දී තිබේ.

ඉලංගෙයි තමිල් අරසු කච්චි පාර්ලිමේන්තු මන්ත්‍රී ෂානක්කියන් රාසමාණික්කම් අගනගරයේ මාධ්‍යවේදීන් වෙත ඒ බව හෙළි කර සිටියේ ජනාධිපති අනුර කුමාර දිසානායක සහ ඉලංගෙයි තමිල් අරසු කච්චි පාර්ලිමේන්තු මන්ත්‍රීවරුන් අතර දෙසැම්බර් 4 වැනිදා ජනාධිපති කාර්යාලයේදී පැවැති සාකච්ඡාවෙන් අනතුරුවයි.

” අතුරුදහන් වු තැනැත්තන් පිළිබඳ කාර්යාලයේ ක්‍රියාකාරීත්වය සතුටුදායක දැයි ජනාධිපතිවරයා විමසා සිටියා. අධිකරණ යාන්ත්‍රණයක් නොමැති නම් අපට එය අවශ්‍ය නොවන බවත්, අපේ ජනතාව එය පිළිගන්නේ නැ කියලත් අපි කිව්වා.”

2016 අංක 14 දරන අතුරුදහන් වූ තැනැත්තන් පිළිබඳ කාර්යාලය පිහිටුවීම, පරිපාලනය කිරීම සහ කර්තව්‍ය ඉටු කිරීම පනතේ (සංශෝධිත පරිදි) විධිවිධාන ප්‍රකාරව අතුරුදහන් වූ තැනැත්තන් පිළිබඳ කාර්යාලයේ OMP සාමාජික ධුරයන්ගේ පවතින පුරප්පාඩු පිරවීම සඳහා සුදුසුකම් සහිත තැනැත්තන්ගෙන් අයදුම්පත් කැඳවීම ආරම්භ කර ඇති බව පාර්ලිමේන්තු සන්නිවේදන දෙපාර්තමේන්තුව පසුගියදා නිවේදනය කර තිබුනි.

ජනාධිපති මාධ්‍ය ඒකකය නිවේදනය කර ඇත්තේ දෙසැම්බර් 4 වැනිදා පැවැති හමුවේදී ඉලංගෙයි තමිල් අරසු කච්චි පාර්ලිමේන්තු මන්ත්‍රීවරු දීර්ඝ කාලයක සිට උතුරු නැගෙනහිර ජනතාව මුහුණ දෙමින් සිටින ගැටලු පිළිබඳව ජනාධිපතිවරයා දැනුම්වත් කළ බවයි.

ඉලංගෙයි තමිල් අරසු කච්චි පාර්ලිමේන්තු මන්ත්‍රී ෂානක්කියන් රාසමාණික්කම් මාධ්‍යවේදීන් වෙත දෙමළ බසින් වැඩි දුරටත් පවසා තිබුනේ නියමිත කාලයටත් වැඩි කාලයක් දේශපාලන සිරකරුවන් බන්ධනාගාරගතව සිටින බව එම සාකච්ඡාව තුලදී ජනාධිපතිවරයා ප්‍රකාශ කළ බවයි.

”දේශපාලන සිරකරුවන්ට ඇප ලබාදීම ගැන අලුත් යෝජනාවක් මම ඉදිරිපත් කරා. ඇප දෙනවා නම් සතියකට සැරයක් පොලිසියක අත්සන් කරන්න කටයුතු කරන්න පුළුවන්ද කියලා බලනවා කියලා ජනාධිපති කිව්වා. ඔවුන් කළ අපරාධයට අමතරව දීර්ඝ කාලයක් බන්ධනාගාරගතව සිටින බවද ජනාධිපතිවරයා සඳහන් කළා. ඔවුන් නිදහස් කළ යුතුය යන ස්ථාවරයට තමන් එකඟ වන බවද ජනාධිපතිවරයා ප්‍රකාශ කළා.”

හතලිස් අවුරුද්දකට ආසන්න කාලයක් තිස්සේ නැගෙනහිර පළාතේ අම්පාර දිස්ත්‍රික්කයේ කල්මුණේ උතුර උප ප්‍රාදේශීය ලේකම් කාර්යාලය, ප්‍රාදේශීය මහ ලේකම් කාර්යාලයක් ලෙසට උසස් නොකිරීම නිසා එම ප්‍රදේශයේ ජීවත් වන දෙමළ ජනයා ගැටළු රැසකට මුහුණ දී සිටින ආකාරයත් ඉලංගෙයි තමිල් අරසු කච්චි (ITAK) නියෝජිතයන් ජනාධිපතිවරයා දැනුවත් කර තිබේ.

”කල්මුණේ උතුර ප්‍රාදේශීය ලේකම් කාර්යාලය ගැනද කතා බහට ලක්කරා. කල්මුණේ උතුර ප්‍රාදේශීය ලේකම් කාර්යාලය සම්බන්ධයෙන් තමන් නිසි ක්‍රියාමාර්ගයක් ගන්නා බවත් අමාත්‍යාංශ ලේකම්වරයාට කතා කරන බවත්, ඒ වගේම ඉඩම් ප්‍රශ්න ගැන අදාළ දෙපාර්තමේන්තු සමඟ කතා කරන බවත් ජනාධිපතිතුමා කිව්වා. අපි යෝජනා කරන සංවර්ධන ව්‍යාපෘති කිහිපයක් අයවැයට ඇතුළත් කරන බවත් ඔහු කිව්වා.”

පෙඩරල් පාලනයක්

දෙමළ ජනයා බලාපොරොත්තු වන දේශපාලන විසදුම මෙන්ම දීර්ඝ කාලයක සිට උතුරු නැගෙනහිර ජනතාව මුහුණ දෙමින් සිටින පහත සදහන් ගැටලු පිළිබඳවත් ජනාධිපතිවරයා දැනුවත් කළ බවයි ෂානක්කියන් රාසමාණික්කම් මන්ත්‍රීවරයා පවසන්නේ.

”අපි බලාපොරොත්තු වෙන්නේ ඒකාබද්ධ උතුරු-නැගෙනහිරක ෆෙඩරල් පාලනයක් පදනම් කරගත් දේශපාලන විසඳුමක්. අපේ පක්‍ෂයේ ස්ථාවරය විදියට අපි මේක කිව්වා. දේශපාලන සිරකරුවන් නිදහස් කිරීම ගැන අපි කතා කළා. ත්‍රස්තවාදය වැලැක්වීමේ පනත භාවිතා කිරීමට අපේ විරුද්ධත්වය ප්‍රකාශ කරා. ඉඩම් කොල්ලය, මහවැලි, වන, පුරාවිද්‍යාව, වන සංරක්ෂණ දෙපාර්තමේන්තුව, වෙරළ ආරක්ෂක අංශය, ඒ දෙපාර්තමේන්තු හරහා සිදුවන ඉඩම් කොල්ලය ගැනත් කතා කළා. හමුදා කඳවුරු ඉවත් කිරීම ගැනත් අපි කතා කළා. අපේ අතුරුදන් වූවන්ට යුක්තිය ඉටු කිරීම ගැනත් අපි කතා කළා.”

ඉදිරියේදී නව ආණ්ඩුක්‍රම ව්‍යවස්ථාව සකස් කරන විට දේශපාලන විසඳුම සම්බන්ධයෙන් දෙමළ ජනතා නියෝජිතයන් ඉදිරිපත් කළ ස්ථාවරය පිළිබදව තව දුරත් විමසා බැලිය හැකි බව ජනාධිපතිවරයා සදහන් කළේයැයි ෂානක්කියන් රාසමාණික්කම් මන්ත්‍රීවරයා අගනගරයේ මාධ්‍යවේදීන්ට දැනුම් දී තිබුනි.

මෙම සාකච්ඡාව සදහා සිවඥානම් ශ්‍රීධරන්, පත්මනාදන් සත්‍යලිංගම්, ෂන්මුගම් කුගදාසන්, ෂානක්කියන් රාසමාණික්කම්, ඥානමුත්තු ශ්‍රීනේසන්, කවීන්දිරන් කෝඩීස්වරන්, ඉලයතම්බි ශ්‍රීනාත්, තුරෙයිරාසා රවිහරන් යන ඉලංගෙයි තමිල් අරසු කච්චි (ITAK) පාර්ලිමේන්තු මන්ත්‍රීවරු සහභාගි වූ බව ජනාධිපති මාධ්‍ය අංශය නිවේදනය කර තිබේ.