මහවිරු සමරු නිසා අත් අඩංගුවට ගත් හතරකට උසාවියෙන් ඇප

එල්.ටී.ටී.ඊ මහවිරු දින සැමරුම් සම්බන්ධයෙන් සමාජ මාධ්‍ය තුළ අසත්‍ය ප්‍රචාර සිදු කරමින් මහජනයා නොසන්සුන් කිරීමේ චෝදනා යටතේ අත්අඩංගුවට ගත් පස් දෙනකුගෙන් හතරක් අධිකරණය විසින් ඇප මත නිදහස් කර තිබේ.

මහවිරු දින සැමරුම සම්බන්ධයෙන් සමාජ මාධ්‍ය ඔස්සේ පෝස්ටුවක් බෙදාහැරීම නිසා මාතර පරිගණක අපරාධ කොට්ඨාසයෙන් අත්අඩංගුවට ගත් තරුණයා දෙසැම්බර් 17 වැනිදා දක්වා රක්ෂිත බන්ධනාගාරගත කරන ලෙසයි අධිකරණය නියෝග කර ඇත්තේ.

සමාජ මාධ්‍ය ඔස්සේ අසත්‍ය තොරතුරු පලකිරීමේ චෝදනාවට අපරාධ පරීක්ෂණ දෙපාර්තමේන්තුව විසින් අද (5) පෙරවරුවේ අත්අඩංගුවට ගන්නා ලද ශ්‍රී ලංකා පොදුජන පෙරමුණේ පාලක ලේකම් රේණුක පෙරේරා හවස් යාමයේ කොළඹ අතිරේක මහේස්ත්‍රාත් මංජුල රත්නායක විසින් ඇප පිට මුදා හැර තිබේ.

දෙමළ ඊලාම් විමුක්ති කොටි සංවිධානයේ නායකයාගේ ඡායාරූපයක් මුහුනු පොතේ පළ කිරීම නිසා නොවැම්බර් 30 වැනිදාට එළිවන විට ත්‍රස්ත මර්දන හා විමර්ශන කොට්ඨාශය (CTID) විසින් අත්අඩංගුවට ගත් යාපනයේ ඉනුවිල් බටහිර, චුන්නාක්කම් හි පදිංචි මනෝහරන් ගජන්දරූබන් ද දෙසැම්බර් 1 වැනිදා මහේස්ත්‍රාත් වරයාට ඉදිරිපත් කිරීමෙන් පසු දෙසැම්බර් 4 වැනිදා දක්වා රක්ෂිත බන්ධනාගාර ගත කර තිබුනි.

මනෝහරන් ගජන්දරූබන් දෙසැම්බර් 4 වැනි බදාදා යළි යාපනය මහේස්ත්‍රාත් අධිකරණය වෙත ඉදිරිපත් කළ අවස්ථාවේ මහේස්ත්‍රාත් ඒ.ඒ.ආනන්දරාජා විසින් ඔහු රුපියල් ලක්ෂ දෙකක ඇප මත මුදා හැර ඔහුට විදේශ ගමන් තහනමක්ද පැනවීමට නියෝග කළ බවයි පළාත් බද වාර්තාකරුවන් පවසන්නේ.

එල්.ටී.ටී.ඊ මහවිරු දින උත්සව සැමරුම් සම්බන්ධයෙන් අසත්‍ය ප්‍රචාර සිදු කරමින් මහජනයා නොසන්සුන් කිරීමේ චෝදනා යටතේ දෙසැම්බර් 1 වැනිදා කොළඹ කොටුව පරිගණක අපරාධ අංශය විසින් සැකපිට අත්අඩංගුවට ගත් දේශපාලන හා සමාජ මාධ්‍ය ක්‍රියාකාරිකයකු වන වන කැලුම් ජයසුමන ද කොළඹ අලුත්කඩේ මහේස්ත්‍රාත් අධිකරණය වෙත ඉදිරිපත් කිරීමෙන් පසු දෙසැම්බර් 4 වැනිදා දක්වා රිමාන්ඩ් භාරයට පත්කිරීමට නියෝග කර තිබුනි.

කැලුම් ජයසුමන යළි දෙසැම්බර් 4 දා අධිකරණයට ඉදිරිපත් කළ අවස්ථාවේ කොළඹ ප්‍රධාන මහෙස්ත්‍රාත් තිළිණ ගමගේ නියෝග කර ඇත්තේ ඔහුද ඇප මත මුදා හරින ලෙසයි.

විමර්ශන කටයුතු අවසන් වී නොමැති හෙයින් මෙම සැකකරු තවදුරටත් රක්ෂිත බන්ධනාගාරගත කරන ලෙස අපරාධ පරීක්ෂණ දෙපාර්තමේන්තුවේ නිලධාරීන් අධිකරණයෙන් ඉල්ලා සිටි අවස්ථාවේ මහෙස්ත්‍රත්වරයා අපරාධ පරීක්ෂණ දෙපාර්තමේන්තුවේ නිලධාරීන්ගෙන් විමසා ඇත්තේ කැලුම් ජයසුමනගේ ක්‍රියාව නිසා මහජන සාමය කඩ වූ බව තහවුරු කෙරෙන ප්‍රකාශ සටහන් කර අධිකරණයට ඉදිරිපත් කර තිබේදැයි යන්නයි.

එවැනි ප්‍රකාශ සටහන් කර අධිකරණයට ඉදිරිපත් කර නොමැති බව අපරාධ පරීක්‍ෂණ දෙපාර්තමේන්තුවේ නිලධාරීන් සඳහන් කළේයැයි දකුනේ ජනමාධ්‍ය වාර්තා කර තිබේ.

මහජන කැලඹීමක් සිදුවූ බව තහවුරු කෙරෙන සාක්ෂි නොමැතිව මෙම සැකකරු තවදුරටත් රක්ෂිත බන්ධනාගාර ගත කරන්නේ කෙසේදැයි ප්‍රශ්න කළ කොළඹ ප්‍රධාන මහෙස්ත්‍රාත් තිළිණ ගමගේ තමන්ට සාක්ෂි නොමැතිව සැකකරුවන් රක්ෂිත බන්ධනාගාර ගත කළ නොහැකි බව අවධාරණය කර ඇත.

අධිකරණය වෙත සාක්ෂි ඉදිරිපත් නොකොට සිතේ තිබෙන දේවල් පදනම් කරගෙන සැකකරුවන් රක්ෂිත බන්ධනාගාරගත කළ නොහැකි බව අවධාරණය කළ මහෙස්ත්‍රාත්වරයා ඒ අනුව සැකකරු ශරීර ඇප දෙකක් මත මුදා හැරීමට නියෝග කර පැමිණිල්ල නැවත අප්‍රේල් මස 03 වැනිදා කැඳවන ලෙසත් නියෝග කළ බව ඔහු වෙනුවෙන් පෙනී සිටි නීතිඥ ප්‍රේමනාත් සී දොලවත්ත පවසා ඇත.

එල්.ටී.ටී.ඊ මහවිරු දින උත්සව සැමරුම් සම්බන්ධයෙන් අසත්‍ය ප්‍රචාර සිදු කරමින් මහජනයා නොසන්සුන් කිරීමේ චෝදනා යටතේම අත් අඩංගුවට ගන්නා ලද මරදානේ පදිංචි 45 හැවිරිදි කැලුම් හර්ෂණ කොළඹ මහේස්ත්‍රාත් අධිකරණයට දෙසැම්බර් 2 වැනිදා ඉදිරිපත් කිරීමෙන් පසුව සැකකරු ඇප මත මුදා හැරීමට කොළඹ මහේස්ත්‍රාත් තිලිණ ගමගේ එදින නියෝග කර තිබුනි.

දෙසැම්බර් 17 තෙක්

මහවිරු දින සැමරුම සම්බන්ධයෙන් සමාජ මාධ්‍ය ඔස්සේ පෝස්ටුවක් බෙදාහැරීම නිසා මාතර පරිගණක අපරාධ කොට්ඨාසයෙන් අත්අඩංගුවට ගත් බද්දේගම කිරිබතාවිල පදිංචි එදිරිසූරිය මද්දුමගේ ජනිත චතුරංග නමැති 28 හැවිරිදි තරුණයා දෙසැම්බර් 17 වැනිදා දක්වා රක්ෂිත බන්ධනාගාරගත කර කිරීමට බද්දේගම දිසා විනිසුරු/ මහේස්ත්‍රාත් සනත් නානායක්කාර දෙසැම්බර් 3 වැනිදා නියෝග කර තිබුනි.

දකුනේ ජනමාධ්‍ය වාර්තා කර තිබුනේ සැකකරු බද්දේගම මහෙස්ත්‍රාත් අධිකරණ පරිශ්‍රයට රැගෙන ආ අවස්ථාවේදී ඔහුගේ ඥාතීන් ඇතුළු සිවිල් ක්‍රියාකාරීන් පිරිසක් විසින්, ජනිත චතුරංග අත්අඩංගුවට ගැනීම හෙලා දකිමින් නිහඬ විරෝධයක්ද දියත් කළ බවයි.