දෙමළ මහවිරු සමරුවට පුවක් පැළ බෙදුවාට පොලිසිය ප්‍රශ්න කරයි

උතුරේ මහවිරු සැමරුමක් සංවිධානය කළ දෙමළ ජාතිකයකුගෙන් පොලීසිය ප්‍රශ්න කර තිබේ.

එහිදී දෙමළ ජාතික පුෂ්පය ලෙස සැලකෙන නියඟලා මල මෙන්ම අනුස්මරණයට දායක වූ ඥාතීන්ට බෙදාදුන් පුවක් පැළ ගැනද පොලිසියේ විශේෂ අවධානය යොමුවූ බව වාර්තා වේ.

පළාත් බද වාර්තාකරුවන් පවසන්නේ නොවැම්බර් 27 වැනිදා යාපනය, කොකුවිල් හන්දියේ මහවිරු දින සැමරුමේ සංවිධායකයා කැඳවා යාපනය පොලීසිය දෙසැම්බර් 8 වැනි ඉරිදා විනාඩි 45 ක පමණ කාලයක් ප්‍රකාශ සටහන් කරගෙන ඇති බවයි.

සිය මිතුරා සමග පොලිස්ථානයට ගොස් ප්‍රකාශ ලබා දීමෙන් පසු අමුදන් මාධ්‍යවේදීන් වෙත සදහන් කර තිබුනේ මහවිරු දින සැමරුම සංවිධානය කිරීමට මුල්‍ය අනුග්‍රහය සහ එහි සංවිධාන කටයුතු වලට සහාය ලබා දුන්නේ කවුදැයි පොලීසිය තමාගෙන් ප්‍රශ්න කළ බවයි.

“කවුද මේක කළේ? ඔබ සංවිධානය කළේ කොහොමද? මුදල් ආධාර ලබා දුන්නේ කවුද? කියලා ඔවුන් ඇසුවා. කාර්තිකෙයි (නියඟලා) මල ඇතුළු පින්තූර ඔබට ලැබුණේ කොහෙන්ද කියලා ඔවුන් ප්‍රශ්න කරා. අපි කිව්වා අන්තර්ජාලයෙන් ගත්තා කියලා. ඔයා එක්ක තව කවුද සංවිධානය කළේ කියලා ඇහුවා. මගේ යාළුවා තමයි උදව් කරේ කියලා මම කිව්වා. ”

ඔහුගේ මිතුරාගෙන් පොලීසිය ප්‍රකාශ සටහන් කර ගෙන නොමැති බව පළාත් බද වාර්තාකරුවෝ පවසති.

මහවිරු දින සැමරුම වෙනුවෙන් කොඩි මසාගත් පුද්ගලයාගෙන් මෙන්ම එදින පැළ බෙදාදීම සිදු කළ අයගෙන්ද පොලීසිය ප්‍රශ්න කර ඇති බවයි අමුදන් වැඩි දුරටත් පවසන්නේ.

“අපි ටේලර් සාප්පුවකින් කොඩි මහලා ගත්තා. එයාගෙනුත් පොලීසිය ප්‍රශ්න කරලා තියනවා. මින් ඉදිරියට අපිට මේ වගේ වැඩ කරලා දෙන්න එපා කියලා පොලිසියෙන් ඔහුට තර්ජනය කරලත් තියනවා. මියගිය පුද්ගලයන් සිහිකර පුවක් පැළ පරිත්‍යාග කළ පුද්ගලයාගෙන් ද පොලිසිය ප්‍රශ්න කරලා තිබෙනවා.”

උතුරු නැගෙනහිර දෙපළාතේ මහවිරු සැමරුම් පැවැත්වීම සම්බන්ධයෙන් නව රජයේ ස්ථාවරය පැහැදිලි කරමින් කැබිනට් මාධ්‍ය ප්‍රකාශක අමාත්‍ය වෛද්‍ය නලින්ද ජයතිස්ස නොවැම්බර් 26 වැනි අගහරුවාදා සඳහන් කර තිබුනේ ත්‍රස්තවාදී හා තහනම් සංවිධානයක සැමරුම්, ලාංඡන, කොඩි, පතාක කිසිවක් ප්‍රදර්ශනය කිරීමට අයිතියක් නොමැති බවයි.

කෙසේ වෙතත් මියගිය ඥාතීන් සැමරීමට දෙමළ ජනතාව සතු අයිතියට ගරු කරන බව අමාත්‍යවරයා ප්‍රකාශ කර තිබුණි.

මහජන ආරක්ෂක සහ පාර්ලිමේන්තු කටයුතු අමාත්‍ය ආනන්ද විජේපාල දෙසැම්බර් 4 වැනිදා පාර්ලිමේන්තුවේදී සදහන් කර තිබුනේ නොවැම්බර් 21 සිට 27 දක්වා සතිය තුල උතුරු නැගෙනහිර පුරා ස්ථාන 244ක දෙමළ මහවිරු සමරුව පැවැත්වුණු අතර ඒ අතරින් යම් යම් LTTE සංකේත ප්‍රදර්ශනය කළ ස්ථාන 10ක් සම්බන්ධයෙන් නීතිමය කටයුතු අරඹා ඇති බවයි.

දෙමළ ඊලාම් විමුක්ති කොටි සංවිධානයේ නායකයාගේ ඡායාරූපයක් මුහුනු පොතේ පළ කිරීම නිසා නොවැම්බර් 30 වැනිදාට එළිවන විට ත්‍රස්ත මර්දන හා විමර්ශන කොට්ඨාශය (CTID) විසින් අත්අඩංගුවට ගත් යාපනයේ ඉනුවිල් බටහිර, චුන්නාක්කම් හි පදිංචි මනෝහරන් ගජන්දරූබන් ද දෙසැම්බර් 1 වැනිදා මහේස්ත්‍රාත් වරයාට ඉදිරිපත් කිරීමෙන් පසු දෙසැම්බර් 4 වැනිදා දක්වා රක්ෂිත බන්ධනාගාර ගත කළ අතර ඔහු එදින යාපනය මහේස්ත්‍රාත් අධිකරණය වෙත ඉදිරිපත් කළ අවස්ථාවේ මහේස්ත්‍රාත් ඒ.ඒ.ආනන්දරාජා විසින් මනෝහරන් ගජන්දරූබන් රුපියල් ලක්ෂ දෙකක ඇප මත මුදා හැර ඔහුට විදේශ ගමන් තහනමක්ද පැනවීමට නියෝග කළ බවයි පළාත් බද වාර්තාකරුවන් පවසන්නේ.