ජනපති අනුරගේ මංගල රාජාසන කතාව ගැන දෙමළ නායකයන් නොසතුටෙන්

දෙමළ ජනතාව දීර්ඝ කාලීනව පීඩා විදින ගැටළු වලට ලබා දෙන දේශපාලන විසදුම සම්බන්ධයෙන් නව රජයේ ප්‍රතිපත්ති ප්‍රකාශය තුළ ඇතුලත් නොවීම පිළිබදව උතුරු, නැගෙනහිර දෙමළ ජනතා නියෝජිතයන්ගේ කනස්සල්ල පළ වී තිබේ.

අලුත් ආණ්ඩුවේ මංගල ප්‍රතිපත්ති ප්‍රකාශය ඉදිරිපත් කරමින් නොවැම්බර් 21 වැනිදා ජනාධිපති අනුර කුමාර දිසානායක පාර්ලිමේන්තුව තුලදී දීර්ඝ ලෙස සිදු කළ රාජාසන කතාවේදී ජාතික ප්‍රශ්නයට ලබා දෙන විසදුම සම්බන්ධයෙන් අදහස් ඉදිරිපත් නොවු බවට ඔවුහු චෝදනා කරති.

දීර්ඝ කාලයක් ජනතාවගේ ප්‍රාර්ථනයක් බවට පත්වුණු ජාතික සමගිය ගොඩනැඟීමේ ඉතා ප්‍රබල අවස්ථාවක් දැන් නිර්මාණය වී තිබෙන බව ජනාධිපතිවරයා පාර්ලිමේන්තුව අමතා කියා සිටියේය.

එහෙත්, මහ මැතිවරණයේදී ඡන්ද 65,458 ක් ලබා යළිත් වරක් පාර්ලිමේන්තුවරම් හිමිකරගත් ඉලංගෙයි තමිල් අරසු කච්චි මඩකලපු දිස්ත්‍රික් පාර්ලිමේන්තු මන්ත්‍රී ශානක්කියන් රාසමානික්කම් මාධ්‍ය වෙත පවසා තිබුනේ දෙමළ ජනයා මුහුණ දී සිටින ගැටළුවලට නව රජය ලබා දෙන විසදුම් සම්බන්ධයෙන් ජනාධිපතිවරයා සෘජුවම සදහන් නොකළ බවයි.

”දෙමළ ජනතාවගේ දේශපාලන විසඳුම ගැන, දෙමළ ජනතාවගේ ජනවාර්ගික ප්‍රශ්නය ගැන, බලය බෙදීම ගැන හෝ වගවීම සම්බන්ධයෙන් අපරාධකරුවන්ට දඬුවම් කිරීම ගැන ඔහු සෘජුව කීවේ නැහැ. නමුත් පසුගිය කාලයේ ජනාධිපතිවරු මේ වගේ දේවල් ප්‍රවෘත්තිවලින් කිව්වත් ප්‍රායෝගිකව කරපු දෙයක් නැහැ.”

ඉලංගෙයි තමිල් අරසු කච්චි නියෝජනය කරමින් වන්නි දිස්ත්‍රික්කයෙන් මහ මැතිවරණයට තරග වැදී ජන්ද 11,215 ක් ලබා පාර්ලිමේන්තු මන්ත්‍රීවරයෙකු ලෙස පළමුවරට තේරී පත් වු තුරෙයිරාසා රවිහරන් මාධ්‍යවේදීන් සමග පවසා තිබුනේ කඩිනමින් ජනාධිපතිවරයා සහ අගමැතිවරිය මුණ ගැසී දෙමළ ජනයා මුහුණ දී සිටින ගැටළු සම්බන්ධයෙන් සාකච්ඡා කිරීමට බලාපොරොත්තු වන බවයි.

” අපේ උතුරු නැඟෙනහිර දෙමළ නිජභූමිය සම්බන්ධයෙන් වැඩිදුර අදහස් පළ කළේ නැහැ. නමුත් අපි ඉලංගෙයි තමිල් අරසු කච්චි (ITAK) මන්ත්‍රීවරුන් හැකි ඉක්මනින් ජනාධිපතිතුමා සහ අගමැතිතුමිය හමුවෙන්න වෙලාව ඉල්ලන්න ඉන්නේ. ඒ වෙලාවේ අපි අපේ ගැටළු ගැන සාකච්ඡා කරනවා.”

ඡන්ද 5,695 ක් ලබා පාර්ලිමේන්තු වරම් හිමිකරගත් ප්‍රජාතන්ත්‍රවාදී දෙමළ ජාතික සන්ධානයේ ( DTNA) වන්නි දිස්ත්‍රික් පාර්ලිමේන්තු මන්ත්‍රී ටෙලෝ නායක සෙල්වම් අඩෛක්කලනාදන් ජනාධිපතිවරයාට පුර්ණ සහයෝගය ලබා දීමට ඇති කැමැත්තද ප්‍රකාශ කරමින් මාධ්‍ය වෙත පවසා තිබුනේ ජාතියේ ප්‍රශ්නය ගැන ජනාධිපතිවරයා කතා නොකිරීම සම්බන්ධයෙන් තමාට කනස්සල්ලක් පවතින බවයි.

”නව ජනාධිපතිවරයාගේ කතාව සාදරයෙන් පිළිගන්න පුළුවන්. කෘෂිකර්මාන්තය සහ ධීවර කර්මාන්තය කෙරෙහි ඔහු වැඩි අවධානය යොමු කර තිබෙනවා. නමුත් එතුමා ජාතියේ ප්‍රශ්නය ගැන කතා නොකිරීම ගැන කනස්සල්ලක් තියෙනවා, එහෙම නැත්නම් එතුමාගේ කතාව මේ රටේ ඉදිරි ගමන වෙනුවෙන් කරන කතාවක්. ඒ සඳහා පූර්ණ සහයෝගය ලබාදීමට අපි සූදානම්.”

රට තුළ ජාතිවාදී දේශපාලනයට ඉඩ නොදෙන බවට, රාජාසන කතාවේදී නව රජයේ ප්‍රතිපත්ති ප්‍රකාශය ඉදිරිපත් කරමින් සහතික වු ජනාධිපති අනුර කුමාර දිසානායක ශ්‍රී ලංකාවේ ආන්දෝලනයට තුඩු දුන් අපරාධ පිළිබදව විමර්ශනය කර වින්දිතයන්ට සාධාරණය ඉටු කිරීමටත් පාර්ලිමේන්තුව්දී සහතික වී තිබුනි.

දීර්ඝ කාලයක් ජනතාවගේ ප්‍රාර්ථනයක් බවට පත්වු ජාතික සමගිය ගොඩනැඟීමේ ඉතා ප්‍රබල අවස්ථාවක් දැන් නිර්මාණය වී තිබෙන බව පෙන්වා දුන් ජනාධිපතිවරයා යළි රට තුළ ජාතිවාදී දේශපාලනයට හෝ කවර පන්නයේ හෝ ආගමික අන්තවාදයකට හිස එසවීමට ද ඉඩ නොදෙන බවටත් අවධාරණය කළේය.

”දේශපාලනය කිරීමට අපට ඕනෑ තරම් සටන් පාඨ තිබෙන්න පුළුවන්. නමුත් කිසිවෙකුට යළි අප රටේ දේශපාලන බලය අත්පත් කර ගැනීම වෙනුවෙන් ජාතිවාදී, ආගම්වාදී සටන් පාඨ ගොඩනැඟීමට ඉඩ නොදෙන්නට අප සහතික වෙනවා.”

නීතිය පිළිබඳ ජනතාවගේ බිඳ වැටුණු විශ්වාසය නැවතත් තහවුරු කළ යුතු බව එහිදි පැවසු ජනාධිපති අනුර කුමාර දිසානායක කිසිවෙකුගෙන් පළි ගැනීමේ, කිසිවෙකු හඹා ගොස් දඩයම් කිරීමේ වුවමනාවක් නොමැති අතර හැම දෙනාටම නිදහසේ දේශපාලනය කිරීමේ අයිතිය තහවුරු කරන බවත් පවසා තිබුනි.

නමුත් ලංකාවේ ආන්දෝලනයට තුඩු දී ඇති අපරාධ විශාල ප්‍රමාණයක් තිබෙන බව පවසන ජනාධිපතිවරයා නීතිය පිළිබඳ ජනතාවගේ විශ්වාසය තහවුරු කිරීමට නම් ආන්දෝලනයට තුඩු දී තිබෙන අපරාධ පිළිබඳ යළි විමර්ශණය කොට වින්දිතයන්ට සාධරණත්වයත්, අපරාධකරුවන්ට දඬුවමත් ලබා දිය යුතු බවයි සදහන් කළේ.

ආන්දෝලනයට තුඩු දී තිබෙන අපරාධවලට සම්බන්ධ වගඋත්තරකරුවන් හෙළිදරව් කරන බවටත්, ඔවුන් නීතිය හමුවට ගෙන ගොස් වින්දිතයන්ට සාධාරණය ඉටු කරන බවටත් ජනාධිපතිවරයා තව දුරටත් සහතික වී තිබුනේ පහත අයුරිනි.

”තමන්ගේ ඥාතීන් මිය යාමේ ප්‍රකාශන මේ ජනවරම තුළ තිබෙනවා. ඝාතනයට ලක් වූවන්ගේ මිතුරන්ගේ අඳෝනාව මෙම ජනවරම තුළ තිබෙනවා. ඒ සඳහා අප යුක්තිය ඉටු කරන්නේ නැත්නම් කවුද එය ඉටු කරන්නේ, කාටද එය භාර දෙන්නේ. අප විසින් මේ දේ ඉටු කරන්නේ නැත්නම් යුක්තිය, සාධාරණය පිළිබඳ මේ රටේ සිහින මැරෙනවා.ඒ නිසා යුක්තිය සහ සාධාරණත්වය යළි මේ රට තුළ ස්ථාපිත කළ යුතුයි. ”

අපරාධ හා තුඩු දී තිබෙන වංචා දුෂණ පිළිබඳ නීතිය ඉටු කොට නීතියේ විධානයේ ආධිපත්‍යත්, නීතිය පිළිබඳ ජනතාවගේ තිබෙන විශ්වාසයත් යළිත් තහවුරු කිරීමට කටයුතු කළ යුතු බවත් ඔහු තව දුරටත් සදහන් කළේය.