යෝජිත නව ව්‍යවස්ථාව හරහා ඒකීය රටක් තුළ රට නොබෙදා බලය බෙදීමේ වැඩපිළිවෙල සඳහා පාර්ලිමේන්තුවේ පක්ෂ විපක්ෂ සියලු දෙනාගේ සහයෝගය හිමිව ඇති බව අග්‍රමාත්‍යවරයා පවසනවා.
ජනවර්ග අතර සංහිඳියාව ඇති කිරීම උදෙසා බලය බෙදීමේ වැඩපිළිවෙල ක්‍රියාත්මක කළ යුතු බවට අගමැතිවරයා කියා සිටියේ මරදාන සුදුවැල්ල ප්‍රදේශයේ අභිනවයෙන් ඉදිකෙරුණු බුද්ධ ප්‍රතිමා වහන්සේ නිරාවණය කිරීමේ අවස්ථාවට එක්වෙමිනි.
රට තුළ ජාතික සංහිඳියාව ඇති කිරීමේදී රට නොබෙදා බලය බෙදන්නේ කෙසේද යන්න කල්පනා කළ යුතු අතරම ඒකීය භාවය ශක්තිමත් කිරීම සඳහා බලය බෙදා හැර එක් එක් ප්‍රදේශවල සිටින ජනතාවට තමන්ගේ වැඩකටයුතු සිදු කිරීමට හා තමන්ගේ ආගම ඇදහීමට අවස්ථාව ලබා දිය යුතු බවයි අගමැති රනිල් අවධාරණය කරන්නේ.
රට බෙදන්න යෝජනා නැහැ
පළාත් සභා බලතල වැඩිකිරීම පිළිබඳ සංශෝධන උතුරේ මහ ඇමැතිවරයා පමණක් නොව දකුණේ මහ ඇමැතිවරුන් ද යෝජනා ඉදිරිපත් කර තිබුනද ඒ හරහා කිසිවෙකු රට බෙදන්න යැයි යෝජනා කර නැති බවද ඔහු මෙහිදී සඳහන් කෙළ්ය.
සෑම ජාතියක්ම, සෑම ජනකොටසක්ම එක්සත් වී ඒකීය ශ්‍රී ලංකාවක් හා ශ්‍රී ලාංකික අනන්‍යතාවයක් ඇති කළ යුතු බවට අවධාරණය කල අගමැතිවරයා හා ඒ සඳහා ආගමික සංහිඳියාව පමණක් නොව විවිධ ජන කොටස් අතර තිබෙන සංහිඳියාව ද වැදගත් වන බවයි වැඩි දුරටත් පෙන්වා දෙන්නේ.
Facebook Comments
