ආණ්ඩුකාර හිටපු ගුවන් හමුදාපති බාලිකා විදුහලක ගුරු මාරුවට උඩින් අත පොවලා

බස්නාහිර පළාත් අධ්‍යාපන ලේකම් විසින් මහාමායා බාලිකා විද්‍යාලයේ විදුහල්පතිනියට ලබා දුන් ස්ථාන මාරුව පළාත් ආණ්ඩුකාරවරයා විසින් අත්තනෝමතිකව නතර කර ඇති බවට දිවයිනේ ප්‍රමුඛතම ගුරු සංගමයක් චෝදනා කරයි.

ලංකා ගුරු සංගමය පෙන්වා දෙන පරිදි එම විදුහල්පතිනිය සම්බන්ධයෙන් පාසලේ ආචාර්ය මණ්ඩලය ඇතුළු විවිධ පාර්ශවයන් විසින් කරන ලද පැමිණිලි අනුව බස්නාහිර පළාත් අධ්‍යාපන ලේකම් විසින් මාර්තු 25 දිනැති ලිපිය මගින් ශ්‍රී ජයවර්ධනපුර කලාප අධ්‍යාපන අධ්‍යක්ෂිකාව වෙත දැනුම් දී ඇත්තේ නුගේගොඩ මහාමායා බාලිකා විදුහලේ විදුහල්පනියව වහාම ක්‍රියාත්මක වන පරිදි ජනාධිපති විද්‍යාලයේ නියෝජ්‍ය විදුහල්පතිනිය ලෙස මාරු කර යවන ලෙසයි.

බස්නාහිර පළාත් අධ්‍යාපන හා ක්‍රීඩා අමාත්‍යාංශයේ ලේකම් සිරිසේන ලොකුවිතාන ශ්‍රී ජයවර්ධනපුර කලාප අධ්‍යාපන අධ්‍යක්ෂිකාව වෙත යොමු කළ ලිපියේ සදහන්ව ඇත්තේ මහාමායා බාලිකා විදුහලේ විදුහල්පනිය වන අනුලා සුරවීර මොරවාලියද්ද කැදවා අඩුපාඩු නිවැරදි කරගන්නා ලෙස දන්වා සිටියද දිගින් දිගටම ලැබෙන පැමිණිලි අනුව මෙම වාතාවරණය විද්‍යාලයේ දරුවන්ගේ අධ්‍යාපනයට සෘජුවම බලපාන බව පෙනී යන බවයි.

“ඒ අනුව ඔබගේ 2023.11.15 දිනැති විමර්ශන වාර්තාවේ 9.2 වගන්තියට අදාල නිර්දේශ හා ලැබී ඇති පැමිණිලි සලකා වහාම ක්‍රියාත්මක වන පරිදි විදුහල්පතිනිය බප/ජය ජනාධිපති විද්‍යාලයේ නියෝජ්‍ය විදුහල්පතිනිය ලෙස ස්ථාන මාරු කරන අතර විද්‍යාලයේ වැඩ බැලීම සදහා සුදුසු නියෝජ්‍ය විදුහල්පතිනියක් පත් කරන ලෙස කාරුණිකව දන්වමි,” යි එම ලිපියේ වැඩි දුරටත් සදහන්ව තිබේ.

එසේ තිබියදී බස්නාහිර පළාත් ආණ්ඩුකාර එයාර් වයිස් මාර්ෂල් රොෂාන් ගුණතිලක විසින් මෙම ස්ථාන මාරුව අවලංගු කිරීමට කටයුතු කර ඇති බව පෙන්වා දෙන ගුරු සංගම් නායක ජෝසප් ස්ටාලින් අවධාරණය කරන්නේ පාසලේ ගුරු මණ්ඩලය සමග ගැටුම් ඇති කරගනිමින් සහ චෝදනාවන්ට ලක්ව විමර්ශනයට භාජනය වී සිටින මෙම විදුහල්පතිනියගේ ස්ථාන මාරුව මෙලෙස ආණ්ඩුකාරවරයා විසින් අවලංගු කිරීම හේතුවෙන් මහාමායා බාලිකා විදුහලේ පවතින ගැටලුකාරී තත්වය තවදුරටත් උත්සන්න වන බවයි.

මේ සම්බන්ධයෙන් ලංකා ගුරු සංගමය අප්‍රේල් 1 වැනි දින ආණ්ඩුකාරවරයාට කරුණු පැහැදිලි කළ අතර, ආණ්ඩුකාරවරයා විසින් අවලංගු කරන ලද ස්ථාන මාරුව වහා ක්‍රියාත්මක කරන ලෙස ද ඉල්ලා සිටි බව ලංකා ගුරු සංගමය අප්‍රේල් 02 වැනිදා නිකුත් කළ මාධ්‍ය නිවේදනයක සදහන්ය.

ලංකා ගුරු සංගමය වැඩිදුරටත් ඉල්ලා සිටින්නේ මේ තත්වය තුළ චෝදනාවට ලක්ව සිටින මහාමායා විදුහලේ විදුහල්පතිනියගේ ස්ථාන මාරුව වහා ක්‍රියාත්මක කර පාසලේ කටයුතු විධිමත්ව පවත්වාගෙන යාමේ වාතාවරණය සකසන ලෙසයි.

එසේ නොවන්නේ නම් ගුරුවරුන් සහ පාසල් ප්‍රජාව සමග ඒකාබද්ධව ඊට එරෙහිව ක්‍රියාමාර්ග ගැනීමට සිදුවන බව ද ජ්‍යෙෂ්ඨ වෘත්තිය සමිති නායක ජෝසප් ස්ටාලින් අනතුරු අගවා තිබේ.