ලොව පුරා ව්‍යාප්තවී යන කොවිඩ් 19 හෙවත් කොරෝනා වෛරසය ශ්‍රී ලංකාව තුල පාලනය කිරීමට සහ ජනතාව තුළ ඇති බියන් තුරන් කිරීමට එක්සත් ජාතික පක්ෂ නායකයා ජනාධිපතිවරයා හට උපදෙස් ලබා දී තිබේ.
සියලු දේශපාලන පක්ෂ නායකයන් සහ අදාළ ආයතන හා අධිකාරීන් කැඳවා සියලු දෙනාගේ අදහස් සැලකිල්ලට ගෙන මහජනතාවට හා අනෙකුත් සියලු පාර්ශ්වයන්ට පිළිගත හැකි ලෙස පරිපූර්ණ සැලසුමක් සකස් කරන ලෙසටයි රනිල් වික්‍රමසිංහ ඉල්ලා ඇත්තේ.
රෝග ව්‍යාප්තිය වැලැක්වීම සහ මේ වසන්ගත තත්වය නිසා මතුවන සමාජ ආර්ථික ගැටලු අවම කර ගැනීමට නම් සියලු දෙනාට පිළිගත හැකි පරිපූර්ණ සැලසුමක් අවශ්‍ය බව තමාගේ විශ්වාසය බව ගෝඨාභය රාජපක්ෂ ජනාධිපතිවරයා හට ලිපියක් යවමින් එජාප නායකයා දන්වා ඇත.
සිංහල සහ දෙමළ අලුත් අවුරුද්ද, පාස්කුව, රාමසාන් ආදී උත්සව සමයන්ද මහමැතිවරණය ද ඉදිරියේදී එළැඹෙන බැවින් වෛරසය පැතිරීම වේගවත් වී කුඩා ව්‍යාපරිකයින්, ගොවීන්, රජයේ හා පුද්ගලික අංශ සේවක සේවිකාවන්ට මෙන්ම පොදු මහජනතාවටද පීඩා සිදුවනු ඇති බවට ඔහු සියි ලිපියෙන් අනතුරු අඟවා තිබේ.
රෝග ව්‍යාප්තිය වැලැක්වීම උදෙසා රජය විසින් සැලසුම් සකස් කර ඇති බවට මාධ්‍ය වාර්තා කර ඇති බව පවසන එජාප නායක රනිල් වික්‍රමසිංහ ජනතාව අතර පැතිර යන බිය තුරන් කර හැක්කේ එම සැලැස්ම ප්‍රසිද්ධ කිරීම ඔස්සේ බව ජනාධිපති ගෝඨාභය රාජපක්ෂ හට පෙන්වා දී තිබේ.
මේ අතර මැතිවරණ කොමිසමේ සභාපති මහින්ද දේශප්‍රිය වෙත ලිපියක් යොමු කරමින් ලෝකය පුරා වසංගත තත්ත්වයක් පවතින මෙන්ම අවස්ථාවක මැතිවරණ සමයේ කටයුතු කළ යුතු ආකාරය පිළිබඳව විමසා ඇත.
”මැතිවරණ ප්‍රචාරණ ව්‍යාපාර සමයේදීද, සිංහල සහ දෙමළ අලුත් අවුරුද්ද, පාස්කු ආගමික වැඩසටහන් හා පාස්කු ප්‍රහාරය සිහිපත් කිරීමේ වැඩසටහන් සහ රාමසාන් උත්සව සමයන් හිදීද, ජනතාව ඒකරාශීවීම් බහුල බැවින් වෛරසය බෝවීම වේගවත්වීම වැළැක්විය නොහැකිය.”
එම පසුබිම සැලකිල්ලට ගනිමින්, මැතිවරණ ප්‍රචාරක කාලය තුල කවාරාකාර පියවර ගැනීමට බලාපොරොත්තු වන්නේද යන්න පිළිබඳවත්, මේ පිලිබඳව රජයේ සහ අදාළ අනෙකුත් ආයතනයන්ට ලබාදීම අපේක්ෂිත උපදෙස් කවරේද යන්න පිළිබඳවත් දැනුවත් කරන ලෙසටයි එජාප නායකයා වැඩි දුරටත් ඉල්ලා ඇත්තේ.
Facebook Comments
