ඇමරිකා එක්සත් ජනපදය එක්සත් ජාතීන්ගේ මානව හිමිකම් කවුන්සිල සාමාජිකත්වයෙන් ඉවත් වුවද ශ්‍රී ලංකාවේ සංහිඳියා ක්‍රියාවලිය සාර්ථක කර ගැනීමට දිගටම සිය සහාය ලබා දෙන බවට ප්‍රකාශ කර තිබේ.
එක්සත් ජාතීන්ගේ මානව හිමිකම් කවුන්සිලයෙන් ඇමෙරිකා එක්සත් ජනපදය ඉවත් වන බව ඇමෙරිකා රාජ්‍ය ලේකම් මයික් පොම්පෙඕ 19 අඟහරුවාදා නිවේදනය කර තිබුණි.
කෙසේ වෙතත් නිවේදනයක් නිකුත් කරමින් ශ්‍රී ලංකාවේ ඇමරිකානු තානාපති අතුල් කෙෂාප් පවසන්නේ තවදුරටත් මෙරට සංහිඳියාව හා දීර්ඝකාලීන සාමයක් උදා කරදීමේ ක්‍රියාවලියේදී ජාත්‍යන්තරයේදී ශ්‍රී ලංකාවට පූර්ණ සහයෝගය ලබාදෙන බව ලංකාවේ ජ්‍යෙෂ්ඨ නිලධාරීන් හමුවී දැනුම් දුන් බවයි.
ශ්‍රී ලංකාව ඇමරිකා එක්සත් ජනපදයේ සමඅනුග්‍රහය ඇතිව 2015 වසරේදී 30/1 සහ 2017 වසරේදී 34/1 යනුවෙන් යෝජනා දෙකක් එක්සත් ජාතීන්ගේ මානව හිමිකම් කවුන්සිලයට ඉදිරිපත් කරන ලදි.
එම යෝජනාවලියේ ගිවිස ගත් දෑ ඉටු කර ගැනීමට ඇමෙරිකා එක්සත් ජනපදය ශ්‍රී ලංකාවට පූර්ණ සහයෝගය ලබාදෙන බව ද අතුල් කෙෂප් තානාපතිවරයා නිකුත් කල නිවේදයේ සඳහන් වේ.
ශ්‍රී ලංකාව අදාළ යෝජනාවල ඇති කරුණු සපුරා ගැනීමේදී ප්‍රගතියක් අත්කර ගෙන ඇති බව පවසන තානාපතිවරයා ඉදිරියේදීත් ශ්‍රී ලංකාව සහ ඇමෙරිකාව අතර ද්විපාර්ශීය සබඳතා ශක්තිමත් කරගන්නා බව කියා සිටි.
ලොව පුරා මිතුරන් සහ පාර්ශවකරුවන් ඇති කරගැනීමට ශ්‍රී ලංකාවට ඇති හැකියාව තවදුරටත් තහවුරු කරගැනීමට ද ඇමෙරිකා එක්සත් ජනපදය සිය සහාය ලබා දෙන බව ශ්‍රී ලංකාවේ ඇමරිකානු තානාපති අතුල් කෙෂාප් නිකුත් කල නිවේදන්යේ වැඩි දුරටත් සඳහන් කර ඇත.
Facebook Comments
