ස්මාර්ට් ෆෝන් දාලා ප්‍රශ්න පත්තර උස්සලා

0

බස්නාහිර පළාතේ උසස් පෙළ විභාග මධ්‍යස්ථාන දෙකක සිදුව ඇති විභාග වංචා සම්බන්ධයෙන් වහාම පරීක්ෂණ ඉල්ලන ලංකාවේ ප්‍රමුඛ ගුරු සංගමයක් විභාගය පැවැත්වෙන අවස්ථාවේදී ප‍්‍රශ්න පත‍්‍රයක් පිට වී ඇති බවට සැක පළ කරයි.

ලංකා ගුරු සංගමය පවසන්නේ 2020 අපොස උසස්පෙළ විභාගයේ ගම්පහ ප‍්‍රදේශයේ විභාග මධ්‍යස්ථානයක සභ කොළඹ ප‍්‍රදේශයේ විභාග මධ්‍යස්ථානයක විභාග වංචා සිදුව ඇති බව මේ වන විට අනාවරණය වී ඇති බවයි.

“ගම්පහ ප‍්‍රදේශයේ විභාග මධ්‍යස්ථානයක උසස් පෙළ විභාගයට පෙනී සිටින දරුවකු විසින් නවීන ඉලෙක්ට්‍රොනික උපකරණයක් විභාග මධ්‍යස්ථානය තුළ භාවිතා කර ඇති අතර, කොළඹ විභාග මධ්‍යස්ථානයක උසස් පෙළ විභාගයට පෙනී සිටින දරුවෙකු විසින් ස්මාට් ජංගම දුරකතනයක් භාවිතා කරමින් ප‍්‍රශ්න පත‍්‍රයක් බාහිර පුද්ගයෙකු වෙත යවා ඇත. විභාග නිරීක්ෂකයින් විසින් අදාළ දුරකතනය ගෙන පරීක්ෂා කිරීමේදී බාහිර පුද්ගලයකු විසින් එම ප‍්‍රශ්න පත‍්‍රයට අදාළ පිළිතුරු එම ජංගම දුරකතනයට දිගින් දිගටම එවා ඇත.”

එයින් පැහැදිලි වන්නේ උසස් පෙළ විභාගය පැවැත්වෙන අවස්ථාවේදී ප‍්‍රශ්න පත‍්‍රයක් පිට වී ඇති බවයැයි පෙන්වා දෙන ලංකා ගුරු සංගමයේ ප්‍රධාන ලේකම් ජෝසප් ස්ටාලින් අවධාරණය කරන්නේ මෙය කිසියම් පුද්ගලයකු විසින් විභාගයට පෙනී සිටින දරුවෙකු යොදවා කළ කූට ක්‍රියාවක්දැයි යන්න සහ එම පුද්ගලයා විසින් තවත් දරුවන්ට මේ ආකාරයෙන් පිළිතුරු යවා ඇතිදැයි වහා පරීක්ෂා කළ යුතු බවයි.

එසේම මෙවැනි කූට ක්‍රියාවන් සඳහා සිසුන් යොමු කරවන පුද්ගලයන් සම්බන්ධයෙන් දැඩි නීත්‍යානුකූල පියවර ගත යුතු බවත් ලංකා ගුරු සංගමය ඔක්තෝබර් 14 බදාදා නිකුත් කළ මාධ්‍ය නිවේදනයක් මගින් ඉල්ලා තිබේ.

මීට පෙර වසරවල දී ද විවිධාකාර විභාග වංචා සිදු වූ අවස්ථා වාර්තා වූ අතර, එම පරීක්ෂණ සම්බන්ධයෙන් කුමන පියවර ගත්තේ ද යන්න ගැටලූවක් බව පෙන්වා දෙන ජ්‍යෙෂ්ඨ වෘත්තිය සමිති නායකයා අවධාරණය කරන්නේ තවදුරටත් එවැනි විභාග වංචා සම්බන්ධයෙන් නිසි පියවර ගෙන නැති බව මේ ආකාරයෙන් දිගින් දිගටම විභාග වංචා සිදුවීමෙන් පැහැදිලි වන බවයි.

උසස් පෙළ විභාගය ආරම්භයේදී ම මේ ආකාරයෙන් විභාග වංචා සිදුවීම සම්බන්ධයෙන් වහා පුළුල් පරීක්ෂණයක් සිදු කළ යුතු අතර , විභාගය පැවැත්වෙන ඉදිරි දිනවලදී මෙවැනි විභාග වංචා සිදුවීම වැලැක්වීමට කටයුතු කළ යුතු බවත් ලංකා ගුරු සංගමය ප‍්‍රකාශ කර සිටී.

Facebook Comments

wedding people