කාත්තන්කුඩියේ තරුණයකු ත්‍රස්ත පොලිසියෙන් අල්ලයි

පාස්කු ඉරුදින බෝම්බ ප්‍රහාර මාලාව සම්බන්ධයෙන් සැකකරුවන් හත්සීයකට අධික ප්‍රමාණයක් අත්අඩංගුවට ගෙන ඇතත් සැබෑ මහ මොළකරු නිදැල්ලේ ඉන්නා බවට කතෝලික සභාවෙන් චෝදනා එල්ල වෙද්දී, පාස්කු ප්‍රහාරයට අනුබල දීමේ චෝදනාවට තවත් අයකු පොලීසිය විසින් අත්අඩංගුවට ගෙන තිබේ.

ත්‍රස්ත මර්දන හා විමර්ශන කොට්ඨාශය (CTID) විසින් එලෙස අත්අඩංගුවට ගෙන ඇත්තේ පාස්කු ප්‍රහාර මාලාවේ මහමොළකරු ලෙස මාධ්‍ය ඔස්සේ ප්‍රකාශයට පත්වී ඇති “සහරාන් හෂීම්ගේ ගෝලයන් සමග සබඳතා පැවැත්වූ අයෙක්” බව කොළඹින් පලකෙරෙන ජනමාධ්‍ය වාර්තා කර ඇත.

පළාත් බද වාර්තාකරුවන් පවසන්නේ ප්‍රහාරය සම්බන්ධයෙන් දැනටමත් අත්අඩංගුවට ගෙන සිටින සැකකරුවන්ගෙන් ලද තොරතුරක් මත කාත්තන්කුඩියේ පදිංචි වන අබ්දුල් ජෆාර් මොහමදු ජෆ්රාස් තරුණයා නොවැම්බර් 16 වැනි දින අත්අඩංගුවට ගෙන ඇති බවයි.

පාස්කු ඉරුදින බෝම්බ ප්‍රහාර මාලාව සම්බන්ධයෙන් සැකපිට මීට ඉහතදී අත්අඩංගුවට ගන්නා ලද හැට තුන් දෙනකු තවදුරටත් රිමාන්ඩ් භාරයේ තැබීමට මඩකලපුව අධිකරණය නොවැම්බර් 11 වැනි බ්‍රහස්පතින්දා නියෝග කර තිබුනි.

ඔවුන්ට දෙවසරක් තිස්සේම නඩු පවරා නැත.

පාස්කු ප්‍රහාරයේ සැකකරුවන් ලෙස ශ්‍රී ලංකාවේ අත් අඩංගුවේ ඉන්නා තිදෙනකුට එරෙහිව ඇමරිකා එක්සත් ජනපදය චෝදනා ගොනු කොට ඇති අතර, ත්‍රස්ත නීති යොදාගෙන දිවයින තුල සිරකොටගෙන ඉන්නා සිය ගණනකගෙන් නඩු පවරා ඇත්තේ පනහකටත් අඩු පිරිසකට පමණි.

පාස්කු ඉරුදින ප්‍රහාරය ගැන විමර්ශන, විවේචනය කරන පුද්ගලයන්ට එරෙහිව නීතිමය පියවර ගන්නා බවට විශේෂ ප්‍රකාශයක් කරමින් පසුගියදා අනතුරු ඇඟවු පොලිස්පති සී.ඩි වික්‍රමරත්න එහිදී අනාවරණය කර තිබුනේ ප්‍රහාරය සම්බන්ධයෙන් අත් අඩංගුවට ගත් පුද්ගලයන් 723 කගෙන් 311 දෙනෙක් තවමත් රිමාන්ඩ් බාරයේ සිිටින බවයි.

“පොලිස් පරීක්ෂණ වලින් සැකපිට අත් අඩංගුවට ගත් පුද්ගලයන් 723 කගෙන් 311 දෙනෙක් තවමත් රිමාන්ඩ් බාරයේ සිටිනවා, රුපියල් මිලියන 360 මුදල් රාජසන්තක කර තවත් රුපියල් මිලියන 168 ක දේපොළ තහනම් කර තිබෙනවා.” පැවසූ පොලිස්පති ” සැකකරුවන් 46 දෙනකුට එරෙහිව මහාධිකරණයේ අධිචෝදනා 11 ක් ගොනු කර තිබෙනවා” යැයි වැඩි දුරටත් සදහන් කළේය.

මහජනතාවගේ අදහස් ප්‍රකාශන අයිතියට ගරු කරන බව පවසමින්ම “ පොලිසියේ විමර්ශනයෙන් පසු පවරා ඇති නඩු වලට අගතියක් වන නිසා ඒවා විවේචනය හා හෑල්ලු කිරීම ගැන නීතිමය පියවර ගැනීම කෙරෙහි සැලකිල්ල දක්වනවා” යනුවෙන් පොලිස්පති වික්‍රමරත්න වැඩි දුරටත් අනතුරු අඟවීය.

ප‍්‍රහාරය වලක්වා ගැනීමට පියවර නොගත් බවට චෝදනා නැගී ඇති හිටපු පොලිස්පති පූජිත ජයසුන්දර සහ හිටපු ආරක්ෂක ලේකම් හේමසිරි ප‍්‍රනාන්දුට අධි චෝදනා බාරදුන් කොළඹ විශේෂ ත‍්‍රිපුද්ගල මහාධිකරණය එය විභාග කිරීම නොවැම්බර් 22 වැනිදාට නියම කර තිබේ.

පාස්කු ඉරු දින බෝම්බ ප්‍රහාර මාලාවේ මහ මොළකරු ලෙස මාධ්‍ය ඔස්සේ ප්‍රකාශයට පත්වී ඇති සහරාන් හෂීම් සමඟ සබඳතා පැවැත්වීමේ චෝදනා මත වසර දෙකකට ඉහතදී අත්අඩංගුවට ගත් සැකකරුවන් 69 දෙනා අතුරින් හය දෙනෙක් මේ වන විටත් අධිකරණය මගින් නිදහස් කර ඇති බව නැගෙනහිර වාර්තාකරුවෝ පවසති.

අත්අඩංගුවේ සිටින සැකකරුවන් අතර සහරාන් හෂීම්ගේ නැගනියද වේ.

මිනිස් ජීවිත 268 ක්

දේවස්ථාන සහ සංචාරක හෝටල් කිහිපයක් ඉලක්ක කර ගනිමින් 2019 අප්‍රේල් මස 21 වන දින එල්ල කළ මරාගෙන මැරෙන බෝම්බ ප්‍රහාර මාලාව නිසා 250 කට අධික සාමාන්‍ය වැසියන් සංඛ්‍යාවක් මියගියහ.

කටුවාපිටිය ශාන්ත සෙබස්තියන් දේවස්ථානය, කොටහේන කොච්චිකඩේ ශාන්ත අන්තෝනි දේවස්ථානය, මඩකලපුව සියොන් දේවස්ථානය, දෙහිවල හෝටලයක සහ කොළඹ කිංග්ස්බරි, ෂැන්ග්‍රිලා, සිනමන් ග්‍රෑන්ඩ් හෝටල්වල දෙවසරකට ඉහතදී බෝම්බ පිපිරීම් සිදු වුයේ පුද්ගලයන් 268ක් ජීවිතක්ෂයට පත්කරමින්, තවත් 500කට අධික ප්‍රමාණයක් තුවාල සිදුකරමිනි.

පාස්කු ඉරුදින ප්‍රහාරයට වගකිවයුත්තන්ට එරෙහිව දැනට ගෙන ඇති නෛතික ක්‍රියාමාර්ග පිළිබඳ සෑහීමකට පත්නොවන බව කොළඹ අගරදගුරු කාදිනල් මැල්කම් රංජිත් හිමියෝ දිගින් දිගටම අවධාරණය කරමින් සිටිති.