මියන්මාරය ලංකාව වගේ කටයුතු කළා නම් ඛේදනීය තත්ත්වය වළක්වා ගන්න තිබුණා – ජනපති

0

මියන්මාරය ද ශ්‍රී ලංකා රජය මෙන් මුල් අවස්ථාවේදීම ෆේස් බුක් ,වෙබ් සයිට් තහනම් කරනු ලැබුවේ නම් මුස්ලිම් විරෝධි ප්‍රහාර නවත්වා ගෙන කනගාටුදායක ඛේදනීය තත්ත්වය වළක්වා ගන්න තිබු බවට ජාත්‍යන්තර සංවිධාන ප්‍රකාශ කර තිබුණ බව තමන් දුටු බව ජනාධිපතිවරයා පවසයි.

“කනගාටුදායක ඛේදනීය තත්ත්වය වළක්වා ගන්න මුල් අවස්ථාවේ මියන්මාර් රජය ශ‍්‍රී ලංකා රජය වගේ කටයුතු කළා නම් අද මේ කනගාටුදායක තත්ත්වය නැතැයි කියන එක ජාත්‍යන්තර සංවිධාන ප‍්‍රකාශ කළා. ඒවගේම මම ඊයේ දැක්කා” යි ජනාධිපති මෛත්‍රීපාල සිරිසේන 28 බදාදා කොළඹ නෙළුම් පොකුණ රඟහලේ පැවති ෆාතිමා මුස්ලිම් කාන්තා විද්‍යාලයේ සියවස් සැමරුම් උත්සවය අමතමිනි කියා සිටියේය.

මහනුවර මුස්ලිම් විරෝධි ප්‍රහාර වළක්වා ගැනීමට ෆේස් බුක්, වෙබ් අඩවි සීමා කිරීම මාධ්‍ය නිදහස හෝ ජනතාවගේ මූලික අයිතිවාසිකම් අහිමි කිරීමක් නොව අවස්ථානුකූලව ගත යුතුව තිබූ වැදගත් තීරණයක් බව කී ජනපති එම තීරණය පිළිබඳව ජාත්‍යන්තර වශයෙන් ඇමරිකාවේ පර්යේෂණ ආයතන දෙකකින් ප්‍රශංස කල බව ද සඳහන් කළේය.

“ෆේස් බුක්, වෙබ් සීමා කිරීම. මේ ගැන සමහර අය මට දොස් කිව්වා. නමුත් මේ රටේ හුඟක් දෙනෙක් මට ඒක හොඳයි කියලා කිව්වා. මට හුඟක් හොඳයි කියලා කිව්වේ ඕලෙවල් ,ඒලෙවල් විභාගවලට ඉන්න දරුවන්ගේ දෙමව්පියෝ. ඒ සමහර අය මට ලියුම් එව්වා. සමහර අය දුරකථනයෙන් කිව්වා. සමහර අය උත්සවවලට ගියාම මට කිව්වා ජනාධිපතිතුමනි, අපේ දරුවෝ හදාගන්න නම් පුළුවන්නම් ෆේස් බුක්, වෙබ්සයිට් හැමදාම වහලා තියන්න කියලා. දැන් මේ සේරම අත්පුඩි ගහනවා මම කියපු එකට සතුටුයි කියලා. ඒ ෆේස් බුක් ,වෙබ්සයිට් වැහීම පිළිබඳව ජාත්‍යන්තර වශයෙන් ඇමරිකාවේ පර්යේෂණ ආයතන දෙකකින් කිව්වා ශ‍්‍රී ලංකා රජය ගත් ඒ තීරණය ඉතාමත් හොඳයි. ඉතාමත් විශිෂ්ටයි කියලා.”

එම තීරණය හරහා රටේ සිදුවීමට ගිය විශාල විනාශයක් වළක්වා ගැනීමට හැකි වූ බවට විශ්වාසය පල කරන ජනපති මෛත්‍රීපාල සිරිසේන නවීන තාක්ෂණයේ අයහපත් පැතිකඩෙන් වත්මන් දරු පරපුර රැක ගැනීමේ වගකීම රජයක් ලෙස උපරිමයෙන් ඉටුකරන බව වැඩි දුරටත් කියා සිටියේය.

Facebook Comments

wedding people