ජනවාරි ජනාධිපතිවරණයට හය අවුරුද්දකට පෙර අතුරුදහන් වූ දියණියක මෛත්‍රිපාල සිරිසේන සමග සමූහ ඡායාරුපයක සිටිනු දැක්වෙන ඡන්ද පත්‍රිකාව “හදපු පින්තූරයක්” ලෙස ජනාධිපතිවරයාගේ ඉහල පෙළේ නිලධාරියෙකු ජාත්‍යන්තර මාධ්‍යයට කියා තිබේ.
“මේ පින්තුරේ බේගලයක්, හදපු පින්තූරයක්,” ජනපතිවරයාගේ මාධ්‍ය සම්බන්ධීකරණ ලේකම් අධිනීතිඥ ශිරාල් ලක්තිලක ලන්ඩනයේ මුලස්ථානය පිහිටි ITV ප්‍රවෘත්ති ආයතනය සමඟ කොළඹ දී පවසා ඇත.
එම ඡායාරූපයේ සිටින ළමුන් බොහෝ දෙනා බලහත්කාරයෙන් අතුරුදහන් කරන ලද්දවුන් බවට ඔවුන්ගේ මාපියන් විසින් හඳුනාගෙන තිබුනේ එම ඡායාරූපය එළි දැක්වු අවස්ථාවේදීමය.
ජනපතිවරණය ජයගත් මෛත්‍රීපාල සිරිසේන හට අතුරුදහන් වුවන්ගේ අම්මාවරුන් 2015 අගෝස්තුවේදි මේ පිළිබඳව දැනුම් දුන් අවස්ථාවේ පරීක්ෂණ සඳහා වෙනම ඒකකයක් පිහිටුවීමටද ඔහු ප්‍රතිඥා දී තිබුනි.
අවිශ්වාස ආණ්ඩුව
පසුගිය ජුනි මාසයේදී පින්තූරයේ සිටින දරුවන්ගේ මෑණිවරුන් හමුවීමට ජනාධිපති ලේකම් කාර්යාල නිලධාරීන් පැමිණ මාස නමයක් ගතවු තැන උතුරට පැමිණි නිලධාරියෙකු වෙනස් අදහසක් කියා පෑම ආණ්ඩුව විශ්වාස කළ නොහැකි බව පෙන්වා දීමට මෙය ප්‍රබල සාධකයක් බව අතුරුදහන් වුවකුගේ මවක් මාධ්‍ය වෙත කියා තිබේ.
“ආණ්ඩුව අපෙන් ඉල්ලපු සාක්කි අපි දීලා තියෙද්දී දැන් කොහොමද එකපාරටම නැහැයි කියන්නේ,” යි පින්තුරයේ එන දැරියකගේ මව කාසිපිල්ලේ ජෙයවනිතා පැවසු බව ගගන වෙබ් අඩවිය වාර්තා කරයි.
ඇගේ දියණිය ජෙරෝමි, ආණ්ඩුව රහසේ සිරකොටගෙන ඉන්නා බව දැඩි සේ විශ්වාස කරන ජෙයවනිතා ජනාධිපති ලේකම්ගේ අලුත් පිළිතුරෙන් අනතුරක් අඟවන්නේ දැයි බියපත්ව සිටින්නීය.
සීදුව රද්දොළුව ඉදිකර තිබෙන අතුරුදහන් වුවන්ගේ ස්මාරකයේ විසිපස් වැනි වාර්ෂික සමරුවට සහභාගී වු ජාතික සංවාද අමාත්‍යවරයා වටකරගත් උතුරෙන් පැමිණි අම්මාවරුන් ජනපතිගේ ජන්ද පත්‍රිකාව පෙන්වමින් “මීට වැඩිය තවත් සාක්කි මොකටදැ”යි ඇමතිවරයාගෙන් හඬා වැලපෙමින් ඉල්ලා සිටියේ රජය විසින් රඳවාගෙන සිටින තම ආදරවන්තයන් එක් දවසකට හෝ පෙන්වන ලෙස ය.
Facebook Comments
