තමන් අත්අඩංගුවට ගැනීම වළක්වාලමින් නියෝගයක් නිකුත් කරන ලෙස ශ්‍රේෂ්ඨාධිකරණයට ගොණු කර තිබු පෙත්සම විභාගයට නොගෙන නිෂ්ප්‍රභා කල දිනයේම වැලිකඩ සිරකරුවන් ඝාතනයේ ප්‍රධානතම සැක කරුවෙකු වන පොලිස් පරීක්ෂක නියෝමාල් රංගජීව රහස් පොලිසිය විසින් අත්අඩංගුවට ගෙන තිබේ.
පොලිස් මත්ද්‍රව්‍ය නාශක කාර්යාංශ පොලිස් පරීක්ෂක නියෝමාල් රංගජීව 28 බදාදා අපරාධ පරීක්ෂණ දෙපාර්තමේනතුව වෙත කැඳවා ප්‍රකාශයක් ලබා ගැනිමෙන් පසු අත්අඩංගුවට ගත් බවයි පොලිසිය පවසන්නේ.
අත්අඩංගුවට ගත් පොලිස් පරීක්ෂක නියෝමාල් රංගජීව 29 බ්‍රහස්පතින්දා කොළඹ මහේස්ත්‍රාත් අධිකරණයට ඉදිරිපත් කිරීමට නියමිතව තිබේ.
වැලිකඩ සිරගෙදරට සන්නද්ධව කඩා වැදුණු රජයේ ආරක්ෂක හමුදා සහ සිරකරුවන් අතර 2012 නොවැම්බරයේ ගැටුමකින් මියගිය අයට අමතරව හතළිහකට නොඅඩු පිරිසකට තුවාල සිදුවු අතර බන්ධනාගාරයේදී විසි හත් දෙනකු ඝාතනයට ලක් විය.
මහින්ද රාජපක්ෂ ආණ්ඩුව සමයේ සිදුවු වැලිකඩ බන්ධනාගාරයේ සිදු කළ ලැයිස්තුගත කොට සිරකරුවන් සමූහ ඝාතනය කිරීමේ අපරාධය සම්බන්ධයෙන් මේ ආණ්ඩුව බලයට පත්වීමෙන් පසු 2015 මාර්තු මාසයේ දී සුදේශ් නන්දිමාල් විසින් අපරාධ පරීක්ෂණ දෙපාර්තමේන්තුවට පැමිණිල්ලක් කරමින් තමන් මේ සිද්ධියේ ඇසින් දුටු සාක්කිරුවකු බවත්, ඊට අදාළ පරීක්ෂණ සිදුකරන ලෙසත් ඉල්ලා තිබේ.
සිද්ධිය සම්බන්ධව සොයා බැලීම සඳහා යහපාලන රජය විසින් පත් කරන ලද විමර්ශන කමිටු වාර්තාව විශ්‍රාම ලත් විනිසුරු නිමල් නම්බුවසම් අගමැති රනිල් වික්‍රමසිංහ හමුවේ අධිකරණ අමාත්‍ය විජයදාස රාජපක්ෂ වෙත භාර දෙන ලද්දේ 2015 ජුනි මාසයේදී වන අතර එය මෙතෙක් ප්‍රසිද්ධියට පත් කර නොමැත.
Facebook Comments
