ජාතික සම්පත් විකුණා දැමීම අරමුණු කොටගත් බවට චෝදනා කෙරෙන පනතක් අකුලා ගන්නා ලෙස බල කරමින් හතලිහකට වැඩි වෘත්තීය සමිති තුන් දිනක් පුරා ක්‍රියාත්මක කරන විරෝධයට රජය යහපත් ප්‍රතිචාරයක් නොදැක්වීම නිසා විදුලිබල මණ්ඩල කාර්ය මණ්ඩලය සේවයට වාර්තා නොකර සිටීමේ අනතුරක් මතුව තිබේ.
කොළඹ පිහිටි ලංකා විදුලි බල මණ්ඩලය මුලස්ථානය ඉදිරිපිටදී මාධ්‍ය වෙත අදහස් දක්වමින් ජනවාරි 05 වැනිදා පාරිභෝගික සම්බන්ධීකාරක නිලධාරීන්ගේ සංගමයේ ජ්‍යෙෂ්ඨ උපදේශක ප්‍රියන්ත වික්‍රමසිංහ සදහන් කළේ රට අදුරේ තැබීමේ සුදානමක් නැති මුත් ‘සේවකයන්ට කළ හැකි උපරිම දේ’ සිදු කරන බවයි.
“අපිට කරන්න පුළුවන් උපරිම දේ තමයි සේවකයන්ගේ වැඩ අත් හැරීම.අපි එකක්වත් ලයිට් ඔෆ් කරන් නෑ. යතුරු ටික බාර දීලා එනවා. පුළුවන්නම් මේ පුහුණු සේවකයෝ නැතුව මේ ආයතනය පවත්වාගෙන යන්න.”
විදුලි බල මණ්ඩලය ප්‍රතිව්‍යුහගතකරණ මුවාවෙන් ශ්‍රී ලංකා විදුලිබල මණ්ඩල පනත යොදාගෙන ජාතික සම්පත් විකුණා දැමීමට ආණ්ඩුව කටයුතු කරන බවට චෝදනා කරමින් හතලිහකට වැඩි විදුලි සේවක වෘත්තීය සමිති විසින් ක්‍රියාත්මක කරන තුන් දින අඛණ්ඩ විරෝධතාව ජනවාරි 03 වැනිදා ලංකා විදුලි බල මණ්ඩලය මුලස්ථානය ඉදිරිපිටින් ආරම්භ කෙරුනි.
ජ්‍යෙෂ්ඨ වෘත්තීය සමිති නායක ප්‍රියන්ත වික්‍රමසිංහ චෝදනා කරන්නේ විසි තුන් දහසකට අධික විදුලි සේවකයන්ගේ විරෝධතාවය සම්බන්ධයෙන් සාකච්ඡා කිරීම සදහා “උද්දච්ච ආණ්ඩුව” අවම වශයෙන් සාකච්ඡාවක් හෝ ලබා දී නොමැති බවයි.
“ආණ්ඩුව මේ වෙන කොට කොච්චර උද්දච්චද කියනවානම් සාකච්ඡාවක්වත් දීලා නෑ. මෙච්චර විසි තුන් දාහක් සේවකයෝ මහ පාරේ ඉදගෙන උද්ඝෝෂණය කරද්දී.”
වෘත්තීය සමිති වලට වැඩ වර්ජනය කිරීම සදහා පසුබිමක් නිර්මාණය කරමින් රට අදුරට පත් වු පසු විදුලි බිදල වැඩි කරමින් එම චෝදනාවත් වෘත්තීය සමිති පිට පැටවීමට ආණ්ඩුව බලා සිටින බව පැවසු වෘත්තිය සමිති නායකයා තව දුරටත් සදහන් කළේ රටේ ජනතාවට හෙන ගැසුවත් ආණ්ඩුවට කමක් නැති බවයි.
අත්‍යවශ්‍ය සේවාවක විසි තුන් දහසකට අධික විදුලි සේවකයන් වැඩ අත් හැර යතුරු බාර දී පාරට පැමිණියහොත් ආණ්ඩුවට ගෙදර යෑමට සිදු වන බවත් වෘත්තීය සමිති නායකයා මෙහිදී අවධාරණය කළේය.
ආන්ඩුව විසින් යෝජිත නව විදුලි පනත හරහා විදුලි සේවකයන්ගේ අරමුදල් කොල්ල කෑමට සුදානම් වන බව තුන් දින විරෝධය සම්බන්ධයෙන් විදුලි වෘත්තිය සමිති 41 ක් ඒකාබද්ධව නිකුත් කළ පත්‍රිකාවක සදහන්ව තිබේ.
“විදුලි බල මණ්ඩලයේ සේවකයන්ට හිමි වෛද්‍ය නිවාඩු දීමනාව සහ ප්‍රසාද දීමනාව අවුරුදු දෙකක් තිස්සේ කොල්ල කෑ පාලකයන් අවසානයේ සේවකයන්ගේ ලේ, කදුළු, දහදිය මතින් ගොඩනගාගත් සේවක අර්ථසාධක අරමුදල සහ විශාම වැටුප් අරමුදලද කොල්ලකෑමට මේ පනත හරහා යෝජනා ඇතුලත් කර ඇත.“
Facebook Comments
