දෙමළ ජනයාගෙන් බලහත්කාරයෙන් අත්පත් කරගත් වන්නියේ ඉඩම් නිදහස් නොකරන ආණ්ඩුව පෞද්ගලික සමාගමකට රජයේ ඉඩම් අක්කර දස දහස් ගණනින් ලබා දීමට තීරණය කර තිබේ.
ජනාධිපති වික්‍රමසිංහ විසින් කැබිනට් මණ්ඩලයට යෝජනා කර ඇත්තේ වවුනියාව, කිලිනොච්චිය සහ මුලතිව් දිස්ත්‍රික්කවල ඇති රජයේ ඉඩම් අක්කර 30000 ක් උක් වගාවට පෞද්ගලික සමාගමකට ලබා දීමටයි.
ජුනි 26 දා අමාත්‍ය මණ්ඩල අනුමැතිය ලැබී තිබෙන මෙම ව්‍යාපෘතිය ආයෝජන මණ්ඩලය යටතේ ක්‍රියාත්මක වේ. ඊට අමතරව ජනාධිපතිවරයා යෝජනා කර ඇත්තේ වවුනියාව නයිනමඩු ප්‍රදේශයේ සීනී නිෂ්පාදන කම්හලක් පිහිටුවීමටයි. ඒ සඳහා ඉඩම් අක්කර 492 ක් ලබා දිමට නියමිතයි.
මේ අතර දෙමළ ජාතික ජනතා පෙරමුණේ නායක, පාර්ලිමේන්තු මන්ත්‍රී ගජේන්ද්‍ර කුමාර් පොන්නම්බලම් ඉකුත් දා පාර්ලිමේන්තුවේ දී පැවසුවේ වවුනියාව උතුර සහ මුලතිව් කොක්කුතුඩුවායි ප්‍රදේශවලින් 1983 දෙසැම්බරයේදී බලහත්කාරයෙන් ඉවත් කළ දෙමළ ජනයාට තවමත් තම ගම් බිම් වලට යා නොහැකි වී ඇති බවයි.
“1983 -84 අවුරුදු වල දී මුලතිව්, කොක්කුතුඩුවායි බටහිර ප්‍රදේශයේ සින්නකුලම්, මුන්දරෙයිකුලම්, ආමයාන්කුලම්, සාම්බන්කුලම්, තට්ටමාලෙයිකුලම්, පරයනාරු හා සුරියනාරායන් වෙල් යාය, වවුනියාව උතුරේ කොක්කච්චාන් කුලම් සහ කච්චල්සමනල් කුලම් යන ගම්වලින් මිනිස්සුන්ට ඉවත් වෙන්න කියලා හමුදාව කිව්වේ යුද මුක්ත කලාපයක් හදනවා කියලා. ඒ නිසා එහි හිටිය දෙමළ මිනිස්සුන්ට උන්හිටි තැන් නැති වුණා.”
අවතැන්ව සිටි මේ ජනයාට පළමු වරට සිය ගම් දොර කරා යාමට හැකිවුයේ තාවකාලික කඳවුරුවල රඳවා සිටී ජනයා යළි පදිංචි කරන ලෙසට පැවති රාජපක්‍ෂ ආණ්ඩුවට එල්ලවූ ජාත්‍යන්තර බලපෑම නිසයි.
“මේ ජනතාව තමන්ගේ ඉඩම් වලට යනකොට ඒ ඉඩම් දිස්ත්‍රික්කයෙන් පිට සිංහල මිනිස්සුන්ට බෙදා දීලා. දශක කීපයක් පරම්පරා ගණනාවක් වගා කරපු බිම් නීති විරෝධිව අත්පත් කරගෙන වෙනත් අයට ලබා දීලා.”
“අදත් මේ ඉඩම් වලට ඔවුන්ට හිමි බලපත්‍ර ඔවුන් සතුව තියෙනවා,” යැයි දෙමළ ජාතික ජනතා පෙරමුණු නායකයා පෙන්වා දෙයි.
Facebook Comments
