අලුත් අවුරුද්දේ වන්නියට පැමිණි ජනාධිපතිවරයා හමුවීමට උත්සාහ කළ බලහත්කාරයෙන් අතුරුදහන් කළවුන්ගේ ඥාතීන්ගේ සංගමයේ නායිකාවක් ඇතුළු මව්වරුන් දෙදෙනකු පොලීසිය විසින් අත්අඩංගුවට ගෙන තිබේ.
උතුරේ සිව් දින සංචාරයක නිරත ජනාධිපති රනිල් වික්‍රමසිංහ ජනවාරි 05 වැනි සිකුරාදා වව්නියාව සම්බන්ධීකරණ කමිටු රැස්වීමට සහභාගී වීම සදහා යාපනයේ සිට ගුවනින් වව්නියාව වෙත පැමිණ තිබුනි.
ජනාධිපතිවරයා වව්නියාව නගර ශාලාවේ රැස්වීමට සහභාගී වී සිටින මොහොතේ ඔහු හමුවීමට අවශ්‍ය බව සදහන් කරමින් නගර ශාලාව අසලට පැමිණි බලහත්කාරයෙන් අතුරුදහන් කළවුන්ගේ ඥාතීන්ට එම අවස්ථාව ලබා දීම වලකා ලන්නට පොලීසිය කටයුතු කර තිබේ.
බලහත්කාරයෙන් අතුරුදහන් කළවුන්ගේ ඥාතීන්ගේ සංගමයේ වව්නියාව දිස්ත්‍රික් ලේකම් සිවානන්දන් ජෙනීටා ජනාධිපතිවරයා හමුවීමට අවශ්‍ය බව පවසමින් වව්නියාව නගර ශාලාව වෙත ගමන් කරන මොහොත් පොලීසිය ඇය වලක්වා අත්අඩංගුවට ගෙන බස් රියක් තුලට ඇදගෙන යන ආකාරය ප්‍රදේශයේ මාධ්‍යවේදීන් විසින් වීඩියෝ ගත කර තිබේ.
ඇය සමග ඒ අවස්ථාවට එක්ව සිටි එම සංගමයේ මීරා ජැස්මින් චාල්ස්නයිස් ද පොලීසිය විසින් අත්අඩංගුවට ගන්නා ලදී.
විරෝධතා පැවැත්වීම වළකාලමින් සිවානන්දන් ජෙනීටාට එරෙහි අධිකරණ තහනම් නියෝගයක් ලබාගෙන තිබුණු බව පොලිස් නිලධාරීන් මාධ්‍යවේදීන්ට පවසා තිබුණි.
බලහත්කාරයෙන් අතුරුදහන් කරන ලද තම සමීපතමයන් වෙනුවෙන් යුක්තිය ඉල්ලා දින 2500 පසු කරමින් අඛණ්ඩ විරෝධතාවයේ යෙදී සිටින මව්වරුන් එක හඬින් ඉල්ලා සිටින්නේ දාහතර වසරකට වැඩි කාලයක් තිස්සේ අතුරුදහන් කර සිටින සිය සමීපතමයන් වෙනුවෙන් යුක්තිය ඉටු කරන ලෙසයි.
යුද සමයේත්, ඉන් පසුවත් අතුරුදහන් තම ඥාතීන් සොයමින් දින දෙදහස් පන්සියකට වැඩි කාලයක් උතුරු නැගෙනහිර අරගලයේ යෙදී සිටින මුල් පෙලේ සාමාජිකයන් පවසන පරිදි මේ වන විටත් යුක්තිය නොලබාම මියගිය මව්පියන් ගණන 190 ට වැඩිය.
Facebook Comments
