නව වසර උදාවේ වන්නියට පැමිණි ජනාධිපතිවරයා හමුවීමට උත්සාහ කළ අවස්ථාවේ පොලීසිය විසින් බලය යොදා අත්අඩංගුවට ගන්නා ලද බලහත්කාරයෙන් අතුරුදහන් කළ තම සමීපතමයන් සොයා ගැනීමේ අරගලයට නායකත්වය දෙන දෙමළ මාතාවක් නිදහස් කරන ලෙස බලකරමින් වන්නියේ විරෝධතාවයක් දියත් කර තිබේ.
මුලතිව්, මන්නාරම සහ වව්නියාව යන දිස්ත්‍රික්ක තුන නියෝජනය කරමින් ජනවාරි 8 වැනි සඳුදා මුලතිව් වෙත පැමිණි බලහත්කාරයෙන් අතුරුදහන් කරනු ලැබූවන්ගේ සංගම්වල මව්වරුන් මුලතිව් ශාන්ත පීතර දේවස්ථානය ඉදිරිපිටින් ආරම්භ කළ විරෝධතා පෙළපාලියකින් දිස්ත්‍රික් ලේකම් කාර්යාලය දක්වා ගමන් කරමින් සිරගත කරන ලද නායිකාවගේ නිදහස පතා විරෝධතා දැක්වු බවයි පළාත් බද වාර්තාකරුවන් පවසන්නේ.
උතුරේ සිව් දින සංචාරයක නිරතව සිටි ජනාධිපති රනිල් වික්‍රමසිංහ ජනවාරි 05 වැනි සිකුරාදා වව්නියාව සම්බන්ධීකරණ කමිටු රැස්වීමට සහභාගී වීම සඳහා පැමිණි අවස්ථාවේ ඔහු හමුවීමට අවශ්‍ය බව සදහන් කරමින් නගර ශාලාව අසලට පැමිණි බලහත්කාරයෙන් අතුරුදහන් කළවුන්ගේ ඥාතීන්ට එම අවස්ථාව ලබා දීම වලකා ලන්නට පොලීසිය කටයුතු කළේය.
බලහත්කාරයෙන් අතුරුදහන් කළවුන්ගේ ඥාතීන්ගේ සංගමයේ වව්නියාව දිස්ත්‍රික් ලේකම් සිවානන්දන් ජෙනීටා වව්නියාව නගර ශාලාව වෙත ගමන් කරන මොහොත් පොලීසිය ඇය සහ ඒ අවස්ථාවට එක්ව සිටි එම සංගමයේ මීරා ජැස්මින් චාල්ස්නයිස් ද අත්අඩංගුවට ගෙන තිබුණි.
ඔවුන් දෙදෙනා පොලීසිය විසින් එදිනම වව්නියා මහේස්ත්‍රාත් වෙත ඉදිරිපත් කළ අවස්ථාවේ මීරා ජැස්මින් චාල්ස්නයිස් ඇප මත නිදහස් කිරීමට නියෝග කළ මහේස්ත්‍රාත්වරයා සිවානන්දන් ජෙනීටා රක්ෂිත බන්ධනාගාරගත කරන ලෙස නියෝග කළ බවයි පළාත් බද වාර්තාකරුවන් පවසන්නේ.
විරෝධතා පැවැත්වීම වළකාලමින් සිවානන්දන් ජෙනීටාට එරෙහි අධිකරණ තහනම් නියෝගයක් ලබාගෙන තිබුණු බව පොලිස් නිලධාරීන් ජනවාරි 05 වැනිදා මාධ්‍යවේදීන්ට පවසා තිබුණි.
ප්‍රදේශයට ඇද හැලුනු වැසි තත්වය පවා නොසලකමින් අද දහවල් විරෝධතා දියත් කළ දෙමළ මව්වරුන් ඉල්ලා සිටියේ පොලිස් ප්‍රචණ්ඩත්වය නවතා ජෙනීටා නිදහස් කරන ලෙසයි.
“පීඩාවෙන් සිටින ජෙනීටාව නිදහස් කරන්න, ජාත්‍යන්තර පරීක්ෂණය තමයි අපිට විසදුම, වන්දි දීලා උද්ඝෝෂණ නවත්වන්න පුළුවන් කියලා රනිල් ආණ්ඩුව සිහින දකින්න එපා!” ආදී සටන් පාඨ සහිත විරෝධතා පුවරුද උද්ඝෝෂණයේ නිතර වු දෙමළ මව්වරුන් අත විය.
බලහත්කාරයෙන් අතුරුදහන් කරන ලද තම සමීපතමයන් වෙනුවෙන් යුක්තිය ඉල්ලා දින 2500 පසු කරමින් අඛණ්ඩ විරෝධතාවයේ යෙදී සිටින මව්වරුන් එක හඬින් ඉල්ලා සිටින්නේ දාහතර වසරකට වැඩි කාලයක් තිස්සේ අතුරුදහන් කර සිටින සිය සමීපතමයන් වෙනුවෙන් වහාම යුක්තිය ඉටු කරන ලෙසයි.
Facebook Comments
