ප්‍රජාතන්ත්‍රවාදී අරගල තහනම් කළ නොහැකි බව අධිකරණය යාපනය පොලීසියට දැනුම් දී පැය විසි හතරක් ගත වන්නට මත්තෙන් ජනාධිපතිවරයාගේ යාපනය සංචාරයකට විරෝධය පළ කළ දෙමළ දේශපාලන ක්‍රියාකාරීන් තිදෙනකු පොලීසිය විසින් අත්අඩංගුවට ගෙන තිබේ.
ජනපතිට විරෝධතා දැක්වු දෙමළ ජාතික ජනතා පෙරමුනේ ක්‍රියාකාරීන් තිදෙනෙක් යාපනය පොලීසිය විසින් ජනවාරි 4 වැනි බ්‍රහස්පතින්දා අත්අඩංගුවට ගෙන ඇත්තේ ප්‍රජාතන්ත්‍රවාදී අරගල තහනම් කළ නොහැකි බව යාපනය මහේස්ත්‍රාත් අධිකරණය විසින් දැනුම් දී තිබියදීය.
රනිල් වික්‍රමසිංහ ජනාධිපතිවරයා උතුරේ සංචාරයක යෙදෙන ජනවාරි 4-7 අතර දිනවලදී විරෝධතා පැවැත්වීමට නායකත්වය දෙනු ඇතැයි විශ්වාස කෙරෙන අට දෙනකුට එරෙහිව පොලිසිය ඉල්ලා සිටි තහනම් නියෝග ලබා දීම යාපනය මහේස්ත්‍රාත්වරයා විසින් ප්‍රතික්ෂේප කරනු ලැබුවේ ජනවාරි 3 දාය.
යාපනය සහ කිලිනොච්චි දිස්ත්‍රික් සංවර්ධන කමිටු රැස්වීමට සහභාගී වීම සඳහා කොළඹ සිට ගුවනින් පැමිණි ජනාධිපතිවරයා බ්‍රහස්පතින්දා පස්වරු 4 ට පමණ යාපනය දිස්ත්‍රික් ලේකම් කාර්යාලය වෙත පැමිණ තිබුනි.
ඔහු එම ස්ථානයට ලඟා වීමට පෙර දිස්ත්‍රික් ලේකම් කාර්යාලය ඉදිරිපිටිදී විරෝධතා දැක්වු දෙමළ ජාතික ජනතා පෙරමුණේ යාපනය සංවිධායක පොන් මාස්ටර්, දෙමළ ජාතික ජනතා පෙරමුණේ තරුණ අංශයේ නායක ඊ. සත්‍යසීලන් හා එම පෙරමුනේ මර්දංකේනි සංවිධායක අරුල්මදී යන තිදෙනා පොලීසිය විසින් අත්අඩංගුවට ගත් අතර ඔවුන් රාත්‍රී යාමයේත් යාපනය පොලිස්ථානයේ රදවාගෙන සිටි බවයි පළාත් බද වාර්තාකරුවන් පවසන්නේ.
ඔවුන් තිදෙනා අත්අඩංගුවට පත් වී මද වෙලාවකට පසු ප්‍රදේශයේ සිවිල් සමාජ ක්‍රියාකාරීන් පිරිසක් සමග යාපනය දිස්ත්‍රික් ලේකම් කාර්යාලය සමීපයේ පිහිටි යාපනය පරන උද්‍යානය අසලට පැමිණි දෙමළ ජාතික ජනතා පෙරමුණේ නීතිඥ කනගරත්නම් සුගාස් ඇතුළු පිරිසක් ජනාධිපතිවරයාගේ උතුරේ සංචාරයට විරෝධය දක්වමින් ඉල්ලා සිටියේ නීති විරෝධි අත්අඩංගුවට ගැනීම වහා නවත්වන ලෙසයි.
ජනාධිපතිවරයාගේ උතුරේ සංචාරය හේතුවෙන් ප්‍රදේශයේ දැඩි පොලිස් ආරක්ෂාවක්ද යොදවා තිබු බවයි පළාත් බද වාර්තාකරුවන් පවසන්නේ.
තහනම් නියෝග ප්‍රතික්ෂේප වේ
ජනාධිපති රනිල් වික්‍රමසිංහ උතුරේ සංචාරයේ යෙදෙන කාල සීමාව තුළ විරෝධතා පැවැත්වීමට නායකත්වය දෙනු ඇතැයි පොලීසිය නම් කළ පුද්ගලයන් අට දෙනකුට ජනවාරි 3 වැනිදා අධිකරණයට පැමිණෙන ලෙස යාපනය මහේස්ත්‍රාත්වරයා නියෝග කර තිබුනි.
දෙමළ ජාතික ජනතා පෙරමුණේ නායක පාර්ලිමේන්තු මන්ත්‍රී ගජේන්ද්‍ර කුමාර් පොන්නම්බලම්, එම පක්ෂයේ පාර්ලිමේන්තු මන්ත්‍රී සෙල්වරාසා ගජේන්ද්‍රන්, නීතිඥ කනගරත්නම් සුගාස්, දෙමළ ජාතික ජනතා පෙරමුණේ කාන්තා අංශයේ සභාපතිනි වාසුකී සුදාහරන්, ආරෝගනාදන් දිලීප් දිලීෂන්, උතුරු නැගෙනහිර අතුරුදහන් කරවනු ලැබුවන්ගේ ඥාතීන්ගේ සංගමයේ සභාපතිනි යෝගරාසා කනගරංජනී, වව්නියාව දිස්ත්‍රික්කයේ බලහත්කාරයෙන් අතුරුදහන් කළවුන්ගේ ඥාතීන්ගේ සංගමයේ ලේකම් සිවානන්දන් ජෙනීටා, සහ හින්දු පුජක තවතිරු වේලන් ස්වාමි වෙත යාපනය මහේස්ත්‍රාත් අධිකරණයේ රෙජිස්ටාර්වරයා දැනුම් දී තිබුනේ පොලීසියේ ඉල්ලීම සම්බන්ධයෙන් ඔවුන්ගේ මතය දැනුම් දීම සදහා සෘජුව හෝ නීතිඥයන් මාර්ගයෙන් අධිකරණයට පැමිණෙන ලෙසයි.
පොලිසිය ඉල්ලා සිටි තහනම් නියෝග ලබා දීම ප්‍රතික්ෂේප කළ යාපනය මහේස්ත්‍රාත් අධිකරණය
ජනවාරි 3 වැනි බදාදා පොලීසියට දැනුම් දී තිබුනේ ප්‍රජාතන්ත්‍රවාදී අරගල තහනම් කළ නොහැකි බවයි.
තීන්දුව ප්‍රකාශයට පත් කරන අවස්ථාවේ අධිකරණයේ රැදී සිටි හින්දු පුජක තවතිරු වේලන් පූජකවරයා ප්‍රදේශයේ ජනමාධ්‍යවේදීන් හා කියා තිබුනේ ප්‍රජාතත්ත්‍රවාදීව කිසිදු බාධාවකින් තොරව, නීතියට පටහැනි නොවන ආකාරයෙන් අදහස් ප්‍රකාශ කළ හැකි බවට විනිසුරුවරයා තීන්දුව දුන් බවයි.
“ජනාධිපතිවරයාගේ පැමිණීම සහ පැවැත්වෙන රැස්වීම් ජනතාව වෙනුවෙන් කරන වැඩක් නිසා ඒකට බාධා නොකර අදහස් ප්‍රකාශ කිරීමටත් විරෝධතාවය ප්‍රකාශ කිරීමටත් අපට අයිතියක් තියනවා කියලා, පොලිසියේ ඉල්ලීම ප්‍රතික්ෂේප කරමින් තීන්දුවක් දුන්නා.”
Facebook Comments
