දෙමළ අම්මාවරු අලුත්ම සමූහ සුසානයට ජාත්‍යන්තර මැදිහත්වීමක් ඉල්ලති

ශ්‍රී ලංකාවෙන් හමු වු අලුත්ම සමූහ මිනීවළ සම්බන්ධයෙන් ජාත්‍යන්තර නීතියට අනුකූලව පරීක්ෂණ පවත්වන ලෙස බලකරමින් වන්නියේදී විරෝධතාවයක් දියත් කර තිබේ.

මුලතිව් දිස්ත්‍රික්කයේ බලහත්කාරයෙන් අතුරුදහන් කළ අයගේ ඥාතීන් ජුලි 12 වැනි බදාදා දිස්ත්‍රික් ලේකම් කාර්යාලය ඉදිරිපිට දී එම උද්ඝෝෂණය දියත් කළ බවයි පළාත් බද වාර්තාකරුවන් පවසන්නේ.

සමූහ මිනීවලේ ඉදිරි විමර්ශන කළ යුතු ආකාරය පිළිබඳව අධිකරණයේ මෙහෙයවීමෙන් සාකච්ඡාවක් පැවැත්වීමට දිනකට පෙර එම උද්ඝෝෂණය පවත්වා තිබේ.

කොක්කුතොඩුවායි මහාවිද්‍යාලයේ සිට ක‍ෝකිලායි දෙසට මීටර් 200ක් පමණ දුරකින් ජුනි 29 වැනි බ්‍රහස්පතින්දා හවස් යාමයේ මිනිස් සිරුරු කොටස් සහ ඇඳුම් කොටස් අහම්බයෙන් හමුවී තිබුනේ ජල සම්පාදන දෙපාර්තමේන්තුවේ කාර්ය මණ්ඩලය ජලනල එළීමට පොළව හාරමින් සිටියදී ය.

සමුහ සුසානයේ කැනීමේ කටයුතු ජුලි 6 වැනිදා නිල වශයෙන් ආරම්භ වු අතර පළමු දිනයේ සොයාගත් අස්ථි කොටස්, ඇඳුම් කැබලි ඇතුළු දෑ සම්බන්ධයෙන් වාර්තාවක් ජුලි 13 වැනිදා මුලතිව් මහේස්ත්‍රාත් අධිකරණය වෙත ඉදිරිපත් කරන ලෙස මහේස්ත්‍රාත්වරයා පොලිසියට නියෝග කර තිබුනි.

අතුරුදහන් සිය සමීපතමයන් සොයා ගැනීමේ වෙනුවෙන් ශ්‍රී ලංකාවේ දියත් වන දීර්ඝතම අඛන්ඩ විරෝධතාවයට එක්ව සිටින මව්වරුන් අද දිනයේ බල කර සිටියේ සමුහ සුසානයේ කැනීම් ජාත්‍යන්තර විශේෂඥයන්ගේ නිරීක්ෂණ හමුවේ සිදු කරන ලෙසයි.

වර්ග සංහාරයක් සිදු නොකළ බවට ආණ්ඩුව සිදු කරන ප්‍රකාශ සම්බන්ධයෙන්ද මුලතිව් දිස්ත්‍රික්කයේ බලහත්කාරයෙන් අතුරුදහන් කළ අයගේ ඥාතීන්ගේ සංගමයේ සභාපතිනි මරියසුරේෂ් ඊශ්වරී මාතාව ප්‍රශ්න කළාය.

” මෙතන යුද්ධයෙන් මිනිස්සු ඝාතනය කළේ නෑ. අපි වර්ග සංහාරය කළේ නෑ කියලා ආණ්ඩුව ජාත්‍යන්තරයට කියද්දී, මිනිස් වාසයක් නැති තැනක මිනිස්සු වළලන්න ආවේ කොහොමද? හමුදාවේ පූර්ණ පාලනය යටතේ පැවති ස්ථානයකින් මිනිස් සුසානයක් හොයාගෙන තියනවා. මේ මිනීවලෙන්මමේක වර්ග සංහාරයක් කියලා කියන්න පුළුවන්.”

සුසානය හමු වු පළමු දිනයේම එය දැක බලාගත් උතුරු පළාත් සභාවේ හිටපු මන්ත්‍රී තුරෙයිරාසා රවිහරන් පවසා තිබුනේ අස්ථි කොටස් හමු වු ප්‍රදේශය 1984 වසරේ සිට පදිංචිකරුවන් යුද බියෙන් හැර දමා ගිය ප්‍රදේශයක් බවයි.

” ඒක එල්ටීටීඊ ස‍ොහ‍ොනක් න‍ෙමේ කියල නම් විශ්වාසයි. 1984 දෙසැම්බර් මුල් සතියේ මේ ප්‍රද‍ේශය‍ේ ජනතාව ඉවත් කළාට පස්ස‍ෙ නැවත පදිංචි කළේ 2011 දී විතර. තවත් කැණීම් කළ‍ොත් තවත් මළ සිරුරු සොයා ගන්න පුලුවන් ව‍ෙයි.”

සමුහ සුසානයේ කැනීම් කටයුතු කළ පළමු දිනයේ හමු වු දැ පිළිබදව මාධ්‍යවේදීන්ට විස්තර කරමින් ඒම්.ඒ සුමන්තිරන් මන්ත්‍රීවරයා ජුනි 6 වැනිදා පවසා තිබුනේ කාන්තා හා පිරිමි යන දෙපාර්ශවයේම සිරුරු කොටස් එම ස්ථානයේ පැවැතිය හැකි බවයි.

“මේක යුද්ධ කාලේ වෙච්චි සිද්ධියක් වෙන්න පුළුවන්. හමුදාවේ නිල ඇඳුම් නැතිනම් LTTE නිල ඇඳුම් වගේ රෙදිපිලි හමුවෙලා තියෙන බව පේනවා. විශේෂයෙන් කාන්තා කේඩර්වරියන්ගේ සිරුරු වගේ. එක පිරිමියකුගේ සිරුරකුත් එතන තියෙන්න පුළුවන් බවට සැක කෙරෙනවා. ඒ අනුව, මිනී ගොඩ ගනිද්දී සිරුරු පහකට වැඩිය එකම තැන වල දමලා තියෙන බව බැලුවාම පේනවා.”

කොක්කුතොඩුවායි සමූහ සුසානය සම්බන්ධයෙන් දෙමළ දේශපාලනඥයන්, ප්‍රදේශ වාසීන්, අතුරුදහන් වුවන්ගේ පවුල් වල ඥාතීන් සහ මාධ්‍යවේදින් විවිධ මත පළ කළත් කිසිදු බලධාරියකු මේ තාක් නිල ප්‍රකාශයක් සිදු කළ බවක් දැනගන්නට නැත.