සෙල්ලයියා යෝගේන්ද්‍රරාසා දැල් වියමින් සිටින අතරවාරයේ වරින් වර දකුණට හැරී බලන්නේ නන්දිකඩාල් කලපුව හරහා මුලතිව් මුහුදු තීරයෙන් හමා එන සුළඟට ඇද වැටී ඔහුගේ බොරු කකුල නොකැඩෙන වග සහතික කරගනු පිණිසය.
කොවිඩ් 19 අගුලු ලෑම මැද්දේ කලපුවේත්, මුහුදුකරේත් හොර මාළු දඩයමෙන් බැට කන ඔහු වැනි දහස් සංඛ්‍යාත ධීවර ජන පිරිසක් ඇතුළු ඔවුන්ගේ දරු පවුල් මුහුණ ලා සිටින්නේ අඳුරු අනාගතයකටය.
රුදුරු යුද්ධයට සේසතම බිලිවූ ඔහුට වම් කකුලත්, දකුණු ඇසත් 2009 දී අහිමි වුනේ ශ්‍රී ලංකා ගුවන් හමුදා ප්‍රහාරයකිනි. බෝම්බයට ගොදුරුවූ ඔහුගේ එක් අතක් හරිහැටි වලංගු නැත.
සිය ගණනකට රැකියා අවස්ථා සලසා දුන් ඔහු අද තනිපංගලමේ ගසක් යට අටවා ගත් අතු පැලක මාළු දැල් වියමින් සිටින්නේ පළාතේ ධීවරයන්ගේ ප්‍රයෝජනය පිණිසය.
එය ඔහුගේ දරුපවුල ජීවත් කිරීමට උදව් දෙන එකම ආදායම් මාර්ගයයි. කොවිඩ් 19 පැමිණ සිදු කර ඇත්තේ ජීවිතය තවත් දුකට හෙලීමයි.
“අමුද්‍රව්‍ය විකුණන එකයි, දැල් විකුණන එකයි දැන් හරිම අමාරුයි. ආණ්ඩුවෙන් අපිට දීලා තියෙන්නේ රුපියල් 5000 ක් විතරයි. වෙන මුකුත් නෑ. ඒක මගේ වගේ ලොකු පවුලක් ලොක්ඩවුන් එක අස්සේ නඩත්තු කරන්න කොහොමටත් මදි,” යි සෙල්ලයියා පවසන්නේ මහත් වේදනා භරිතවය.
නන්දිකඩාල් කලපුව අවට දිවි ගෙවන ජනකායේ ප්‍රධාන ජීවනෝපාය වන ධීවර කර්මාන්තය ඔවුන්ගේ එකම ආදායම් මාර්ගයද වෙයි.
පරිසර හානිය
පළාතේ ධීවරයන් පවසන පරිදි කලපුවේ නඩත්තුව සම්බන්ධයෙන් ධීවර හා ජලජ සම්පත් දෙපාර්තමේන්තු නිලධාරීන් දක්වන නොසැලකිල්ලත් නීති විරෝධී මාළු බෑම නතර කිරීමට බලධාරීන් පියවර නොගැනීමත් ස මුද්‍රික සම්පත ක්ෂය වී යාමට හේතු වී ඇත.
වසංගත ඇඳිරි නීතියට යටත්ව හැමදෙනාම නිවෙස්වලට ගාල්වීමත් සමග කලපු ඉවුරේ ව්ට්ටුවාක්කල් ගම පාලුවට ගොසිනි. ආණ්ඩුව දෙන සොච්චමට අමතරව ඔවුන්ගේ යැපීම් මාර්ගය වී ඇත්තේ රට රැකියාවට ගොස් සිටින නෑසියන් එවන මුදලක් වේ නම් එපමණකි.
කරමල් දැල් හා ඇදුම් දැල් යොදාගෙන කරන නීති විරෝධී මහා පරිමාණ ධීවර ජාවාරම කලපු සම්පත සූරාගෙන ගොසිනි.
“කලපුවේ සම්පත් කල් පවතින විදියට ආරක්ෂා කරගෙන මාළු අල්ලන්න පුළුවන් දැලක් වියන්න දවස් දහයක් විතර යනවා. පිටින් ඇවිත් තහනම් පන්න ක්‍රම පාවිච්චි කරලා නීති විරෝධී විදියට මාළු අල්ලන අය අපිට එව්වා විකුණගන්න දෙන්නේ නෑ. ඒක රජය හෝ වෙනත් බලධාරීන් හෝ නතර කරලා දාන්න ඕනේ. නැතිනම්, කලපුවේ පරිසර පද්ධතියම වෙනස් වෙලා අපිටත් හාමතේ ඉන්න වෙයි කියලා අපි බයේ ඉන්නේ.”
දහස් ගණන් අතුරුදහන්
වට්ටුවාකල් පාලම යුද්ධයේ අවසන් දින කීපය පිළිබඳ නිහඬ සාක්ෂි දරා සිටින්නකි. දස දහස් සංඛ්‍යාත දෙමළ ජනකායක් ශ්‍රී ලංකා යුද හමුදාවට භාර වුනේ හා යටත් වුනේ මේ පාලම මතදීය. ඒ අතරින් අතුරුදහන් වූ බොහෝ දෙනා සොයමින් දශකයකට වැඩි කලක් තිස්සේ නෑසියන් අරගල කරන්නේ සිය සමීපතමයන්ගේ ඉරණම හෙලිකර ගැනීම සඳහා වන වියැකී යන බලාපොරොත්තුවෙන් යුතුවය.
වට්ටුවාකල් සහ නයාරු ගම්වාසීන්ගේ එකම ජීවනෝපාය වී ඇත්තේ ධීවර කර්මාන්තයයි. නීති විරෝධී ධීවර කටයුතු මුලතිව් මුහුදු කරයේත්, කලපුවේත් එදිනෙදා පන්න ක්‍රමය බවට පත්වීම නිසා තමන්ගේ එකම ආදායම් මාර්ගයත් ඇහිරී ගොස් අනාගතය අඳුරේ ගිලී යනු ඇතැයි යන බිය ඔවුන් වෙලාගනිමින් සිටී.
ආණ්ඩුවට කරන ලද කන්නලව් වලින් පලක් වී නැති බවයි ධීවර ප්‍රජා නායකයන් පවසන්නේ.
“පාරම්පරික වීසි දැල් එලියට විසිවෙලා තහනම්, නීතිවිරෝධී දැල් සාමාන්‍ය සහ නීත්‍යානුකුල ඒවා බවට පත් වෙලා,” යි නයාරු ධීවර සංගමයේ කමලේෂ් කුමාර් පවසයි.
කලපුවේත් සාගරයේත් පරිසර පද්ධතිය සහ සමුද්‍රික ජීවී සමුහයා විනාශ කරන ඩයිනමයිට් දිනපතාම පාහේ යොදා ගැනේ. කොරෝනා ව්‍යසනය නිසා තත්වය තවත් දරුණු අතට හැරී තිබේ.
දිවි පැවැත්ම තර්ජනයට ලක්වී සිටින ධීවරයන් පවසන්නේ “දිනෙන් දිනම තම ජීවිත අනතුරේ වැටෙන” බවයි.
“ඩග්ලස් දේවානන්දා ඇමැතිතුමා ළඟදී අපිට පොරොන්දු උනා ඇදුම් දැල් වගේ විනාශකාරී නීති විරෝධී පන්න ක්‍රම නවත්තලා දානවා කියලා. ඒත් ඇත්තටම වෙලා තියෙන්නේ ඒක වැඩි වෙන එක විතරයි,” යනුවෙන් කනස්සලු සහගතව පැවසුවේ නයාරු ධීවර සංගම් සභාපති කරුප්පනා ගනේෂමුර්තියි.
ඇදුම් දැල් ඇතුළු තහනම් පන්න ක්‍රම භාවිතා කරන ට්‍රෝලර් යාත්‍රා ගොඩබිම සමීපයෙන්ම යාත්‍රා කිරීම ධීවරයන්ගේ ජීවිතවලට සෘජුවම බලපායි. වෙරලින් කිලෝමීටර් 25ක් 30ක් දුර ගැඹුරු මුහුදේ ට්‍රෝලර් පන්නය සිදුවේ නම් තමන්ගේ ජීවිකාවට එයින් බලපෑමක් නැති බව ප්‍රදේශවාසීන්ගේ විශ්වාසයයි.
පවුල් පන්දහසක්
පුත්තලම වැනි පිට දිස්ත්‍රික්ක වලින් පැමිණ පුල්මොට්ටෙයි සිට කෝකිලායි දක්වා යාත්‍රා කරන බෝට්ටු නීති විරෝධී දැල්පන්න සහ ලයිට් කෝස් යොදාගෙන කරන මාළු බෑම නිසා පීඩාවට පත්ව සිටින ධීවරයන් ගණන දෙදහසකට වැඩි බව මුලතිව් ධීවර සංගමය ප්‍රකාශ කරයි.
“මේකෙන් වෙන්නේ මාළු බිත්තරයි, මාලු පැටවුනුයි ඔක්කොම විනාශ කරලා මහමූදේ පලදාව නැතිකරලා දාන එකයි. ලාබය විතරක් හොයන ආත්මාර්ථකාමී ලොකු ව්‍යාපාරිකයන් කරන මේ වැඩෙන් ධීවර පවුල් පන්දාහකට විතර රස්සාව නැතිවෙනවා,” යි සංගමයේ සභාපති ජූඩ් නික්සන් මාධ්‍යවේදීන්ට පැවසීය.
“නීති විරෝධී මාළු බෑම මුලතිව් ධීවර ප්‍රජාවටම ගහපු ප්‍රහාරයක්. මේ කලපුවෙනුයි මූදෙනුයි ජීවිත ගැට ගහගන්න ධීවරයන් හා ඔවුන්ගේ පවුල් ගණන පන්දාහක් විතර වෙනවා. මේ වෙනකොටත් කොවිඩ් 19 ලොක්ඩවුන් එකෙන් පීඩාවට පත්වෙලා ඉන්න ඒ අය දැන් ඉන්නේ සාගින්නේ මැරෙන්න වෙයි කියා බලාගෙන.”
නීති විරෝධී මසුන් මැරීම තහනම් කර චිරස්ථායී පන්න ක්‍රම තහවුරු කිරීම මගින් ජීවිකාව රැක දීමට රජය වහාම පියවර නොගන්නේ නම්, වීදියට බැස අරගල කිරීම හැර වෙනත් විකල්පයක් ධීවරයන්ට ඉතිරි වී නැති බවට ජූඩ් නික්සන් අනතුරු අඟවයි.
සිවා පරමේශ්වරන්
Facebook Comments
